ސްވައިން ފްލޫ އާއި އާންމު ރޯގާގެ ތަފާތު

އާދައިގެ އަރިދަފުސް ރޯގާ އާއި ސްވައިން ފްލޫ ނުވަތަ އެޗް1އެން1ގެ އަލާމާތްތައް ވަރަށް އެއްގޮތެވެ. އެހެންވެ ބަލީގެ އަލާމާތްތަކަށް ބަލައިގެން ބަލި ދެނެގަތުމަކީ ވަރަށް އުނދަގޫ ކަމެކެވެ. މިއީ އާދައިގެ އަރިދަފުސް ރޯގާ އާއި ސްވައިން ފްލޫގެ ތަފާތާ ބެހޭ ގޮތުން ޔުނިވަސިޓީ އޮފް ވޮޝިންޓަނުން އާންމުކޮށްފައިވާ މައުލޫމާތެވެ. އެކަމަކު އެ ޔުނިވަސިޓީން ވަނީ މިއީ ބަލި ޑައިގްނޯޒް ކުރުމުގެ މިންގަނޑުތަކެއްގެ ގޮތުގައި ނުބެލުމަށް އެދިފަ އެވެ. މިއީ ބަލީގެ އަސްލަކީ ކޮބައިކަން ވީހާވެސް އަވަހަކަށް ދެނެގަތުމުގެ އެހީއެކެވެ.

އާދައިގެ އަރިދަފުސް ރޯގާ ޖެހުމުން ހުން އައުމާއި ކެއްސުމާއި ގައިގައި ރިއްސުމާއި ނޭފަތް ބެދުމާއި ވަރުދެރަވުމާއި ކިނބިއެޅުމާއި ބޮލާއި ކަރުގައި ރިއްސުން އަދި މެޔަށް އުނދަގޫވުން އެކި މީހުންނަށް އެކި މިންވަރަށް ކުރިމަތިވެ އެވެ. އެކަމަކު ސްވައިން ފްލޫގައި މި އަލާމާތްތައް ފެނުމުގައި ތަފާތުކަމެއް ހުރެދާނެ އެވެ. އެކަމަކު ހަމަ ދާދި އެއްގޮތެވެ.

ކޮންމެ ރޯގާއަކުން ވެސް، ކުޑަކުދިންނާއި އުމުރުން ދުވަސްވީ މީހުންނާއި ދާއިމީކޮށް ފަރުވާ ހޯދަންޖެހޭ ބަލިތަކުގައި އުޅޭ މީހުންނާއި ދިފާއީ ނިޒާމު ބަލިކަށި މީހުންނަށް ނުރައްކާވެ އެވެ. އަދި ހާއްސަކޮށް، އެޗް1އެން1 ގައި މި ގިންތީގެ މީހުންނަށް އޮންނަ ނުރައްކާ ބޮޑެވެ. އެހެންވެ ބަލީގެ އަލާމާތްތަކަށް ޝައްކު ކުރެވޭ ނަމަ ޑޮކްޓަރަށް ދައްކައިގެން ފަރުވާ ހޯދާށެވެ.

މިއީ ވެސް ޑޮކްޓަރަށް ނުގޮސް ބަލި ދެނެގަތުމަށް ދޭ އިރުޝާދެއް ނޫންކަން ހަނދާންކުރާށެވެ.