ކޮވިޑް-19 އާ ހެދި "މިޝަން އިމްޕޮސިބްލް 7" ގެ އިޓަލީގެ ޝޫޓިން ފަސްކޮށްފި

އިޓަލީގައި ކޮވިޑް-19 (ކޮރޯނާވައިރަސް) ފެތުރެމުންދާތީ ޓޮމް ކްރޫޒްގެ ފިލްމު ސީރީޒް "މިޝަން އިމްޕޮސިބަލް" ގެ ހަތް ވަނަ ފިލްމުގެ ޝޫޓިން އެ ގައުމުގައި ފެށުން މަޑުޖައްސާލައިފި އެވެ.

އެ ފިލްމު އުފައްދާ ޕެރަމައުންޓް ޕިކްޗާޒުން ނެރުނު ބަޔާނެއްގައި ބުނީ އިޓަލީގެ ވެނިސްގައި "މިޝަން އިމްޕޮސިބަލް 7" ގެ މަންޒަރުތަކެއް ކުރިއަށް އޮތް ތިން ހަފުތާ ތެރޭގައި ކުރިއަށް ގެންދަން ނިންމި ނަމަވެސް ކާސްޓާއި ކްރޫގެ ސަލާމަތާއި ރައްކާތެރިކަމަށްޓަކައި ޝޫޓިން ފެށުން ލަސްކޮށްފައިވާ ކަމަށެވެ.

ބަޔާނުގައި ބުނީ ޝޫޓިން ފަސްކުރީ ވެނިސްގައި ފިލްމުގެ ވަރަށް މުހިއްމު ބޮޑެތި މަންޒަރުތަކެއް ނަގަން ތައްޔާރީތައް ވެސް ވެފައި ވަނިކޮށް ކަމަށެވެ. ނަމަވެސް ޝޫޓިން ފަށާނީ އެ އިޓަލީގެ ކަމާބެހޭ ފަރާތްތަކުން ކޮވިޑް-19 އާ ބެހޭ ގޮތުން ދޭ އިރުޝާދުތަކަށް ބެލުމަށް ފަހު ކަމަށް ބުންޏެވެ.

އެ ބަލި ޖެހިފައިވާ 150 މީހަކު މިހާތަނަށް އިޓަލީން ފެނިފައިވެ އެވެ. އިޓަލީ އަކީ ޔޫރަޕްގެ ގައުމުތަކުގެ ތެރެއިން ކޮވިޑް-19 ގެ ބަލިމަޑުކަން އެންމެ ބޮޑު ގައުމެވެ.

"މިޝަން އިމްޕޮސިބަލް" ގެ ސީރިޒްގެ އިތުރު ދެ ފިލްމެއް ބެލުންތެރިންނަށް ގެނެސްދޭން ނިންމާފައިވާ އިރު ހަތް ވަނަ ފިލްމު ތާވަލުކޮށްފައި ވަނީ އަންނަ އަހަރުގެ ޖުލައި 23 އަށެވެ. އަދި އަށް ވަނަ ބައި ގެނެސްދޭނީ އޮގަސްޓް 5، 2022 ގަ އެވެ.

"މިޝަން އިމްޕޮސިބަލް" ސީރީޒްގެ ފިލްމެއް އެންމެ ފަހުން ގެނެސްދިނީ 2018 ގަ އެވެ. އެއީ "ފޯލްއައުޓް" އެވެ. ކުރިއަށް އޮތް ދެ ފިލްމު ވެސް ޑައިރެކްޓްކުރާނީ އެ ފިލްމު ވެސް ޑައިރެކްޓްކުރި ކްރިސްޓޯފާ މެކްއަރީ އެވެ.