ދީޕިކާ ޕަދްކޯން އަކީ ނަމޫނާއެއްގެ ގޮތުގައި ދެކޭ ބަތަލާއެއް ކަމަށާއި އޭނާއާ އެކީގައި ފިލްމެއް ކުޅެން ލިބުމަކީ ވިޝް ލިސްޓްގައި ހެޔޮ ފާހަގައެއް ލާން ލިބުނު ފުރުސަތެއް ކަމަށް ޒުވާން ބަތަލާ އަނަންޔާ ޕާންޑޭ ބުނެފި އެވެ.

މި އަހަރު "ސްޓޫޑަންޓް އޮފް ދަ އިޔާ 2" އިން ބޮލީވުޑަށް ތައާރަފުވި 21 އަހަރުގެ ބަތަލާ އަށް ދީޕިކާއާ އެކު މަސައްކަތްކުރަން ލިބުނީ ކަރަން ޖޯހަރު ޕްރޮޑިއުސްކުރާ ފިލްމަކުންނެވެ. ނަން އަދި އިއުލާންނުކުރާ އެ ފިލްމަކީ ޝަކުން ބަޓްރާ ޑައިރެކްޓްކޮށް، ސިދާންތު ޗަތުރަވެދީ ބަތަލުގެ ރޯލް ކުޅޭ ފިލްމެކެވެ. ފިލްމު ސިނަމާތަކަށް ގެންނަން ނިންމާފައި ވަނީ ފެބްރުއަރީ 12، 2021 ގަ އެވެ.

މިކަމާ ބެހޭ ގޮތުން އަނަންޔާ ބުނީ ކެރިއަރުގެ އެހާ ކުރީކޮޅުގައި ދީޕިކާއާ އެކު މަސައްކަތްކުރަން ލިބުމުން ލިބުނު އުފާ ބަޔާންކޮށްދޭން ވެސް ދަތި ކަމަށެވެ.

"އެއީ އަހަރެން ވަރަށް ލޯބިވާ އަދި ފެށުނީއްސުރެ ފޮލޯކުރަމުން އަންނަ ބަތަލާއެއް. އެހެންވެ ދީޕިކާއާ އެކު މަސައްކަތްކުރަން ލިބުމަކީ އަހަރެންގެ ވިޝް ލިސްޓްގައި ޓިކެއް ލާން ލިބުނު ފުރުސަތެއް،" މި މަހުގެ ކުރީކޮޅު ރިލީޒްކުރި "ޕަތީ ޕަތުނީ އޯރް ވޯ" ގެ ބަތަލާ ބުންޏެވެ. "އުފަލުން ގޮސް ބުނާނެ އެއްޗެއް ވެސް ނޭނގޭ. މި ފުރުސަތު ފަހިކޮށްދިން ކަމަށްޓަކައި ކަރަން އަށް އަބަދު ވެސް ޝުކުރު އަދާކުރާނަން."

މި ވަގުތު ދުބާއީގައި ޗުއްޓީ ހޭދަކުރަމުން އަންނަ ބަތަލާ ބުނިގޮތުގައި ދެން އެންމެ އުފާވި ކަމަކީ ޝަކުންއާ އެކު މަސައްކަތްކުރެވޭތީ އެވެ.

https://www.instagram.com/p/B6Ptf8Mg-b4/?utm_source=ig_embed&utm_campaign=loading

"އެއީ އަހަރެން ގަބޫލުކުރާ ގޮތުގައި އިންޑަސްޓްރީގައި ހުރި އެންމެ ހުނަރުވެރި އެއް ޑައިރެކްޓަރު. އަހަރެން ބުނާނީ ޝަކުންގެ މި ފަހަރުގެ ފިލްމަކީ ވަރަށް ވެސް ތަފާތު ލޯބީގެ ފިލްމަކަށްވާނޭ،" ކާމިޔާބު ފިލްމު "ކަޕޫރް އެންޑް ސަންސް" ގެ ޑައިރެކްޓަރާ ބެހޭ ގޮތުން އަނަންޔާ ބުންޏެވެ. "އޭނައަކީ ވެސް އަހަރެން އެކީގައި މަސައްކަތްކުރަން ހިތުލައިގެން އުޅުނު އެކަކު. އެ ހުވަފެން ވެސް ހަގީގަތަކަށް މިވީ."

އެކްޓަރު ޗަންކީ ޕާންޑޭގެ އަންހެން ދަރިފުޅުގެ ކުރިއަށް ހުރި ފިލްމުތަކުގެ ތެރޭގައި އަލީ އައްބާސް ޒަފަރު ޕްރޮޑިއުސްކުރާ "ކާލީ ޕީލީ" ގެ އިތުރުން ޑައިރެކްޓަރު ރާހުލް ދޮލާކިއާގެ ފިލްމެއް ހިމެނެ އެވެ.