އެންޖެލީނާ ޖޮލީ އާއި ބްރެޑް ޕިޓް ވަރިވަނީ

ބްރެޑް ޕިޓްގެ ކައިރިން ވަރިވުމަށް އެންޖެލީނާ ޖޮލީ ހުށަހަޅާފައިވާ ކަމަށް މަޝްހޫރު ފިލްމީ ބަތަލާގެ ވަކީލް ޔަގީންކޮށްދީ އެވެ.

ވަކީލް ރޮބާޓް އޮފާ ބުނީ ހޮލީވުޑުގެ މަޝްހޫރު ދެ ތަރިންގެ ކައިވެނި ނިމުމަކަށް ގެންނަން ކޯޓަށް ހުށަހެޅީ ހޯމަ ދުވަހު ކަމަށާއި އެއީ "އާއިލާ އަށް ޓަކައި ނިންމާ ނިންމުމެއް" ކަމަށެވެ.

ބްރެޑް ޕިޓާއި ޖޮލީ 2004 ވަނަ އަހަރުން ފެށިގެން ވަނީ އެކުގައި އުޅެން ފަށައިފަ އެވެ. ނަމަވެސް މި ދެ ތަރިން ކައިވެނި ކުރީ އޮގަސްޓް 2014 ގައި ފްރާންސްގަ އެވެ. އެއީ ބްރެޑް ޕިޓްގެ ދެ ވަނަ ކައިވެންޏެވެ. ޕިޓް ކުރިން ކައިވެނިކޮށްފައި ވަނީ ފްރެންޑްސް ސިލްސިލާގެ ބަތަލާ ޖެނިފާ އެނިސްޓަންއާ އެވެ. އަދި ޖޮލީގެ ތިން ވަނަ ކައިވެންޏެވެ. އޭނާ ކުރިން ކައިވެނި ކުރީ ބިލީ ބޮބް އަދި ޖޯނީ ލީ މިލާ އަށެވެ.

ވަރިއަށް އެދި ހުށަހެޅި ލިޔުމުގައި ސަބަބެއް ކަމަށް ޖޮލީ ބުނެފައި ވަނީ "ހައްލު ނުކުރެވޭ މައްސަލަތައް" ދެ މީހުންގެ މެދުގައި ވެސް ހުރުމުން ކަމަށް އެމެރިކާގެ ބައެއް ނޫސްތަކުން ބުނެފައިވެ އެވެ. އަދި ކުދިން ބެލުމާއި ހަވާލުވާނީ ޖޮލީ ކަމަށާއި އެ ކުދިން ކައިރިއަށް ޕިޓަށް ޒިޔާރަތް ކުރުމުގެ ހައްގު އޮންނަ ގޮތަށް ވެސް ޖޮލީ ވަނީ ހުށަހަޅައިފަ އެވެ. ޕިޓާއި ޖޮލީ އަށް ހަ ކުދިން (އެޑޮޕްޓްކޮށްފައިވާ ތިން ކުދިންނާ އެކު) ލިބިފައިވެ އެވެ.

ޖޮލީ، 41، ވަނީ އދ.ގެ ރެފިއުޖީންނާ ބެހޭ އެޖެންސީގެ ގުޑްވިލް އެމްބަސެޑަރަކަށް 11 އަހަރު މަސައްކަތްކޮށްފަ އެވެ. ފަހުން ވަނީ، 2012 ވަނަ އަހަރުން ފެށިގެން ޚާއްސަ މަންދޫބަކަށްވެފަ އެވެ. ޖޮލީ ވަނީ އުރަމަތީގެ ކެންސަރުން ސަލާމަތްވުމަށްޓަކައި އުރަމަތި ނަގަން އޮޕަރޭޝަން ކޮށްފައިވަ ކަމަށް 2013 ވަނަ އަހަރު އިއުލާންކޮށްފަ އެވެ. އޭގެ ދެ އަހަރު ފަހުން ވަނީ އޯވަރީ އާއި ފެލޯޕިއަން ޓިއުބް ވެސް ނަގައިފަ އެވެ.

ދެ ތަރިންގެ ފިލްމު "ބައި ދަ ސީ" މިދިޔަ އަހަރު ފަހުކޮޅު ރިލީޒް ކުރުމުގެ ކުރިން ޖޮލީ ވަނީ އެ މީހުންގެ ކައިވެނީގައި މައްސަލަތައް ޖެހިފައިވާ ކަމަށް ޓެލެގްރާފަށް ބުނެފަ އެވެ.

ޓޫމް ރައިޑާ ސިލްސިލާ އަދި ޗޭންޖަލިން، ސޯލްޓް ފަދަ ފިލްމުތައް ކުޅެފައިވާ ޖޮލީ ވަނީ ގާލް، އިންޓަރަޕްޓެޑް އިން 1999 ވަނަ އަހަރު އެންމެ މޮޅު ސަޕޯޓިން އެކްޓްރެސްގެ އޮސްކާ ހޯދައިފަ އެވެ. ފައިޓް ކްލަބް، އޯޝަންސް އިލެވަން، ވޯލްޑް ވޯ ޒެޑުގެ ބަތަލް ޕިޓް، ޕްރޮޑިއުސް ކުރުމުގައި ބައިވެރިވި "12 އިޔާސް އަ ސްލޭވް" ވަނީ 2014 ވަނަ އަހަރު އެންމެ މޮޅު ފިލްމުގެ އޮސްކާ އެވޯޑް ހޯދައިފަ އެވެ. މި ދެ ތަރިން އެންމެ ފަހުން މަސައްކަތް ކުރީ "ބައި ދަ ސީ" ގަ އެވެ.