"އަނޫޕަމާ"ގެ ހަޔާތަށް ރާމް ކަޕޫރް؟

އިންޑިއާގެ އެއް ވަނަ ސިލްސިލާގެ މަގާމުގައި މިހާރު އޮތް ސްޓާ ޕްލަަސްގެ "އަނޫޕަމާ" އަށް ވަރަށް ބޮޑު ޓްވިސްޓެއް އަންނަން އުޅޭ ކަމަށާއި އެގޮތުން އަނޫޕަމާގެ ހަޔާތަށް އާ ބައިވެރިއަކު އަންނާނެ ކަމަށް ރިޕޯޓްތައް ބުނެފި އެވެ.

މިދިޔަ އަހަރުން ފެށިގެން ދައްކަމުން އަންނަ "އަނޫޕަމާ" އަކީ ބޭވަފާތެރި ފިރިއެއްގެ ސަބަބުން ގެވެހި އަންބެއްގެ ހަޔާތަށް އަންނަ ހިތްދަތި ކަންތައްތަކެއް ފެނިގެންދާ ސިލްސިލާއެކެވެ. މީގެ ޓައިޓްލް ރޯލު ރުޕާލީ ގަންގޫލީ ކުޅޭ އިރު އޭނާގެ ފިރިމީހާ އަދި ތިން ކުދިންގެ ބައްޕަގެ ވަންރާޖް ޝާހްގެ ކެރެކްޓާ ކުޅެނީ ސުދާންޝޫ ޕާންޑޭ އެވެ.

"އަނޫޕަމާ" ގެ ވާހަކަ މިހާރު ގޮސްފައި އޮތް ހިސާބަލަށް އިރު ދެމަފިރިންގެ ވަރީގެ މައްސަލަ ކޯޓްގައި އޮތް އިރު، ވަންރާޖް ހިތާވެގެން އުޅޭ ކާވިއާ މިހާރު އުޅެނީ އަނޫޕަމާމެންގެ އަވަށްޓެރިއެއްގެ ގޮތުގަ އެވެ. އޭނާ ކުރިން އުޅުނު އެޕާޓްމަންޓްގެ ތެރޭގައި ޖިންސީ ގޯނާގެ ހާދިސާއަކާ ކުރިމަތިލާން ޖެހުމުން ވަންރާޖްގެ ގެއަށް ގެންދިޔަ އެވެ. އެކަމަކު މުޅި އާއިލާ ވެސް ނުރުހިފައި ތިއްބައި ކާވިއާ އަށް އެ ގެއިން ނުކުންނަން މަޖުބޫރުވީ ވަންރާޖާއި އަނޫޕަމާގެ ހަގު ދަރިފުޅު އަދި ހަމައެކަނި އަންހެން ދަރިފުޅު ޕާކީ ހޮސްޓެލްގައި ހުރެފައި އައި އިރު ގޭގައި ކާވިއާ އުޅޭކަން އެނގުމުން ޖެއްސި މައްސަލަތަކާ ގުޅިގެންނެވެ.

ކާވިއާ މިހާރު އެންމެ ބޮޑަށް ދެކޭ ހުވަފެނަކީ ވީހާ ވެސް އަވަހަކަށް ވަންރާޖާ ކައިވެނިކޮށް، އޭނާގެ އާއިލާ ގެއިން ވެސް ނެރެ މުޅި އާއިލާ ބަރުބާދުކޮށްލުމަށެވެ. "އަނޫޕަމާ" ގެ ވާހަކަ މިހާރު ގޮސްފައި އޮތް ހިސާބުން އަނޫޕަމާ ވަރަށް އަވަހަށް ވަންރާޖްގެ ދެ ދޫކޮށް ދާނެ އެވެ. އަދި އޭނާގެ ތިން ކުދިންގެ ތެރެއިން މެދަށް ހުރި ފިރިހެން ދަރިފުޅު އަދި އަނޫޕަމާ ދެކެ އެންމެ ލޯބިވާ ސަމަރު ދާނެ އެވެ. ސަމަރު އާއި އޭނާގެ ލޯބިވެރިޔާ ނަންދިނީ މި ވަގުތު މަސައްކަތްކުރަމުން އަންނަނީ އަނޫޕަމާގެ ޑާންސް އެކެޑެމީ ހުޅުވައި ދިނުމަށެވެ.

ނަންދިނީ އަކީ ސަމަރުގެ ބައްޕަގެ ލޯބިވެރިޔާ ކާވިއާގެ ދައްތައެއްގެ ދަރިއެކެވެ. ރޫޅިފައިވާ އާއިލާއަކަށް ނިސްބަތްވާ ނަންދިނީގެ އާއިލާ އެމެރިކާގައި އުޅޭ އިރު އޭނާ އިންޑިއާގައި ދިރިއުޅެނީ އެކަނި ގެއެއްގައި އަނޫޕަމާމެންގެ އަވަށްޓެރިއެއްގެ ގޮތުގަ އެވެ.

މީޑިއާތަކުން ރިޕޯޓްކޮށްފައިވާ ގޮތުގައި "އަނޫޕަމާ" އަންނަން އުޅޭ ބޮޑު ޓްވިސްޓް މާ ލަސްތަކެއް ނުވެ ފެންނާނެ އެވެ. އަދި އެއީ އަނޫޕަމާގެ ޑާންސް އެކެޑެމީގެ މަސައްކަތްތަކާ ވެސް ގުޅުވައިގެންނެވެ. އެގޮތުން އަނޫޕަމާ ސްކޫލްގައި އުޅުނު ދުވަސްވަރު އޭނާ އަށް ހިތްކިޔައިގެން އުޅުނު މީހަކު އަނޫޕަމާގެ ހަޔާތަށް އަންނާނެ އެވެ. އެއީ އަނޫޖް އެވެ.

އެ ކެރެކްޓާ އިން ފެންނާނެ ކަމަށް މީޑިއާތަކުން ބުނަނީ އިންޑިއާގެ އެންމެ މަޝްހޫރު ޓީވީ ތަރިންގެ ތެރޭގައި ހިމެނޭ ރާމް ކަޕޫރެވެ. އޭނާ އަކީ މިހާތަނަށް ވަރަށް ކާމިޔާބު އެތައް ސިލްސިލާއެއް ކުޅެފައިވާ މީހެކެވެ. އޭގެ ތެރޭގައި "ބަޅޭ އައްޗޭ ލަގްތޭ ހޭ" އާއި "ގަސަމް ސޭ" އަދި "ގަރު އޭކް މަންދިރު" ހިމެނެ އެވެ.

"އަނޫޕަމާ" އަށް ރާމް އަންނަން އުޅޭ ވާހަކަ މީޑިއާތަކުގައި ދެކެވުނަސް އަދި މިކަން ކަށަވަރެއް ނުވެ އެވެ. ސްޓާ ޕްލަސްގެ ޕްރޮމޯއަކުން ވެސް ރާމް އަންނަން އުޅޭކަމުގެ އިޝާރާތެއް ނުލިބެ އެވެެ. އެކަމަކު ކުރިއަށް ހުރި އެޕިސޯޑްތަކުން ސިލްސިލާ އަށް އާ ކެރެކްޓާއެއް އިތުރުވާކަން އެނގިގެން ދާނެ އެވެ.

އަނޫޕަމާގެ ހަޔާތަށް އެހެން ބައިވެރިޔަކު އައުމަކީ ސިލްސިލާގެ ވާހަކަ އިތުރަށް ޝައުގުވެރިވެގެން ދާނެ ކަމެކެވެ. ފާހަގަކޮށްލަން ޖެހޭ ކަމަކީ ވަންރާޖްގެ ގާތުން ވަރިވާން އަނޫޕަމާ ނިންމި ފަހުން، ވަންރާޖް ސުލްހަވާން ބޭނުންވެ، އެތައް ފަހަރަކު މާފަށް ވެސް އެދިފައިވާ ކަމެވެ.

ނަމަވެސް ވަންރާޖާއި ކާވިއާ ސިއްރުކޮށްގެން އުޅުނު ލޯބީގެ ގުޅުން އަނޫޕަމާ އަށް ފަޅާއެރީ އޭނާގެ ކޮޓަރީގެ އެނދުމަތިން ކަމަށްވާތީ، އޭނާ ހުރީ ދެން އަލުން ވަންރާޖް ފިރިއެއްގެ ގޮތުގައި ބަލައިގަންނަ ގޮތަކަށް ނޫނެވެ. އެކަމަކު އަބަދު ވެސް އަނޫމަޕާ ދަރިންގެ ގޮތުގައި ބުނާ ވާހަކަ އަކީ އެ ދެ މީހުން ވަކިވިޔަސް ދަރިންގެ ކަންކަމުގައި އަބަދުވެސް ވަންރާޖާ އެކު ކުރަން ޖެހުނު ކަމެއް ވިއްޔާ ކުރާނެ ކަމަށެވެ.

މިދިޔަ އަހަރުގެ ޖުލައި 13 ގައި ދައްކަން ފެށި "އަނޫޕަމާ" ގެ 200 އަށް ވުރެ ގިނަ އެޕިސޯޑް މިހާތަނަށް ގެނެސްދީފައިވާ އިރު، އެ ސިލްސިލާ އޮތީ ދައްކަން ފެށި ފަހުން އިންޑިއާގެ އެންމެ މަގުބޫލު ސިލްސިލާގެ ގޮތުގަ އެވެ.