ބަތަލާ ސޮނާކްޝީ ސިންހާގެ ލޯބީގެ ވާހަކަތަކުގެ ތެރެއިން އެންމެ ގަދައަށް ދެކެވުނު އެއް ވާހަކައަކީ އަރުޖުން ކަޕޫރާ އޭނާ ވަރަށް ސީރިއަސްކޮށް ލޯބީގެ ގުޅުމެއް ބޭއްވި ވާހަކަ އެވެ. އެއީ 2015 ގައި ދެ ތަރިން އެކުގައި ކުޅުނު ފިލްމު "ތޭވަރު" ޝޫޓިންގެ ތެރެއިން އުފެދުނު ލޯތްބެއް ކަމަށްވެ އެވެ.
އޭގެ ފަހުން މިހާތަނަށް އެހެން އެކްޓަރަކާ މާ ބޮޑަކަށް ސޮނާކްޝީ އަޅުވާކިޔައިފައެއް ނެތެވެ. އެކަމަކު މިހާރު އަންކާ ވެސް އެކްޓަރަކާއި ސޮނާކްޝީގެ "ސިއްރު ގުޅުމެއް" ގެ ވާހަކަ މިހާރު އަންނަނީ ދެކެވެމުންނެވެ. އެއީ އަންނަ އަހަރު ރިލީޒް ކުރާ ފިލްމު "ނޯޓްބުކް" އިން ބޮލީވުޑަށް ތައާރަފުކުރާ ޒުވާން އެކްޓަރު ޒަހީރު އިގްބާލާއި ސޮނާކްޝީގެ ގުޅުމުގެ ވާހަކަ އެވެ.
ޒަހީރަކީ ވެސް ސޮނާކްޝީ ބޮލީވުޑަށް ނެރެދިން ސަލްމާން ހާން ތައާރަފު ކުރާ އެކްޓަރެކެވެ. ޒަހީރާއި އެކްޓަރު މޯނިޝް ބޭލްގެ ދަރިފުޅު ޕްރަނޫޓާން ބޭލް ލީޑް ރޯލް ކުޅޭ ފިލްމު "ނޯޓްބުކް" އަކީ ސަލްމާން ޕްރޮޑިއުސް ކުރާ ފިލްމެކެވެ.
ޕިންކްވިލާ އިން ބުނި ގޮތުގައި މި މަހުގެ 10 ވަނަ ދުވަހު ފާހަގަ ކުރި ޒަހީރުގެ 30 ވަނަ އުފަން ދުވަހުގެ ޕާޓީގެ ތެރެއިން އޭނާ އާއި ސޮނާކްޝީ، 31، ވަރަށް އެކީގައި އުޅުނު ތަން ފެނިފައިވެ އެވެ. އަދި ދެ މީހުން އޭރު އުޅުނު ގޮތަށް ބަލާ އިރު އެކުވެރި ކަމަކަށް ވުރެ ގާތް ގުޅުމެއް އޮތް ކަހަލަ ގޮތަކަށް ހަރަކާތްތައް ފެނިފައިވާ ކަމަށް އެ ނޫހުން ބުންޏެވެ.
އެ ހިސާބުން ފެށިގެން މީޑިއާތަކުން ވަނީ ސޮނާކްޝީ އާއި ޒަހީރުގެ މެދުގައި މިހާރު ހާއްސަ ގުޅުމެއް އޮތް ކަމަށް ނިންމައިފަ އެވެ.
އެކަމަށް ބާރު ދިން އަނެއް ކަމަކީ މި މަހުގެ 27 ވަނަ ދުވަހު ފާހަގަ ކުރި ސަލްމާން ހާންގެ 53 ވަނަ އުފަން ދުވަހުގެ ޕާޓީ އަށް ވެސް ސޮނާކްޝީ އާއި ޒަހީރު އެކުގައި އެއް ކާރެއްގައި ދިޔުމެވެ.
ޒަހީރުގެ ނަމުގައި ހަދާފައިވާ އިންސްޓަގްރާމް އެކައުންޓަކުން ވަނީ ދެ މީހުން ކާރުގެ ތެރޭގައި ނަގާފައިވާ ފޮޓޯއެއް އިންސްޓަގްރާމްގައި ހިއްސާކޮށްފަ އެވެ. އެ ފޮޓޯގައި ފެންނަނީ ކާރުގެ ކުރީ ސީޓްގައި ޒަހީރު އިންނަ އިރު ސޮނާކްޝީ ފަހަތު ސީޓްގައި ކެމެރާތަކުގެ ފްލޭޝް އަށް އުނދަގޫވެގެން އުޅޭ ކަހަލަ ގޮތަކަށް އިންދަ އެވެ.
އަދި ބައެއް އެހެން އެކައުންޓްތަކުން ވެސް ޒަހީރާއި ސޮނާކްޝީގެ ވީޑިއޯ ހިއްސާކޮށްފައިވެ އެވެ.
މީގެ ކުރިން އަޑު އަރާފައިވާ ގޮތުން ފިލްމު "ދަބަންގް" އިން 2010 ގައި ބޮލީވުޑަށް ނުކުތް ސޮނާކްޝީ ވަނީ ބަންޓީ ސަޖްދޭ ކިޔާ މީހަކާ ވެސް ލޯބީގެ ގުޅުމެއް ދުވަސްތަކެއް ވަންދެން ބާއްވައިފަ އެވެ. އަދި އެ ދެ މީހުން އެންގޭޖްވި ކަމުގެ އަޑުތަކެއް ވެސް ކުރިން ފެތުރުނެވެ.
އެކަމަކު މިހާރު ސޮނާކްޝީގެ ހަޔާތުގައި ބަންޓީއެއް ނެތެވެ. އެހެންވެ ބޮޑު ސުވާލަކީ ޒަހީރަކީ ސޮނާކްޝީގެ ކާކު ހެއްޔެވެ؟