އަނޫރާގް ކެޝަޕްގެ "މަންމަރްޒިޔާ" ގެ ސީކްއަލްއެއް

އަހުމަދު އަދްޝަން، މިހާރު

25 އޮކްޓޯބަރ 2020 - 07:24

ދެހާސް އަށާރައިގައި ޑައިރެކްޓަރު އަނޫރާގް ކެޝަޕް ގެނެސްދިން ފިލްމު "މަންމަރްޒިޔާ" ގެ ސީކްއަލްއެއް ހަދަން ނިންމާފައިވާ ކަމަށް ރިޕޯޓްތައް ބުނެފި އެވެ.

އެ ފިލްމަކީ އަބީޝެކް ބައްޗަން އާއި ތާޕްސީ ޕައްނޫގެ އިތުރުން ވިކީ ކޯޝަލްއާ އެކު ގެނެސްދިން ރޮމޭންޓިކް ޑްރާމާއެކެވެ. ވިޔަފާރީގެ ގޮތުން އެހާއެހާ ކާމިޔާބު ފިލްމެއްގެ ގޮތުގައި ފާހަގަނުކުރެވުނަސް "މަންމަރްޒިޔާ" އަކީ ކޮންޓެންޓްގެ ގޮތުން ވަރުގަދަ އަދި ތަރިންގެ ފަރާތުން ވެސް މޮޅު އެކްޓިންއެއް ފެނުނު، ކްރިޓިކުންގެ ތައުރީފު ވަރަށް ބޮޑަށް ލިބުނު ފިލްމެކެވެ.

ލޯބީގެ ވާހަކައެއް ވަރަށް "ބޯލްޑްކޮށް" އަދި އެހާމެ ތަފާތު ގޮތަކަށް ގެނެސްދިން ފިލްމުގައި ކިޔައި ދިނީ ލޯބީގެ ގޮތުން ގުޅިގެން އުޅުނު ދެ މީހެއްގެ ކައިވެނި ފިރިހެން މީހާ (ވިކީ) ގެ އަމަލުތައް ހުންނަ ގޮތުން ނުކުރެވި، އާއިލާ އިން ދައްކާ މީހަކާ (އަބީޝެކް) އަންހެން މީހާ (ތާޕްސީ) ކައިވެނިކުރުމުން ދިމާވާ ހާދިސާތަކެވެ.

"މަންމަރްޒިޔާ" ގެ ސްކްރީންޕްލޭ ލިޔުނީ މިދިޔަ އަހަރު ރިލީޒްކުރި ކަންގަނާ ރަނާވަތުގެ "ޖަޖްމެންޓަލް ހޭ ކިޔާ" އާއި 2018 ގެ "ކޭދަރުނާތު" ފަދަ ފިލްމުތައް ލިޔުނު ކަނިކާ ދިލަން އެވެ. ތާޕްސީ މިހާރު ކުޅެމުން އަންނަ ފިލްމު "ހަސީން ދިލްރުބާ" އަކީ ވެސް ކަނިކާގެ ސްކްރީންޕްލޭއަކަށް ހަދާ ފިލްމެކެވެ.

ބޮލީވުޑް ހަންގާމާ އިން ބުނީ "މަންމަރްޒިޔާ" ގެ ސީކްއަލް އަށް އެ އެ ފިލްމުގެ ޓީމުން މިހާރު ތައްޔާރުވަމުން އަންނަ ކަމަށެވެ. އަދި ދެވަނަ ބައި ވެސް ގެނެސްދޭނީ ފުރަތަމަ ބައިގެ ލީޑް ކާސްޓާ އެކު ކަމަށް ބުންޏެވެ. ނަމަވެސް މިކަމާ ބެހޭ ގޮތުން އަނޫރާގް އަދި އެއްވެސް ވާހަކައެއް ނުދައްކަ އެވެ.

"މަންމަރްޒިޔާ" އަކީ އޭނާ އެންމެ ފަހުން ގެނެސްދިން ބޮޑު ސްކްރީން ފިލްމެވެ. އަނޫރާގް އެންމެ ފަހުން ގެނެސްދިން ފިލްމަކީ ނެޓްފްލިކްސް އިން ޖޫން މަހު ޕްރިމިއާކުރި ސަސްޕެންސް ޑްރާމާ "ޗޯކްޑް" އެވެ.