ލޯބިވެރިޔާ މަލައިކާ އަރޯރާގެ ސަބަބުން މިޒާޖަށް ހެޔޮ ބަދަލުތަކެއް އައިސްފައިވާ ކަމަށާއި އޭނާ އަކީ ވަރަށް ކެތްތެރި އަންހެނެއް ކަމަށް އަރުޖުން ކަޕޫރް ބުނެފި އެވެ.
ބޮލީވުޑް ހަންގާމާ އިން ބުރާސްފަތި ދުވަހު އަރުޖުންއާ އެކު ކުރިއަށް ގެންދިޔަ އިންސްޓަގްރާމް އިންޓަވިއުއެއްގައި ބުނީ މަލައިކާ އޭނާ ބަލައިގަތީ ހިތުގެ އެންމެ އަޑިން ކަމަށާއި ދެ މީހުންގެ ދޭތެރޭގައި އޮތް ގުޅުން ވަރަށް ބަދަހި ކަމަށެވެ.
ޕްރޮޑިއުސަރު ބޯނީ ކަޕޫރްގެ ދޮށީ ފިރިހެން ދަރިފުޅު އަދި ބަަތަލާ ޖާންވީ ކަޕޫރްގެ ބޭބެ ބުނީ އޭނާ އަކީ ގެންގުޅެން އެހާ ފަސޭހަ މީހެއް ނޫން ކަމަށެވެ. އެކަމަކު މަލައިކާ އަކީ އޭނާ ރަނގަޅަށް ހިފަހައްޓައިގެން ގެންގުޅެން އެނގޭ ކަހަލަ ވަރަށް ކެތްތެރި މީހެއް ކަމަށް ބުންޏެވެ.
"އަހަންނާ ދޭތެރޭ މަލައިކާ ދެކޭ ގޮތް ވަރަށް ތަފާތު. އަދި އޭނާ އަކީ އެހާމެ ކުޅަދާނަ މީހެއް. އެހެންވީމާ މަލައިލާ އަށް އެނގޭ އަހަރެން ގެންގުޅޭނެ ގޮތް." އަރުޖުން ބުންޏެވެ.
މަލައިކާގެ އެންމެ ހާއްސަ ކަމަކީ ކޮބައިތޯ އެހުމުން އަރުޖުން ބުނީ ވަކި ކަމެއް ފާހަގަކުރަން ވަރަށް އުނދަގޫ ކަމަށާއި މީހެއް ދެކެ ތެދުވެރި ލޯބިވާ ނަމަ އެ މީހެއްގެ ހުރިހާ ސިފައެއް ދެކެ ވެސް ގަޔާވެވޭ ކަމަށެވެ.
"އެހެންވެ ވަކި ކަމެއް ފާހަގަކުރަން ފަސޭހައެއް ނޫން." އޭނާ ބުންޏެވެ.
ކައިވެނިކުރަނީ ކޮން އިރަކުންތޯ އެހުމުން ޒުވާން އެކްޓަރު ދިނީ ކުރިން ވެސް އޭނާ އެކަމާ ބެހޭ ގޮތުން ދީފައިވާ ޖަވާބެވެ. އެގޮތުން މި ވަގުތު އަދި ކައިވެންޏަށް ތައްޔާރު ނޫން ކަމަށާއި ވަގުތު ޖެހުމުން އެކަން ސިއްރުނުކުރާނެ ކަމަށް ބުންޏެވެ.
"މި ވަގުތަކު އަދި ނެތް ކައިވެނިކުރުމުގެ ޕްލޭނެއް. ކައިވެނި ކުރަން ބޭނުން ވިޔަސް، ހާލަތު މިހާރު އޮތް ގޮތުން ކައިވެނިކުރެވޭނެތަ؟" ކޮރޯނާވައިރަހަށް އިޝާރާތްކޮށް އަރުޖުން ބުންޏެވެ.
މަލައިކާ އާއި އަރުޖުން ލޯބީގެ ގޮތުން ގުޅިގެން އުޅޭތާ މިހާރު ދޮޅު އަހަރެއްހާ ދުވަސްވެއްޖެ އެވެ. އަދި މީޑިއާތަކުން މިދިޔަ އަހަރު ވަނީ އެ ދެ މީހުން މި އަހަރުގެ އެޕްރީލް މަހުގެ ތެރޭގައި ކައިވެނިކުރަން އުޅޭ ކަމަށް ވެސް ބުނެފަ އެވެ.
މަލައިކާ އަކީ ސަލްމާން ޚާންގެ ކޮއްކޮ އަދި އެކްޓަރު އަރްބާޒް ޚާންގެ ކުރީގެ އަންހެންނެވެ. އެ ދެ މީހުންގެ ކައިވެނި 2018 ގައި ރަސްމީކޮށް ރޫޅައިލި އިރު، ލިބުނު ހަމައެކަނި ދަރިފުޅު އަރްހާން ޚާނަށް މިހާރު 17 އަހަރެވެ.
މަލައިކާ، 46، އާއި އަރުޖުން، 36، ގެ އުމުރުގައި 12 އަހަރުގެ ފަރަގެއް އެބަހުއްޓެވެ.