"ހަތުރޯން ކޭ ކިލާޅީ 11" ބައިވެރިން ކަށަވަރުވެއްޖެ

ކަލާޒް ޗެނެލްގެ ސްޓަންޓް ރިއަލިޓީ ޝޯ "ހަތުރޯން ކޭ ކިލާޅީ" ގެ 11 ވަނަ ސީޒަންގެ ބައިވެރިން ކަށަވަރުވެއްޖެ އެވެ.

ރަސްމީކޮށް އަދި ޝޯ ލޯންޗް ނުކުރި ނަމަވެސް މި ފަހަރުގެ ސީޒަންގައި ވާދަކުރާ 12 ބައިވެރިން ކަށަވަރުވެ، އޭގެ ތެރެއިން ބައެއް ބައިވެރިން ވަނީ އެ މީހުން ޝޯގައި ވާދަކުރާކަން ސޯޝަލް މީޑިއާގައި ވެސް ހާމަކޮށްފަ އެވެ. ކުރިން ވެސް އަޑު އަރާފައިވާ ގޮތަށް 11 ވަނަ ސީޒަންގައި ވާދަކުރާ ބައިވެރިންގެ ތެރޭގައި އެންމެ ފަހުން ގެނެސްދިން "ބިގް ބޮސް 14" ގެ ތިން ބައިވެރިޔަކު ހިމެނެ އެވެ.

އެއީ ޝޯގެ ދެވަނަ ލިބުނު ލަވަކިޔުންތެރިޔާ ރާހުލް ވައިދިއާ އާއި ތިން ވަނަ އަށް ދިޔަ ބަތަލާ ނިކީ ތަމްބޯލީގެ އިތުރުން ޝޯ ކާމިޔާބުކުރި ބަތަލާ ރުބީނާ ދިލައިކްގެ ފިރިމީހާ އެކްޓަރު އަބީނާވް ޝުކްލާ އެވެ.

"ހަތުރޯން ކޭ ކިލާޅީ 11" ގެ ބައިވެރިންގެ ތެރޭގައި ދެން ހިމެނީ "ބިގް ބޮސް 13" ގައި ވާދަކުރި ވިޝާލް އަދިތިޔާ ސިންގް އާއި މަޝްހޫރު ޓީވީ ތަރިން ކަމަށްވާ އަރުޖުން ބިޖްލާނީ އާއި ދިވްޔަންކާ ތުރިޕަތީ އާއި ޓީވީ އެކްޓަރު ސޯރަބް ޖެއިން އާއި ޓީވީ ބަތަލާ އަނުޝްކާ ސެން އާއި ލަވަކިޔުންތެރިޔާ އާސްތާ ގިލް އާއި "ބިގް ބޮސް 5" ގެ ދެވަނަ އަށް ދިޔަ ބަތަލާ މަހެކް ޗާހަލް އާއި އެމްޓީވީގެ "ރޯޑީޒް" އިން ވިދައިލި ވަރުން ސޫދާއި ބަތަކާ ސަނާ މަކްބޫލެވެ.

މީޑިއާތަކުން ބުނި ގޮތުގައި މަޝްހޫރު ޑައިރެކްޓަރު ރޯހިތު ޝެޓީ ހޯސްޓްކުރާ "ހަތުރޯން ކޭ ކިލާޅީ" މި ފަހަރު ޝޫޓްކުރާނީ ދެކުނު އެފްރިކާގެ ކޭޕް ޓައުންގަ އެވެ. އަދި ބައިވެރިން މި ހަފުތާގައި އެ ގައުމަށް ފުރާނެ އެވެ.

"ހަތުރޯން ކޭ ކިލާޅީ" ކޮންމެ ފަހަރު ވެސް ގެނެސްދެނީ ބޭރު ކޮންމެ ވެސް ގައުމަކުންނެވެ. އެގޮތުން މިހާތަނަށް ސައުތު އެފްރިކާގައި ޝޫޓްކޮށްގެން ފަސް ސީޒަން ގެނެސްދީފައިވާ އިރު ސީޒަން 10 ގެނެސްދިނީ ބަލްގޭރިއާއިންނެވެ.

އެ ސީޒަން ކާމިޔާބުކުރީ ބަތަލާ ކަރިޝްމާ ތައްނާ އެވެ.

"ހަތުރޯން ކޭ ކިލާޅީ" އަކީ އެމެރިކާގެ ޝޯ "ފިއާ ފެކްޓާ" ގެ އިންޑިއާގެ ވާޝަނެވެ. މި ޝޯ އެ ގައުމުން ގެނެސްދެނީ 2008 އިން ފެށިގެންނެވެ. "ހަތުރޯން ކޭ ކިލާޅީ" އިންޑިއާގެ އެންމެ ކާމިޔާބު ޓީވީ ޝޯތަކުގެ ތެރޭގައި ހިމެނޭ ޝޯއެކެވެ.

"ހަތުރޯން ކޭ ކިލާޅީ 11" ބެލުންތެރިންނަށް ގެނެސްދޭން ފަށާނީ މި އަހަރުގެ ފަހުކޮޅު ނުވަތަ އަންނަ އަހަރުގެ ކުރީކޮޅު ކަމަށް ބެލެވެ އެވެ.