ޝާހްރުކް ޚާންގެ އާ ފިލްމުން ކިޔައިދޭނީ ހިޖުރަކުރުމުގެ ވާހަކަ

ރާޖްކުމާރު ހިރާނީގެ އާ ފިލްމު ޝާހްރުކް ޚާން ކުޅެދޭން އެއްބަސްވެއްޖެ ކަމަށާއި އެ ފިލްމަކީ ހިޖުރަކުރުމާ ބެހޭ ގޮތުން ހަދާ ފިލްމެއް ކަމަށް ރިޕޯޓްތައް ބުނެފި އެވެ.

ހިރާނީގެ ފިލްމަކަށް ޝާހްރުކް ސޮއިކުރި ކަމަށް ބުނާ ވާހަކަތައް ދެކެވެމުން އަންނަތާ މިހާރު އެތައް ދުވަހެއްވެއްޖެ އެވެ. އެކަމަކު ރަސްމީކޮށް އެކަން އަދިވެސް ކަށަވަރެއް ނުވެ އެވެ. ދެހާސް އަށާރައިގައި ރިލިޒްކުރި ފްލޮޕް ފިލްމު "ޒީރޯ" އަށް ފަހު، ޝާހްރުކް ހުރީ އެއްވެސް ފިލްމަކަށް ސޮއިނުކޮށް، ހުސްއަތާ ސުމެއްގަ އެވެ.

ބޮލީވުޑް ހަންގާމާ އިން ބުނިގޮތުގައި ހިރާނީގެ އާ ފިލްމުގެ ސްކްރީންޕްލޭ ވެސް ލިޔަނީ އޭނާއާ އެކު އާންމުކޮށް ސްކްރިންޕްލޭތަކުގައި ހިއްސާވާ އަބިޖާތު ޖޯޝީ ގުޅިގެންނެވެ. މި ދެ މީހުން ސްކްރީންޕްލޭ ލިޔެ، އެންމެ ފަހުން ގެނެސްދިން ފިލްމަކީ 2018 ގެ "ސަންޖޫ" އެވެ.

ހަންގާމާ އިން ބުނީ ހިޖުރަކުރުމާ ބެހޭ ގޮތުން ހަދާ ފިލްމުވެގެން ދާނީ ވަރަށް ވަރަށް އަސަރު ގަދަ އެކަމަކު ލައިޓްހާޓެޑްކޮށް ގެނެސްދޭ ފިލްމަކަށް ކަމަށެވެ. އަދި މިީ ޝާހްރުކް މިހާތަނަށް ނުކުޅޭ ކަހަލަ ތަފާތު ރޯލަކުން ފެންނާނެ ފިލްމެއް ކަމަށް ވެސް ބުންޏެވެ. ހަންގާމާ އިން ބުނީ މި ފިލްމުގެ ކޯ-ޕްރޮޑިއުސްކުރާނީ ޝާހްރުކްގެ ފިލްމު ކުންފުނި ރެޑް ޗިލީޒް އެންޓަޓައިންމަންޓުން ކަމަށާއި މަސައްކަތްކުރަމުން އަންނަނީ އެޕްރީލް ހިސާބުގައި ޝޫޓިން ފަށަން ކަމަށެވެ.

ޝާހްރުކަށް ފިލްމުތައް ހުށަހަޅާފައިވާ ޑައިރެކްޓަރުންގެ ތެރޭގައި "ގޯ ގޯއާ ގޯން" އާއި "ހެޕީ އެންޑިން" ފަދަ ފިލްމުތައް ގެނެސްދިން ރާޖް-ޑީކޭ އާއި ދެކުނުގެ ޑައިރެކްޓަރު އެޓްލީ ހިމެނެ އެވެ.