"ސްޕައިޑަ-މޭން" ގެ ފިލްމުތައް ސޮނީން ފަހަތަށް ޖައްސާލައިފި

ޒުވާން އެކްޓަރު ޓޮމް ހޮލަންޑާ އެކު ގެނެސްދޭ "ސްޕައިޑަ-މޭން" ގެ ކުރިއަށް ހުރި ފިލްމުތަކުގެ މަސައްކަތްތައް ސޮނީ ފިޗްކާޒް އިން ފަހަތަށް ޖައްސާލައިފި އެވެ.

ކޮރޯނާވައިރަހާ ދިމާކޮށް، ހޮލީވުޑްގެ ފިލްމީ ކަލަންޑަރަށް އަންނަނަމުންދާ ބޮޑެތި ބަދަލުތަކާ އެކު، "ސްޕައިޑަ-މޭން" ކުރިއަށް އޮތް ދެ ފިލްމު ރިލީޒްކުރާ ތާރީހު ވެސް ވަނީ ފަސްކޮށްފަ އެވެ.

މިދިޔަ އަހަރު ރިލީޒްކޮށް، ބޮކްސް އޮފީހުގައި ބިލިއަން ޑޮލަރުގެ އާމްދަނީއެއް ވެސް ހޯދި "ސްޕައިޑަ-މޭން: ފާ ފްރޮމް ހޯމް" ގެ ސީކްއެލްގެ ގޮތުގައި ގެނެސްދޭން ނިންމާފައި އޮތް ދެ ފިލްމުގެ ތެރެއިން ފުރަތަމަ ފިލްމު މިހާރު ވަނީ ޖުލައި 16، 2021 އިން ނޮވެމްބަރު 5، 2021 އަށް ފަސްކޮށްފަ އެވެ. އަދި ދެވަނަ ފިލްމު އެޕްރީލް 8، 2022 އިން އޮކްޓޯބަރު 7، 2022 އަށް ވަނީ ފަސްކޮށްފަ އެވެ.

މިކަން ހުކުރު ދުވަހު އިއުލާންކުރަމުން ސޮނީ ޕިކްޗާޒް އިން ބުނީ ދެ ފިލްމު ލަސްކުރުމަކީ ފޭނުން ބޭނުންވާނެ ގޮތެއް ނޫންކަން ގަބޫލު ކަމަށާއި އެކަމަކު މި ހާލަތުގައި ފިލްމުތަކުގެ ތާވަލުތަކަށް ބަދަލުތަކެއް ގެނައުނުން ނޫން ގޮތެއް ނެތް ކަމަށެވެ. "ސްޕައިޑަ-މޭން" ގެ އިތުރުން ވެސް ސޮނީ ޕިކްޗާޒްގެ ގިނަ ފިލްމުތަކެއް ގެ ތާރީހުތައް ވަނީ އަލުން ޝެޑިއުލްކުރަން ޖެހިފަ އެވެ.

މި އަހަރުގެ ރިލީޒްވާން ހުރި ވަރަށް ގިނަ ފިލްމުތަކެއްގެ ތާރީހުތައް ބަދަލުކޮށްފައިވާ އިރު، ބައެއް ފިލްމުތައް އަންނަ އަހަރަށް ފަސްކޮށް، ބައެއް ފިލްމުތައް ވެސް ސިނަމާތަކަށް ނުގެންނަން ނިންމައި، ސްޓްރީމިން އާއި ވީޑިއޯ އޮން ޑިމާންޑް ފަދަ ޕްލެޓްފޯމްތަކަށް ސްޓޫޑިއޯތަކުން ވަނީ ދޫކޮށްލައިފަ އެވެ.

"ސްޕައިޑަ-މޭމް: ފާ ފްރޮމް ހޯމް" ގެ ސީކްއެލްތަކަކީ ބެލުންތެރިން އެންމެ އުންމީދުކުރާ ފިލްމުތަކުގެ ތެރެއިން ފިލްމުތަކެވެ.

މިދިޔަ އަހަރު ރިލީޒްކުރި "ފާ ފްރޮމް ހޯމް" އަކީ ބޮކްސް އޮފީހުގައި 1.132 ބިލިއަން ޑޮލަރުގެ އާމްދަނީއެއް ހޯދި ފިލްމެކެވެ. ޖޮން ވޮޓްސް ޑައިރެކްޓްކުރި އެ ފިލްމު ހަދާފައި ވަނީ 160 މިލިއަން ޑޮލަރުގެ ބަޖެޓަކުންނެވެ. އެ ފިލްމަކީ ހޮލަންޑް، 23، އާ އެކު 2017 ގައި ގެނެސްދިން "ސްޕައިޑަ-މޭން: ހޯމްކަމިން" ގެ ބައެކެވެ. ޖުމްލަ 175 މިލިއަން ޑޮލަރުގެ ބަޖެޓަކުން ހެދި އެ ފިލްމުގެ އާމްދަނީ އަކީ 880.2 މިލިއަން ޑޮލަރެވެ.

ހޮލަންޑްގެ ކުރިއަށް ހުރި ފިލްމުތަކުގެ ތެރޭގައި "ދަ ޑެވިލް އޯލް ދަ ޓައިމް" އާއި "ކެއޯސް ވޯކިން" ގެ އިތުރުން "ޗެރީ" ހިމެނެ އެވެ.