ޒަރީންގެ ޚާންގެ ހިތްދަތި ވާހަކަތަކެއް

ފިލްމީ ތަރިއަކަށްވުމަކީ ފަސޭހަކަމެއް ނޫން ކަމަށާއި މިހާރު ހުރި ހިސާބަށް ދެވުނީ ހިތްދަތި އެތައް ތަޖުރިބާއަކަސް ފަހު ލައްކަ ހިތްވަރުން ކަމަށް ބަތަލާ ޒަރީން ޚާން ބުނެފި އެވެ.

ބަތަލާ ކެޓްރީނާ ކެއިފާ ވައްތަރު ގޮތެއް ހުންނަ ކަމަށް ބައެއް މީހުން ބުނާ ބަތަލާ ބޮލީވުޑަށް ނުކުތީ ސަލްމާން ޚާނާ އެކު 2010 ގައި ކުޅުނު "ވީރު" އިންނެވެ.

ފިލްމީ ކެރިއަރާއި އަމިއްލަ ދިރިއުޅުމާ ބެހޭ ގޮތުން މަންމަ ޕަރުވީން ޚާނާ އެކު "ޕިންކްވިލާ" ގެ "ޑިއާ މޮމް" ގެ ނުވަ އެޕިސޯޑްގައި ޒަރީން ބުނީ އޭނާގެ ހަޔާތަކީ އެހާ އުފާވެރި ހަޔާތެއް ނޫން ކަމަށެވެ. އެގޮތުން އޭނާ އާއޮ ކޮއްކޮ ކުޑައިރު، ބައްޕަ އެ މީހުން ދޫކޮށްލާފައި ދިއުމުން މަންމަގެ ދިރިއުޅުން ވަރަށް ބޮޑު ބުރައަކަށްވި ބުންޏެވެ.

"އަހަރެން ބޮޑުވަމުން އައީ މާ ބޮޑު ތަނަވަސްކަމެއް ނެތި ކިރިޔަކިރިޔާ އުޅެވޭވަރުގެ ހާލަތެއްގައި. ވަރަށް ދެރަވި ދުވަހެއް އަހަރެމެން ދޫކޮށްލާފައި ބައްޕަ ދިޔަ ދުވަހަކީ." ޒަޒީން ބުންޏެވެ.

އޭނާ ބުނީ އެފަދަ ގޮތެއް ދިމާވި ނަމަވެސް ހިތްދަތިކަމުން އަރައިގަންނަން އަމިއްލަ އަށް މަސައްކަތްކުރަން ފެށި ކަމަށެވެ. އެގޮތުން ގްރޭޑް 12 ނިމުމާ އެކު ކޯލް ސެންޓަރެއްގައި ވަޒީފާ އަދާކުރަން ފެށި ކަމަށާއި އެއާލައިނަކުން ވަޒީފާއެއް ހޯދަން ވެސް އުޅުނު ކަމަށް ބުންޏެވެ.

ނަމަވެސް އޭރު ފަލަކަމުން ފުރުސަތުތައް ލިބުމުގައި ބޮޑެތިތަކަކާ ކުރިމަތިލާން ޖެހުނު ކަމަށް ބުންޏެވެ. ޒަރީން ބުނި ގޮތުގައި އޭނާ ހިކެން މަސައްކަތް ފެށި އިރު ބަރުދަނުގައި 100 ކިލޯ ހުއްޓެވެ. އެކަމަކު ހިތްވަރާ އެކު ކުރި މަސައްކަތުން ބަރުދަން 52 އަށް ލުއިކޮށްލެވުނު ކަމަށް ބުންޏެވެ. އަދި ބުނީ "ވީރު" ކުޅެން ލިބުނީ އެ ބަދަލުގެ ތެރެއިން ކަމަށެވެ.

"އަހަރެން ބޭނުންވީ އާއިލާ ބަލަހައްޓާނެ ގޮތެއް ހޯދޭތޯ. އާއިލާގައި އަހަންނަނާއި އަންހެން ކޮއްކޮއަކާއި މަންމަ. އަހަރެމެންނަށް މާލީ ގޮތުން ވެސް އެހީވާނެ އިތުރު މީހަކު ނެތް،" ޒަރީން ބުންޏެވެ. "އެހެންވެ އާއިލާގެ ދޮށީ ކުއްޖާގެ ހައިސިއްޔަތުން އާއިލާ ބަލަހައްޓާނެ ގޮތްތަކުން ހޯދަން ވަރަށް ޒުވާން އުމުރުގައި ނުކުންނަން ޖެހުނީ. އަހަރެންގެ ކޮއްކޮ އަދިވެސް ކިޔަވަނީ."

އޭނާ ބުނީ ދިރިއުޅުމަކީ ހަނގުރާމައެއް ކަމަށާއި ހިތްވަރާ އެކު މަސައްކަތްކޮށްފި ނަމަ ކާމިޔާބުވާނެ ކަމަށެވެ. އަދި މިއަދު އާދެވިފައި ހުރި ހިސާބާ ދޭތެރޭ ޝަކުވާއެއް ނެތް ކަމަށް ބުންޏެވެ.

ބޮލީވުޑަށް ނުކުތް ނަމަވެސް ޒަރީނަކީ ކުޅޭނެ މާ ރަނގަޅު ފިލްމުތަކެއް ލިބުނު ބަތަލާއެއް ނޫނެވެ. އަދި މިހާތަނަށް އޭނާ މާ ގިނަ ފިލްމުތަކެއް ކުޅެފައެއް ވެސް ނެތެވެ. ބޮލީވުޑަށް ނުކުތުމާ އެކު ވެސް ޒަރީނަށް އެންމެ ބޮޑަށް ކުރިމަތިލާން ޖެހުނު އެއް ކަމަކީ އޭނާ ފަލަކަމުގެ ވާހަކައާ އެވެ. އެހެންވެ ފަހުން ވެސް ހިކެން އެތައް މަސައްކަތެއް ކުރަން ޖެހުނެވެ.

އޭނާ ކުޅުނު ފިލްމުތަކުގެ ތެރޭގައި "ހައުސްފުލް 2" އާއި "ހޭޓް ސްޓޯރީ 3" އަދި "އަކްސަރު 2" އާއި "ވަޖާ ތުމް ހޯ" ހިމެނެ އެވެ.

ޒަރީން ވަނީ ޕަންޖާބީ އަދި ތެލެގޫ ފިލްމުތަކެއް ވެސް ކުޅެފަ އެވެ.

ޒަރީންއާ ބެހޭ ގޮތުން މަންމަ ޕަރްވީން ބުނީ ދަރިއެއްގެ ހައިސިއްޔަތުން ޒަރީން އާއިލާ ބަލަހައްޓަން ކުރި އަދި މިހާރު ވެސް ކުރާ މަސައްކަތަކީ ނަމޫނާއެއް ކަމަށާއި އާއިލާގެ ހުރިހާ ވެސް މީހަކީ އެއީ ކަމަށެވެ.