ޖޮނީ ޑެޕްގެ އަންހެނުން ވަރިވާން ކޯޓަށް

"ޕައިރޭޓްސް އޮފް ދަ ކެރީބިއަން" ފަދަ މަޝްހޫރު ފިލްމުތައް ކުޅެފައިވާ އެކްޓަރު ޖޮނީ ޑެޕްގެ އަންހެނުން އަދި ބަތަލާ އަމްބާ ހާޑް ވަރިވާން ނިންމައި، ކޯޓަށް މައްސަލަ ހުށަހަޅައިފި އެވެ.

ޓީއެމްޒީން ރިޕޯޓްކޮށްފައިވާ ގޮތުން އެންމެ 15 މަސްވީ ކައިވެނި ނިމުމަކަށް ގެންނަން ހާޑް، 30، ނިންމީ ދެ މީހުންގެ މެދުގައި "ހައްލު ނުކުރެވޭ ފަދަ" މައްސަލަތަކެއް ޖެހިގެންނެވެ. އޭނާ ވަރީގެ ޕެޓިޝަން ލޮސް އެންޖަލިސްގެ ކޯޓަށް ހުށަހެޅީ މިދިޔަ ހޯމަ ދުވަހު އެެވެ.

ސެލެބްރިޓީ މެގަޒިން ޕީޕަލް އިން ރިޕޯޓްކޮށްފައިވާ ގޮތުގައި ހާޑް ކޯޓަށް ހުށަހެޅި ޕެޓިޝަނުގެ ކޮޕީއެއް އެ ނޫހަށް ވެސް ވަނީ ލިބިފަ އެވެ.

އޭގައި ބުނެފައިވާ ގޮތުން ޑެޕް، 52، އާ ހާޑް ވަކިވާން ނިންމީ ދެ މީހުންގެ މެދުގައި ހިޔާލު ތަފާތުވުންތައް ގިނަވެ، އެކުގައި ނޫޅެވޭ ހިސާބަށް ދިއުމުންނެވެ.

އެ ދެ މީހުންގެ ކައިވެންޏަކަށް ކުއްޖަކު ލިބިފައެއް ނުވެ އެވެ. ޑެޕް މީގެ ކުރިން ކައިވެންޏެއްކޮށް ދެ ކުދިން ލިބިފައިވެ އެވެ. އޭނާ ކުރިން ކައިވެނި ކުރީ ފްރާންސްގެ ބަތަލާ ވަނެސާ ޕެރަޑިސް އާ އެވެ.

ޑެޕް އާއި ހާޑް ފުރަތަމަ ދިމާވީ ދެ މީހުން އެކުގައި 2011 ވަނަ އަހަރު ކުޅުނު ފިލްމް "ދަ ރަމް ޑައިރީ" ގެ ސެޓުންނެވެ. އެ ހިސާބުން ގުޅުން ބަދަހިވެ، ލޯބީގެ ގޮތުން ގުޅުނީ އެވެ.

ގޮލްޑެން ގްލޯބް ހާސިލްކޮށްފައިވާ ޑެޕްގެ ކައިވެނި ރޫޅުމަކާ ދިމާއަށް ދާ އިރު، އޭނާ މިހާރު ވެސް ހުރީ ވަރަށް ބޮޑު ހިތްދަތި ކަމެއްގެ ތެރޭގަ އެވެ. އެއީ މީގެ ހަފުތާއެއްހާ ދުވަސް ކުރިން މަންމަ މަރުވުމާ ގުޅިގެންނެވެ.

ޑެޕްގެ ކުރިއަށް ހުރި ފިލްމުތަކުގެ ތެރެއިން "އެލިސް ތުރޫ ދަ ލުކިން ގްލާސް" މާދަމާ ސިނަމާތަކަށް އަންނާނެ އެވެ.