މި އަހަރު ހިންދީ ސިނަމާ އަށް އަންނާނެ އެންމެ ތަފާތު އެއް ފިލްމު ކަމަށްވާ، ފެންޓަސީ ފިލްމު "ބުރައްމަސްތުރާ" އަކީ މީގެ އަށް އަހަރު ކުރިން ފެށި މަސައްކަތެއް ކަމަށާއި ފިލްމުގެ ފުރަތަމަ ބައި ޑިސެމްބަރު މަހު ސިނަމާ އަށް އަންނަ އިރު، މި ޓްރޮލޮޖީގެ ސްކްރީންޕްލޭގެ މަސައްކަތް އަދިވެސް ހުއްޓުމެއް ނެތި ކުރިއަށްދާ ކަމަށް ޑައިރެކްޓަރު އަޔާން މުކަރްޖީ ބުނެފި އެވެ.

"ޔެ ޖަވާނީ ހެ ދީވާނީ" އާއި "ވޭކް އަޕް ސިދު" ފަދަ ފިލްމުތައް ގެނެސް ދިން 35 އަހަރުގެ ޑައިރެކްޓަރު އިންސްޓަގްރާމްގައި ބުނި ގޮތުގައި "ބުރައްމަސްތުރާ" އަކީ މިހާތަނަށް އޭނާ ކުރާ އެންމެ ބޮޑު މަސައްކަތް ކަމަށެވެ. އަދި އޭނާ މިކަން ސިފަކޮށްފައި ވަނީ "އެންމެ ރިހުން ބޮޑު އެކަމަކު އެންމެ ހިތްހަމަޖެހޭ" މަސައްކަތުގެ ގޮތުގަ އެވެ.

https://www.instagram.com/p/Bu_nehLn2ZZ/?utm_source=ig_embed&utm_medium=loading

ކަރަން ޖޯހަރުގެ ދަރުމާ އިން ޕްރޮޑިއުސް ކުރާ "ބުރައްމަސްތުރާ" އަކީ ތިން ބަޔަކަށް ބަހާލައިގެން ގެނެސްދޭ ފިލްމެކެވެ. މީގެ ވާހަކަ އެއްކޮށް ސްކްރީނުގައި ކިޔައިދީ ނިންމައިލާނީ ވެސް އަށް އަހަރުގެ ތެރޭގަ އެވެ.

"މި މަސައްކަތުގެ ތެރެއިން އަހަންނަށް ވަރަށް ގިނަ ކަންކަން ތަޖުރިބާ ވެސްކޮށްފިން. އަދިވެސް މި އަންނަނީ ބުރައްމަސްތުރާ ލިޔަމުން،" ފިލްމާ ބެހޭ އެކި ކަހަލަ ތަފުސީލުތައް މިހާރު އިންސްޓަގްރާމްގައި ހިއްސާ ކުރަމުން އަންނަ އަޔާން ބުންޏެވެ.

ޑިސެމްބަރު މަހުގެ 20 ގައި "ބުރައްމަސްތުރާ" ގެ ފުރަތަމަ ބައި ރިލީޒް ކުރާ އިރު، މީގެ ލީޑް ތަރިންނަކީ އާލިއާ ބަޓާއި ރަންބީރު ކަޕޫރެވެ. އަދި ފިލްމުގެ އިތުރު ތަރިންގެ ތެރޭގައި އަމީތާބް ބައްޗަން، ޑިމްޕަލް ކަޕާޑިއާ، ނާގުރްޖުނާ އަކިނޭނީ އަދި މޯނީ ރޯއި ހިމެނެ އެވެ.

ބަލްގޭރިއާ އާއި ލަންޑަނާއި ނިއު ޔޯކްގައި ބޮޑުބައި ޝޫޓްކޮށްފައިވާ "ބުރައްމަސްތުރާ" އަކީ 150 ކްރޯޑް ބަޖެޓަކުން ގެނެސްދޭ ފިލްމެކެވެ. މި ފިލްމުގެ ލޯގޯ ވެސް މިހާރު ދައްކާލާފައިވާ އިރު، ބެލުންތެރިން މިހާރު އިންތިޒާރު ކުރަމުން އަންނަނީ ޓްރެއިލާއަށެވެ.