ބޮލީވުޑްގެ ބަތަލާ ދީޕިކާގެ މައްޗަށް ތުހުމަތުކުރެވޭ މަސްތުވާތަކެތީގެ މައްސަލައާ ބެހޭ ގޮތުންް މިހާރު ނެޝަނަލް ނާކޮޓިކްސް ކޮންޓްރޯލް ބިއުރޯ (އެންސީބީ) އިން ސުވާލުކޮށްފައިވާ އިރު، މަސްތުވާތަކެއްޗާ ގުޅޭ ގޮތުން ވަޓްސްއެޕް ޗެޓެއްގައި މުއާލަމާތްތަކެއްކޮށްފައިވާ ކަމަށް އެއްބަސްވެފައިވާ ކަމަށް މީޑިއާތަކުން ބުނެފި އެވެ.
މި ވާހަކަ ދައްކާފައި އޮތީ ދީޕިކާ އެޑްމިން މެންބަރުންގެ ތެރޭގައި ވެސް ހިމެނޭ ގްރޫޕެއްގެ ތެރޭގައި ކަމަށް އެންސީބީއާ ހަވާލާދީ ބައެއް މީޑިއާތަކުން ހުކުރު ދުވަހު ބުނެފައިވެ އެވެ. އިންޑިއާގެ ބައެއް ނޫސްތަކުން ބުނި ގޮތުގައި ދީޕިކާ މަސްތުވާތަކެތި ހޯދުމާ ގުޅޭ ގޮތުން މުއާމަލާތްކޮށްފައި ވަނީ އޭނާގެ ބިޒްނަސް މެނޭޖަރެއްގެ ދައުރު އަދާކުރާ ކަރިޝްމާ ޕްރަކަޝްއާ އެވެ. އެގޮތުން ވަޓްސްއެޕްގައި ކޮށްފައިވާ މުއާމަލާތްތަކެއްގެ ސްކްރީންޝޮޓްތަކެއް ލީކްވެފައި ވާއިރު ޗެޓްތަކުގައި "ޑީ" ގެ ނަމުގައި ސޭވްކޮށްފައިވާ ނަމަކީ ދީޕިކާ ކަމަށް ބެލެވިފައިވެ އެވެ. އަދި "ޑީ" ގެ ނަމުގައި ކަރިޝްމާ ވަނީ "ސާމާނު ކޮބައިތޯ" ވެސް އަހައިފަ އެވެ.
ކަރިޝްމާއާ އެކު ދީޕިކާ ކުރި ވަޓްސްއެޕް މުއާލަމާތުގެ މައްސަލައާ ގުޅޭ ގޮތުން ހުކުރު ދުވަހާއި ހޮނިހިރު ދުވަހު ސުވާލުކުރި އިރު 2017 ގައި ދީޕިކާ ބޭއްވި ޕާޓީއެއްގައި ވެސް މަސްތުވާތަކެތި ގެންގުޅުނު ކަމަށް ބުނާތީ އެ މައްސަލައާ ބެހޭ ގޮތުން ވެސް ސުވާލުކޮށްފައިވެ އެވެ.
ނަމަވެސް މިކަމާ ގުޅިގެން އެންސީބީ އާއި ދީޕިކާ ވެސް އަދި ރަސްމީކޮށް އެއްވެސް އެއްޗެއް ނުބުނާތީ މީޑިއާތަކުގައި ދެކެމުންދާ ވާހަކަތަކުގެ ސައްހަކަމެއް ކަށަވަރެއް ނުވެ އެވެ.
ދީޕިކާގެ އިތުރުން މަސްތުވާތަކެއްޗާ ގުޅުން ހުރި މައްސަލަތަކުގައި އެންސީބީން ސުވާލުކުރަން ނިންމައި ނޯޓިސް ފޮނުވި ބަތަލާއިންގެ ތެރޭގައި ސާރާ އަލީ ޚާނާއި ޝްރަދާ ކަޕޫރާއި ރަކުލް ޕްރީތު ސިންގް ވެސް ހިމެނެ އެވެ. އެންސީބީން މިހާރު ވަނީ ޝްރަދާ އާއި ސާރާއާ ވެސް ސުވާލުކޮށްފަ އެވެ. ބައެއް މީޑިއާތަކުން ބުނި ގޮތުގައި ޝްރަދާއާ ސުވާލުކުރީ ކްވާން ޓެލެންޓް އެޖެންސީގައި މަސައްކަތްކުރާ ޖާޔާ ސާއާ އެކު ޝްރަދާ ހިންގި ކަމަށް ބުނާ މަސްތުވާތަކެތީގެ މުއާމަލާތަކާ ގުޅިގެންނެވެ.
އެކްޓަރު ސުޝާންތު ސިންގް ރާޖްޕޫތުގެ މަރުގެ މައްސަލައިގެ ތަހުގީގުގެ ތެރެއިން މަސްތުވާތަކެތީގެ ބޮޑެތި މައްސަލަތަކެއް ފެންމަތިވެ ބަތަލާއިންތަކެއްގެ މައްސަލަ ބަލަން ފަށާފައިވާ އިރު އަންނަ ހަފުތާގެ ތެރޭގައި ބައެއް އެކްޓަރުންނާ ވެސް އެންސީބީން ސުވާލުކުރާނެ ކަމަށް މީޑިއާތަކުން ބުންޏެވެ. އޭގެ ތެރޭގައި ރިތިކް ރޯޝަނާއި ޝާހިދު ކަޕޫރާއި އަރުޖުން ރާމްޕާލް ފަދަ ތަރިން ހިމެނެ އެވެ.
