ބޮލީވުޑްގެ އާ ލޯބިވެރިންނަކީ ރަކުލް އާއި ޖެކީ

އެކްޓަރެއްގެ ގޮތުގައި މާ ބޮޑު ކުރިއެރުމެއް ނުލިބުމުން މިހާރު ޕްރޮޑިއުސަރެއްގެ ޒިންމާ ނަގަމުން އަންނަ ޖެކީ ބަގްނާނީ އާއި ބަތަލާ ރަކުލް ޕްރީތު ސިންގް ލޯބީގެ ގޮތުން ގުޅިގެން އުޅޭކަން ކަށަވަރުކޮށް ދީފި އެވެ.

ބޮލީވުޑްގައި މިހާރު ވަރަށް ބޮޑު ޑިމާންޑެއް އޮތް އަދި އިންޑިއާގެ ދެކުނުގެ ފިލްމުތައް ވެސް ކުޅޭ ޒުވާން ބަތަލާ އާއި ޖެކީ ރައްޓެހިވެގެން އުޅޭކަން އާދީއްތަ ދުވަހު އިސްޓަގްރާމްގައި އިއުލާންކުރީ ރަކުލްގެ 31 ވަނަ އުފަން ދުވަހާ ވެސް ގުޅުވައިގެންނެވެ.

ދެ މީހުން އެކީގައި ފުރަގަހުން ފެންނަ ފޮޓޯއެއް އެ މީހުންގެ އިންސްޓްގަރާމްގައި ޕޯސްޓް ކޮށްފައިވެ އެވެ. އޭގައި ރަކުލް ބުނީ އޭނާގެ ހަޔާތަށް ޖެކީ އައުމުން ހަޔާތުގެ ކުލަތައް މިހާރު އިތުރަށް ޗާލުވެއްޖެ ކަމަށާއި މި އަހަރު ލިބުނު އެންމެ ބޮޑު ހަދިޔާ އަކީ ވެސް ޖެކީ، 36، ކަމަށެވެ.

ޖެކީގެ ޕޯސްޓްގައި ބުނީ މިހާރު ރަކުލްއާ ނުލައި އެންމެ ދުވަހެއް ފުރިހަމަ ނުވާ ކަމަށާއި އަދި ކިތަންމެ މީރު އެއްޗެއް ކެޔަސް، ރަކުލްއާ ނުލައި މިހާރު އެކަމުން އުފަލެއް ވެސް ނުލިބޭ ކަމަށެވެ.

ޖެކީއާ ރައްޓެހިވެގެން އުޅޭކަން ރަކުލް ކަށަވަރުކޮށް ދީފައި މި ވަނީ ޖެކީގެ އާއިލީ ފިލްމު ކުންފުނި ޕޫޖާ އެންޓަޓައިންމަންޓަށް އޭނާ ސޮއިކޮށް ކުޅުނު އަކްޝޭ ކުމާރުގެ "ސިންޑްރެއްލާ" ގެ ޝޫޓިން މި ހަފުތާގައި ނިންމާލިކަން ވެސް އިއުލާންކޮށްފައި ވަނިކޮށެވެ.

ޖެކީ އަކީ މަޝްހޫރު ޕްރޮޑިއުސަރު ވާޝޫ ބަގްނާނީގެ ދަރިއެކެވެ. އޭނާ އެކްޓަރެއްގެ ގޮތުގައި ނުކުތީ 2009 ގެ "ކަލް ކިސްނޭ ދޭކާ" އިންނެވެ. އޭގެ ފަހުން ޖެކީ ކުޅުނު ފިލްމުތަކުގެ ތެރޭގައި ފާލްތޫ (2011)، އަޖަބް ގަޒަބު ލަވް (2012)، ޔަންގިސްތާން (2014)، ވެލްކަމް ޓު ކަރާޗީ (2015) އަދި މިތުރޯން (2018) ހިމެނެ އެވެ.

ޖެކީ ކުރިން ލޯބީގެ ގުޅުމެއް ބޭއްވި ކަމަށް އަޑުއެރި ބަތަލާ އަކީ ބޫމީ ޕިޑްނޭކަރެވެ.

މި އަހަރުގެ މެދުތެރޭގައި ޖެކީގެ މައްޗަށް ޖިންސީގެ ގޯނާގެ ތުހުމަތެއް ކުރެވުނު ނަމަވެސް، ފަހުން އެކަމާ ބެހޭ އެއްވެސް ވާހަކައެއް ނުދެކެވެ އެވެ.