އެކްޓަރު އާމިރު ޚާންގެ އަލަތު ކައިވެންޏަށް ދެ ދަރިން ވެސް ލިބިފައި ވަނިކޮށް އެ ކައިވެނި ރޫޅުނުތާ މިހާރު އެތައް އަހަރެއް ވެއްޖެ އެވެ. އެ ކައިވެންޏަށް، 55 އަހަރުގެ އެކްޓަރަށް ލިބުނު ދެ ދަރިން ބޮޑެތިވެ އެ މީހުން މިހާރު ތިބީ މީހުންނާ އިންނަ އުމުރަށް އަޅައިފަ އެވެ. އެއީ ޖުނައިދު ޚާން، 27، އާއި އިރާ ޚާން، 23، އެވެ.
ރީނާ ދައްތާ އާއި އާމިރު 1986 ގައި ކުރި ކައިވެނި ރޫޅުނީ 2002 ގަ އެވެ. އާމިރު ފަހުން 2005 ގައި ކައިވެނިކުރީ ޑައިރެކްޓަރު ކިރަން ރާއޯއާ އެވެ. އެ ކައިވެންޏަށް ސަރޮގޭޓްކޮށްގެން ލިބުނު އާޒާދު ރާއޯ ޚާނަށް މިހާރު 8 އަހަރެވެ.
އާމިރުގެ އަލަތު ކައިވެނީގެ ހަނދާން އާ މިކުރަނީ ތަފާތު ކަމަކާ އެކީގަ އެވެ. އެއީ އެ ކައިވެންޏަށް އެންމެ 10 ރުޕީސް ހަރަދުކުރި ވާހަކަ އެވެ. މިއީ ފަހަރުގައި ބައެއް މީހުން ހައިރާންވެދާނެ ވާހަކައަކަށް ވެސް ވެދާނެ އެވެ.
ނަމަވެސް ލިޔުންތެރިޔާ ސަންޖުކުކްތާ ނަންދީ "ޚާންޓާސްޓިކް: ދި އަންޓޯލްޑް ސްޓޯރީ އޮފް ބޮލީވުޑް" ގައި ވަނީ އާމިރުގެ އަލަތު ކައިވެންޏާ ބެހޭ ގޮތުން ޝައުގުވެރި ވާހަކަތަކެއް ހިއްސާކޮށްފަ އެވެ. އެފޮތުގައި ބުނެފައިވާ ގޮތުގައި އާމިރާ ރީނާ ކައިވެނިކުރީ އާއިލާ އަށް ވެސް ނާންގައި ސިއްރުން އެޕްރީލް 18، 1986 ގަ އެވެ. އެއީ އާމިރު ބޮލީވުޑަށް ނުކުތުމުގެ ވެސް ކުރިންނެވެ. އޭނާގެ އަލަތު ފިލްމަކީ ކައިވެންޏަށް ފަހު ކުޅުނު 1988 ގެ "ގަޔާމަތު ސޭ ގަޔާމަތު ތަކް" އެވެ.
ނަންދީގެ ފޮތުގައި ކިޔައިދީފައިވާ ގޮތުން އާމިރު ކައިވެނިކުރި އިރު އުމުރުން 21 އަހަރެވެ. އަދި އޭނާ ވަނީ ރީނާއާ ކައިވެނިކުރުމުގެ ކުރިން ވެސް ލޯބީގެ ހިތްދަތި ގުޅުންތަކެއް ތަޖުރިބާކޮށްފަ އެވެ. ފޮތުގައިވާ ގޮތުން އާމިރަށް ރީނާ އެންމެ ފުރަތަމަ ފެނުނީ އޭރު އޭނާ ދިރިއުޅުނު އެޕާޓްމަންޓްގެ ކުޑަދޮރު ހުޅުވާލައިގެން ބޭރު ބަލަން އިންދައި ކައިރީގައި ހުރި އެހެން އިމާރާތަކުންނެވެ. އަދި ފުރަތަ ފެނިލުމާ އެކު ވެސް އާމިރަށް ރީނާ އަށް ހިތްދެވިއްޖެ އެވެ. އޭރު ރީނާ ގެންދިޔައީ މުމްބާއީގެ އެސްޓީ ޒޭވިއާ ކޮލެޖްގައި ކިޔަވަމުންނެވެ.
މި ގޮތަށް ދުވަސްތައް ފާއިތުވަމުން ގޮސް ދެ މީހުންނަށް އެކަކު އަނެކު ދެކެ ގަޔާވެވި، ހިތުގެ ޝުއޫރުތައް ވެސް އެންމެ ފަހުން ބަންޑުންކޮށްލީ އެވެ. އެކަމަކު މިކަން އެނގުމާ އެކު ރީނާގެ އާއިލާ އިން އެ ގުޅުމާ ދެކޮޅު ހެދި އެވެ. ސަބަބަކީ އާމިރަކީ ކިޔެވުން ވެސް ހުއްޓާލައި، ވަޒީފާއެއް ނެތި ހުރި ޒުވާނަކަށްވުމެވެ.
ނަމަވެސް އެންމެ ފަހުން އާމިރާއި ރީނާ، އާއިލާ އަށް ސިއްރުން ކައިވެނިކޮށް ރަޖިސްޓްރީކުރީ އެވެ. ހަފުލާގައި ބައިވެރިވީ ހަމައެކަނު ދެ މީހުންގެ ގާތް ރައްޓެހިންނެވެ. މާ ބޮޑު ހަފުލާއެއް ނެތެވެ. އެހެންވެ ކައިވެނީ ހަރަދަށް ދިޔައީ 10 ވަރަކަށް ރުޕީސް އެވެ.
ކައިވެނިކުރިތާ މާ ގިނަ ދުވަހެއް ނުވެ، އާމިރާއި ރީނާ، އެ މީހުންގެ އަމިއްލަ ދިރިއުޅުމަށް ރުޖޫއަވި އެވެ. ކައިވެނިކުރި ކަމެއް ދެ ފަރާތުގެ އާއިލާއަކަށް ނޭނގެ އެވެ.
އާމިރު "ގަޔާމަތު ސޭ ގަޔާމަތު ތަކް" ގެ މަސައްކަތް ފެށީ ކައިވެނިކުރިތާ މާ ގިނަ ދުވަހެއް ނޫނެވެ. ޖޫހީ ޗާވްލާ ބަތަލާގެ ރޯލް ކުޅުނު އެ ފިލްމަކީ އާމިރުގެ ކަޒިންއެއް ކަމަށްވާ މަންސޫރު ޚާނެވެ.
ފިލްމުގެ ޝޫޓިން މުމްބާއީގައި އެއް ދުވަހަކު ކުރިއަށް ދަނިކޮށް، ރީނާ ސެޓަށް ދިޔަ އެވެ. އެ ދުވަހަކީ "ގަޔާމަތު ސޭ ގަޔާމަތު ތަކް" އިން މަޝްހޫރުވި ލަވަ "ޕާޕާ ކެހެތޭ ހޭ ބަޅާ ނާމް" ގެ މަންޒަރުތައް ނަގަމުން ދިޔަ ދުވަހެވެ. އެ ދުވަހު އާމިރު ވަނީ މަންސޫރު ކައިރީ އެދިގެން، އަދި ރީނާ ކައިރީ ވަރަށް އާދޭސްކޮށްގެން ލަވައިގެ މަންޒަރެއްގައި ހިއްސާވާން އެދިފަ އެވެ. އެ ލަވައިގައި އާމިރު ރަތް ކުލައިގެ ޓޮޕެއް ލައިގެން އިންނަ އަންހެން ކުއްޖަކާ ގައިގޯޅިވަނިކޮށް ފެންނާނެ އެވެ. އެއީ ރީނާ އެވެ.
މި ހުރިހާ ކަމެއް ކުރިއަށް ދިޔަ އިރު ރީނާ އަކީ އާމިރުގެ އަންހެނުން ކަމެއް ފިލްމުގައި މަސައްކަތްކުރި އެއްވެސް މީހަކަށް ނޭނގެ އެވެ. އަދި ރީނާ އަކީ އާމިރުގެ އަންހެނުންކަން ފުރަތަމަ ހިއްސާކޮށްފައި ވަނީ އޫޓީ އަށް ޝޫޓިން އަށް ގޮސް އުޅުމުގެ ތެރޭގައި ދިމާވި ކަމަކާ ހުރެ، ޝެޑިއުލް ކެންސަލްކޮށް، ބެންގަލޫރަށް ގޮސް އުޅުމުގެ ތެރޭގައި ދައްތަ ނުޒުހަތު ގާތުގަ އެވެ. އެ ދުވަހަކީ މުމްބާއީގައި ހުރި ރީނާ ކޮލެޖްގެ ޕިކްނިކް ދަތުރެއްގައި ދާން ޖެހުނު ދުވަހެކެވެ. ގުޅާނަމޭ ބުނި ނަމަވެސް އޭނާގެ ޚަބަރެއް ނުވެ، ދިގުލައިގެން ދާން ފެށުމުން ކެތް ނުވެގެން ރީނާގެ ވާހަކަ އާމިރު ދައްތަ ކައިރީ ބުނީ އެވެ.
އެ ހިސާބުން ދެ ފަރާތުގެ އާއިލާ އަށް އެ މީހުން ކައިވެނިކުރިކަން އެނގި، އާމިރުގެ އާއިލާ އިން އެކަމަށް މަރުހަބާ ކިޔެ އެވެ. އަދި ރީނާގެ މައިންބަފައިން ވެސް ފަހުން ގުޅުމާ ގަބޫލުވި އެވެ.
ނަމަވެސް "ގަޔާމަތު ސޭ ގަޔާމަތު ތަކް" ރިލީޒްވި އިރު ވެސް އާމިރު ކައިވެނިކޮށްގެން އުޅޭކަން އޮތީ ސިއްރުކޮށްފަ އެވެ. އޭނާގެ ޕީއާރް ޓީމަށް ވެސް އޮތީ އެކަން އެގޮތަށް ދީފަ އެވެ. އެ ފިލްމު އެޕްރީލް 29، 1988 ގައި ރިލީޒްވުމާ އެކު އާމިރު ކުއްލިއަކަށް މަޝްހޫރުވި އެވެ.
"ގަޔާމަތު ސޭ ގަޔާމަތު ތަކް" އާ އެކު ފެށި އާމިރުގެ ފިލްމީ ދަތުރު ކިތަންމެ ކާމިޔާބަސް، އޭނާގެ ޒާތީ ދިރިއުޅުން އެހާ ކާމިޔާބު ކަމަށް ގިނަ ބަޔަކު ގަބޫލެއްނުކުރާނެ އެވެ. ސަބަބަކީ ލޯބިން ކުރި އަލަތު ކައިވެނި 16 އަހަރު ފަހުން ރޫޅުމެވެ. އާމިރާއި ރީނާ ވަކިވި ފަހުން، ރީނާ ކައިވެންޏެއް ނުކުރެ އެވެ. އެކަމަކު އޭނާ އާއި އާމިރާއި ކިރަންއާ ވެސް ވަރަށް ގާތް ގުޅުމެއް އަބަދު ވެސް އޮވެ އެވެ.
އާމިރާއި ކިރަން ދިމާވީ 2001 ގައި އާމިރު ކުޅުނު ފިލްމު "ލަގާން" ގެ ސެޓުންނެވެ. އެ ފިލްމުގައި ކިރަން އަކީ އެސިސްޓަންޓް ޑައިރެކްޓަރެކެވެ.