ރިތިކް ރޯޝަނާއި ސިދާތު އާނަންދު އާ ފިލްމަކަށް ތައްޔާރުވެއްޖެ

އަހުމަދު އަދްޝަން، މިހާރު

06 މާޗް 2020 - 07:29

މިދިޔަ އަހަރު އެންމެ ބޮޑު އާމްދަނީއެއް ހޯދި ހިންދީ ފިލްމު "ވޯ" ގެ ބަތަލު ރިތިކް ރޯޝަނާއި އެ ފިލްމުގެ ޑައިރެކްޓަރު ސިދާތު އާނަންދު އާ ފިލްމަކަށް ތައްޔާރުވާން ފަށައިފި އެވެ.

މިކަން އެ ދެ މީހުން ސޯޝަލް މީޑިއާގައި ވެސް ހިއްސާކޮށްފައިވާ އިރު، ސިދާތު ބުނީ ރިތިކާއި އޭނާގެ އިތުރު ޕްރޮޖެކްޓަކަށް ފޭނުން ވަރަށް ބޮޑަށް އިންތިޒާރުކުރަމުން އަންނާތީ އާ ފިލްމެއް އިއުލާންކުރަން މިހާރު ތައްޔާރީތައްވަމުން އަންނަ ކަމަށެވެ. އަދި ވަރަށް އަވަހަށް އެކަން ހިއްސާކުރާނެ ކަމަށް ބުނަމުން ސިދާތު ބުނީ މި ފަހަރުގެ ފިލްމަކީ ވެސް ނޭވާ ހިފަހައްޓައިލަން ޖެހޭ ކަހަލަ ވަރުގަދަ އެކްޝަން ފިލްމަކަށް ވާނެ ކަމަށެވެ.

Darr rahe ho, matlab kuch bada kar rahe ho. #DarrKeAageJeetHai pic.twitter.com/KlL15sQZrm
— Hrithik Roshan (@iHrithik) March 4, 2020

"އަދި ރިތިކާ އެކު މަސައްކަތްކުރުމަކީ އަހަރެން ވަރަށް ގަޔާވާ ކަމެއް." ރިތިކާ އެކު 2014 ގެ "ބޭންގް ބޭންގް" ވެސް ގެނެސްދިން ޑައިރެކްޓަރު ބުންޏެވެ.

ސިދާތާއި ރިތިކްގެ އާ ފިލްމަކީ "ވޯ" ގެ ދެވަނަ ބައިތޯ ނުވަތަ އެހެން ފިލްމެއްތޯ އަދި ކަށަވަރެއް ނުވެ އެވެ. "ވޯ" ގެ ބޮޑު ކާމިޔާބީއާ ގުޅިގެން އެ ފިލްމު ޕްރޮޑިއުސްކުރި ޔާޝްރާޖް ފިލްމްސް (ވައިއާރްއެފް) އާއި ސިދާތު ވެސް ވަނީ "ވޯ" ފްރެންޗައިޒަކަށް ހަދަން ނިންމައި، ދެވަނަ ބައި މާ ލަސްތަކެއް ނުކޮށް ގެނެސްދޭނެ ކަމަށް ބުނެފަ އެވެ.

މިދިޔަ އަހަރު "ވޯ" ގެ އިތުރުން "ސުޕަ 30" އިން ވެސް ފެނިގެންދިޔަ ރިތިކް، ކުޅޭނެ ފިލްމެއް މި ވަގުތު ރަސްމީކޮށް އިއުލާންކޮށްފައެއް ނެތެވެ. އެހެންވެ ސިދާތުގެ ފިލްމަކީ ދެން އެންމެ އަވަހަށް އޭނާ މަސައްކަތް ފަށާނެ ކަމަށް ބެލެވޭ ފިލްމެވެ.

ރިތިކާ އެކު އިތުރު ފިލްމެއް ހަދަން ނިންި އިރު، "ވޯ" ގެ މުހިއްމު ރޯލެއް ކުޅުނު ޓައިގާ ޝްރޮފާ އެކު ހޮލީވުޑްގެ ފިލްމު "ރާމްބޯ" ގެ ރިމެކެއް ހަދަން ވެސް ސިދާތު އޮތީ ނިންމައިފަ އެވެ. ރިޕޯޓްތައް ބުނާގޮތުން އެ ފިލްމުގެ މަސައްކަތް ފަށާނީ އަންނަ އަހަރު އެވެ.