ޕްރަބާސްގެ "ޖާން" ގައި ބަގިޔާޝްރީގެ ރޯލެއް

ސަލްމާން ޚާނާ އެކު، ޑައިރެކްޓަރު ސޫރަޖް ބަރަޖްތިއާ ގެނެސްދިން މަޝްހޫރު ފިލްމު "މޭނޭ ޕިޔާރު ކިޔާ" ކުޅެގެން ވަރަށް ބޮޑަށް ވިދައިލި ކުރީގެ ބަތަލާ ބަގިޔާޝްރީ އަލުން އެނބުރި ބޮޑު ފިލްމަކުން ބޮޑު ސްކްރީނަށް އަންނަން ތައްޔާރުވާން ފަށައިފި އެވެ.

އޭނާގެ އާ ފިލްމަކީ "ބާހްބަލީ" ގެ އެކްޓަރު ޕްރަބާސް ކުޅޭ "ޖާން" އެވެ. އެ ފިލްމުގެ ބަތަލާ އަކީ ޕޫޖާ ހެގްޅޭ އެވެ. މި ފިލްމު ރިލީޒްކުރާނެ ކަމަށް ބެލެވެނީ އަންނަ އަހަރު އެވެ.

"ޖާން" އާ ބެހޭ ގޮތުން މީޑިއާއަކަށް ދިން އިންޓަވިއުއެއްގައި ބަގިޔާޝްރީ، 51، ބުނީ އެ ފިލްމުގެ ޝޫޓިންތަކެއް ލޮކްޑައުންގެ ކުރިން ނިންމާފައިވާ ކަމަށާއި ފިލްމުގެ ވަރަށް މުހިއްމު ކެރެކްޓާ އަކުން އޭނާ ފެންނާނެ ކަމަށެވެ. ނަމަވެސް އެ ފިލްމުގެ ޕްރޮޑިއުސަރުން ރަސްމީކޮށް ފިލްމު އިއުލާންނުކުރާތީ އޭގެ އެއްވެސް ތަފުސީލަކަށް ދާން ބޭނުންނުވާ ކަމަށް ބުންޏެވެ.

"ޖާން" އަކީ ތެލެގޫ ބަހުން ހަދާ ފިލްމެކެވެ. އެކަމަކު މި ފިލްމު ހިންދީ ބަހުން ވެސް ގެނެސްދޭނެ އެވެ.

"މޭނޭ ޕިޔާރު ކިޔާ" އިން ބޮޑު މަޝްހޫރުކަމެއް ލިބުނަސް ބަގިޔާޝްރީ އަކީ ފިލްމީ ދާއިރާ އިން ވަރަށް އަވަހަށް ގެއްލުނު ބަތަލާއެކެވެ. އޭނާ ކުޅުނީ ވެސް މަދު ފިލްމުތަކެކެވެ. އޭގެ ތެރޭގައި ހިންދީ ފިލްމުގެ އިތުރުން އިންޑިއާގައި އެހެން ބަހުރުވަތަކުން ހަދާފައިވާ ބައެއް ފިލްމުތައް ވެސް ހިމެނެ އެވެ.

އެގޮތުން އެންމެ ފަހުން އޭނާ ފެނިފައި ވަނީ މިދިޔަ އަހަރު ރިލީޒްކުރި ކަންނާޑާ ކޮމެޑީ ފިލްމު "ސީތާރާމް ކަލިއާނާ" އިންނެވެ. ބަގިޔާޝްރީ ސޮއިކޮށްފައިވާ ފިލްމުތަކުގެ ތެރޭގައި "2 ސްޓޭޓްސް" ކިޔާ ތެލެގޫ ފިލްމެއް ވެސް ހިމެނެ އެވެ.

އޭނާ ކުޅުނު ހިންދީ ފިލްމުތަކުގެ ތެރޭގައި "ޕާޔަލް" އާއި "ތިޔާގީ" ހިމެނެ އެވެ.

ބަގިޔާޝްރީގެ ފިރިހެން ދަރިފުޅު އަބިމަންޔޫ ދައްސާނީ، 30، ބޮލީވުޑަށް ނުކުތީ މިދިޔަ އަހަރު ރިލީޒްކުރި "މަރުދު ކޯ ދަރުދު ނެހީ ހޯތާ" އިންނެވެ. އޭނާގެ ކުރިއަށް ހުރި ފިލްމުތަކުގެ ތެރޭގައި "ނިކައްމާ" އާއި "އާނކް މިޗޯލީ" ހިމެނެ އެވެ.

އަބިމަންޔޫގެ އިތުރުން ބަގިޔާޝްރީގެ ދެން ހުންނަނީ އަވަންތިކާ ދައްސާނީ ކިޔާ އަންހެން ކުއްޖެކެވެ.