ބަތަލާ ޔާމީ އަށް މަނީ ލޯންޑަރިންގެ ތުހުމަތު

ބޭރު ފައިސާ މާރުކުރުމުގައި މަނީ ލޯންޑަރިންގެ އަމަލުތަކެއް ހިންގާފައިވާ ކަމަށް ބެލެވޭ މައްސަލައެއްގެ ތަހުގީގެއްގެ ތެރެއިން ބޮލީވުޑްގެ ބަތަލާ ޔާމީ ގޯތަމްއާ އިންޑިއާގެ އެންފޯސްމަންޓް ޑިިރެކްޓަރޭޓް (އީޑީ) އިން ހުކުރު ދުވަހު ސުވާލުކޮށްފި އެވެ.

މީޑިއާތަކުން ބުނީ މިއީ މިދިޔަ މަހު ޑައިރެކްޓަރު އަދިތިޔާ ދާރްއާ ކައިވެނިކުރި ބަތަލާއާ މި މައްސަލާގައި ސުވާލުކުރުމަށް ފަހު ތަހުގީގަށް އިތުރު ބަޔާނެއްދޭން މި މަހުގެ 7 ގައި އީޑީ އަށް ހާޒިރުވާން ވެސް އަންގާފައި ކަމަށެވެ.

ޔާމީއާ ސުވާލުކުރި މަނީ ލޯންޑަރިންގެ މައްސަލަ އަކީ ބޭރު ފައިސާ މާރުކުރުމުގައި ހިންގާފައިވާ ކަމަށް ބެލެވޭ 1.5 ކްރޯޑް ރުޕީސްގެ މައްސަލައެކެވެ. އަދި މިކަމުގައި ޔާމީއާ ގުޅުންތަކެއް އޮތް ކަމަށް ބެލެވުނީ އޭނާގެ އެ ކައުންޓުން ފައިސާގެ މުއާމަލާތްތަކެއްކޮށް، އެކަމާ ބެހޭ ގޮތުން ހުށަހަޅަން ޖެހޭ ލިޔެކިޔުންތައް ކަމާބެހޭ ފަރާތްތަކަށް ހުށަހަޅާފައި ނުވާތީ އެވެ.

މި މައްސަލާގައި ބޮލީވުޑްގެ އިތުރު ބައެއްގެ ބައިވެރިވުން ވެސް އޮތް ކަމަށް ބެލެވޭތީ ވަރަށް ސީރިއަސް މައްސަލައެއްގެ ގޮތުގައި އީޑީން އަންނަނީ އެކަން ބަލަމުންނެވެ.

މި ފަހުން ބޮލީވުޑްގެ ތަރިންތަކެއްގެ އަހުލާގީ މައްސަލަތަކެއް ރާޑަރަށް އަރައި ތަހުގީގަށް ކަމާބެހޭ އިދާރާތަކށް ހާޒިރުކުރީ ޖޫން 14، 2020 ގައި އެކްޓަރު ސުޝާންތު ސިންގް ރާޖްޕޫތު މަރާ ގުޅިގެން ފެންމަތިވި މަސްތުވާތަކެތީގެ ތުހުމަތުތަކާ އެކީގަ އެވެ. އޭރު މަޝްހޫރު ތަރިން ކަމަށްވާ ދީޕިކާ ޕަދްކޯނާއި ސާރާ އަލީ ޚާނާއި ޝްރަދާ ކަޕޫރާއި އަރުޖުން ރާމްޕާލް އެފަދަ އެތައް ބަޔަކު ސެންޓްރަލް ބިއުރޯ އޮފް އިންވެސްޓިގޭޝަން (ސީބީއައި) އަށް ހާޒިރުކޮށް ބަޔާން ނަގާފައިވެ އެވެ.