ކްރިސް ހެމްސްވޯތުގެ "ތޯ 4" ގެ ރޯލަކަށް މެޓް ޑޭމަން

އަހުމަދު އަދްޝަން، މިހާރު

20 ޖެނުއަރީ 2021 - 07:46

ކްރިސް ހެމްސްވޯތު ޓައިޓްލް ރޯލު ކުޅޭ މާވެލް ސްޓޫޑިއޯސްގެ ސުޕަހީރޯ ފްރެންޗައިޒް "ތޯ" ގެ ހަތަރު ވަނަ ފިލްމަށް، މަޝްހޫރު އެކްޓަރު މެޓް ޑޭމަން ސޮއިކޮށްފި އެވެ.

ކާމިޔާބު އެތައް ފިލްމެއް ކުޅެފައިވާ އެކްޓަރު "ތޯ: ލަވް އެންޑް ތަންޑާ" ގެ ކާސްޓާ ގުޅުމަކީ މި ސީރިޒްގައި އޭނާ ހިއްސާވާ ދެވަނަ ފަހަރެވެ. ދެހާސް ސަތާރައިގައި ގެނެސްދިން "ތޯ: ރެގްނަރޮކް" ގެ ހާއްސަ ފެނިލުމަކުން ވެސް ޑޭމަން ފެނިފައިވެ އެވެ.

"ތޯ: ލަވް އެންޑް ތަންޑާ" ގެ ޝޫޓިން މިހާރު އޮސްޓްރޭލިއާގައި ކުރިއަށްދާ އިރު ކާސްޓްގައި ކްރިސްޓިއަން ބޭލް އާއި ނަޓަލީ ޕޯޓްމަނާއި ކްރިސް ޕްރެޓާއި ޖެއިމީ އެލެގްޒެންޑާގެ އިތުރުން ޓެޒާ ތޮމްޕްސަން ފަދަ އޭ-ލިސްޓް ތަރިން ހިމެނެ އެވެ. ފިލްމުގެ ކްރޫއާ ގުޅުމުގެ ކުރިން ޑޭމަން މި ވަގުތު ހުރީ 14 ދުވަހުގެ ކަރަންޓީނުގަ އެވެ.

"ތޯ: ލަވް އެންޑް ތަންޑާ" އިން މީގެ ޑައިރެކްޓަރު ޓައިކާ ވައިޓިޓީ ވެސް ފެންނާނެ އެވެ.

ޑެޑްލައިނުން ބުނީ އާ ފިލްމުގެ ކާސްޓާ ޑޭމަން، 50، ގުޅުނު ނަމަވެސް އޭނާގެ ރޯލާ ބެހޭ އެއްވެސް ތަފުސީލެއް އަދި ނުލިބޭނެ ކަމަށެވެ. އެހެންވެ އޭނާ ފެންނާނީ ކެމިއޯއަކުންތޯ ނުވަތަ ފިލްމުގެ ބޮޑު ރޯލަކުންތޯ ކަށަވަރުނުވާ ކަމަށް ބުންޏެވެ.

"ތޯ: ލަވް އެންޑް ތަންޑާ" ސިނަމާތަކަށް އަންނާނީ އަންނަ އަހަރުގެ ފެބްރުއަރީ 11 ގަ އެވެ. މި ސީރީޒްގެ ފުރަތަމަ ފިލްމު ރިލީޒްކުރީ 2011 ގަ އެވެ. އަދި ދެވަނަ ބައި "ތޯ: ދަ ޑާކް ވޯލްޑް" ގެނެސްދިނީ 2013 ގަ އެވެ.