ޓީވީ ބަތަލާ މޯނާ ކައިވެނި ކުރަނީ

އިންޑިއާގެ މަޝްހޫރު ޓީވީ ބަތަލާ މޯނާ ސިންގް ވަރަށް އަވަހަށް ކައިވެނިކުރަން ތައްޔާރުވަމުން އަންނަ ކަމަށް ރިޕޯޓްތައް ބުނެފި އެވެ.

މީގެ އަހަރުތަކެއް ކުރިން ސޮނީ ޓީވީން ގެނެސްދިން "ޖެސީ ޖެއިސީ ކޮއީ ނެހީ" އިން ވިދައިލި 38 އަހަރުގެ ބަތަލާ ލޯބީގެ ގޮތުން ގުޅިގެން އުޅެނީ ސައުތު އިންޑިއާގައި މަސައްކަތްކުރާ އިންވެސްޓްމަންޓް ބޭންކަރަކާ ކަމަށް މީޑިއާތަކުން ބުންޏެވެ.

ނަމަވެސް އެ ދެ މީހުން ކައިވެނި ކުރާނެ އިރެއް އަދި ހާމައެއްނުކުރެ އެވެ. މޯނާ ކުރިން ބޮލީވުޑްގެ އެކްޓަރު އަދި "ކޮމާންޑޯ" ފްރެންޗައިޒްގެ ބަތަލު ވިދުޔަތު ޖަމްވަލްއާ ވެސް ލޯބީގެ ގުޅުމެއް ބާއްވާފައިވެ އެވެ.

މުމްބާއީ މިރާ އިން ބުނިގޮތުގައި މޯނާ ކައިވެނިކުރަން ތައްޔާރުވަމުން އަންނާތީ އޭނާ މިހާރު ކުޅެމުން އަންނަ އެކްތާ ކަޕޫރްގެ އޯލްޓް ބަލާޖީގެ ވެބް ސީރީޒް "ކެހެނޭ ކޯ ހަމްސަފަރު ހޭ" ގެ ދެވަނަ ސީޒަންގެ ޝޫޓިން މި މަހުގެ 14 ގެ ކުރިން ނިންމައިލާނެ އެވެ. އަދި އެއަށް ފަހު ކައިވެނީގެ އެންމެ ފަހުގެ ތައްޔާރީތައް ވާނެ އެވެ.

މޯނާ އެންމެ ފަހުން ޓީވީން ފެނިގެން ދިޔަ ސިލްސިލާ އަކީ ކަލާޒުން 2016 ގައި ގެނެސްދިން "ކަވަޗް: ކާލީ ޝަކްތިޔޯން ސޯ" އެވެ. އޭނާ ކުޅެފައިވާ މަޝްހޫރު ސިލްސިލާތަކުގެ ތެރޭގައި "ކިޔާ ހުއާ ތޭރާ ވާދާ" އާއި "ޕިޔާރު ކޯ ހޯ ޖާނޭ ދޯ" ހިމެނެ އެވެ.

"3 އިޑިއަޓްސް" އާއި "އަމާވަސް" އަދި "ޒެޑް ޕްލަސް" ފަދަ ފިލްމުތަކުގެ ސަޕޯޓިން ރޯލްތަކުން ވެސް ފެނިފައިވާ ބަތަލާ އަންނަ އަހަރު ރިލީޒްކުރާ އާމިރު ޚާނާއި ކަރީނާ ކަޕޫރްގެ "ލާލް ސިންގް ޗައްޑާ" ގެ ރޯލަކުން ވެސް ފެނިގެން ދާނެ އެވެ.