ޝިޝަންކްގެ އާ ފިލްމަށް ވަރުން، ކިއާރާ އަދި ބޫމީ

އެކްޓަރު ވަރުން ދަވަންއާ އެކު މިހާތަނަށް ދެ ފިލްމު ގެނެސްދިން ޑައިރެކްޓަރު ޝިޝަން ކައިތާން، ވަރުން ހިމަނައިގެން ހަދާ ތިން ވަނަ ފިލްމުގެ ބަތަލާއިންނަށް ކިއާރާ އަދުވާނީ އާއި ބޫމީ ޕެޑްނޭކަރު ހަމަޖައްސައިފި އެވެ.

ފިލްމީ ޚަބަރުތައް ގެނެސްދޭ ނޫސްތަކުން ބުނިގޮތުގައި ޝިޝާންކް މިހާތަނަށް ހެދި ތިން ފިލްމު ވެސް ޕްރޮޑިއުސްކުރި ކަރަން ޖޯހަރުގެ ދަރުމާ އިން ޕްރޮޑިއުސްކުރާ އާ ފިލްމުގެ ނަމާ އެކު، ވަރަށް އަވަހަށް ރަސްމީކޮށް ފިލްމު އިއުލާންކުރާނެ އެވެ. އަންނަ އަހަރުގެ މެދުތެރޭގައި ޝޫޓިން ފަށަން ތާވަލުކޮށްފައިވާ މި ފިލްމަކީ އެކްޝަން ރޮމޭންޓިކް ތުރިލާއެއް ކަމަށްވެ އެވެ.

ޝަޝަންކްގެ މި ފިލްމުވެގެން ދާނީ ސްކްރީނުން އަނެއްކާ ވެސް ތާޒާ ޖޯޑްތަކެއް ބެލުންތެރިންނަށް ގެނެސްދޭނެ ފިލްމަކަށެވެ.

ބޫމީ އަދި މިހާތަނަށް ވަރުންއާ އެކު މަސައްކަތްކޮށްފައި ނުވާ އިރު، މި އަހަރު ކުރީކޮޅު ރިލީޒްކުރި ވަރުންގެ "ކަލަންކް" ގެ ހާއްސަ ފެނިލުމެއް ކިއާރާ ކުޅެފައިވެ އެވެ. އެގޮތުން އެ ފިލްމުގެ އެންމެ ހިނގި އެއް ލަވަ ކަމަށްވާ "ފަސްޓް ކްލާސް" އިން ފެނިގެން ދިޔައީ އެ ދެ ތަރިންނެވެ.

ވަރުން މިހާރު ބައްޕަ ޑޭވިޑް ދަވަން ޑައިރެކްޓްކުރާ "ކޫލީ ނަމްބަރު 1" ގެ މަސައްކަތްކުރަމުން އަންނަ އިރު، ޝަޝަންކާ އެކު އޭނާ ކުރިން މަސައްކަތްކުރި ދެ ފިލްމަކީ "ހަމްޓީ ޝަރުމާ ކީ ދުލްހަނިޔާ" އާއި "ބަދުރީނާތު ކީ ދުލްހަނިޔާ" އެވެ.

އެ ދެ ފިލްމުގެ ބޮޑު ކާމިޔާބީއާ ގުޅިގެން ވަރުން ހިމަނައިގެން "ރަންބޫމީ" ކިޔާ ޕީރިއަޑް ފިލްމެއް ހަދަން ކަރަން އާއި ޝިޝާކް 2018 ގައި އިއުލާންކުރި އެވެ. އެކަމަކު އެ ފިލްމަކީ ވަރަށް ބޮޑެތި މަސައްކަތްތަކެއް ކުރަން ޖެހޭ ބިޔަ ޕްރޮޖެކްޓަަކަށްވާތީ، އޭގެ މަސައްކަތް ވަނީ މަޑުޖައްސާލައިފަ އެވެ.

ޝިޝާންޖް އެންމެ ފަހުން ޑައިރެކްޓްކުރި ފިލްމަކީ މިދިޔަ އަހަރު ޖާންވީ ކަޕޫރް ބޮލީވުޑަށް ތައާރަފުކުރި "ދަޅަކް" އެވެ.