އެކަނި ކަސްރަތުކުރަން ނޫޅެ ގްރޫޕެއް ހޯދާ!

އެހެން ބަޔަކާ އެކު ގްރޫޕެއްގައި ކަސްރަތުކުރުމަކީ އެކަނި ކަސްރަތުކުރުމަށް ވުރެ ޖިސްމާނީގޮތުންނާއި ނަފްސާނީގޮތުން ވެސް ސިއްހަތަށް މާ ފައިދާހުރި ގޮތެއް ކަމަށް އާ ދިރާސާއެއްގައި ބުނެފި އެވެ.

ދިރާސާވެރިންނަށް އެނގުނު ގޮތުގައި ގްރޫޕެއްގައި ކަސްރަތުކުރުމުން ސްޓްރެސް 26 ޕަސެންޓް ކުޑަވެ، ދިރިއުޅުމުގެ ފެންވަރު ރަނގަޅުވެ އެވެ.

އެކަނި ކަސްރަތުކުރާ މީހުން އެކަމަށް ކުރާ މަސައްކަތް މާ ބޮޑަސް، އެ މީހުންގެ ސްޓްރެސް އާއި ފިޓްނެސް ލެވެލް އަށް މާ ބޮޑު ބަދަލެއް ނާންނަކަން ދިރާސާ އިން އެނގުނެވެ.

ޔުނިވާސިޓީ އޮފް ނިއު އިންގްލެންޑް ކޮލެޖު އޮފް އޮސްޓިއޯޕެތިކް މެޑިސިންގެ މި ދިރާސާގައި އިސްކޮށް ހުންނެވި ޑރ. ޑޭނާ ޔޯކްސް ވިދާޅުވިގޮތުގައި ރައްޓެހިންނާއި އެކުގައި މަސައްކަތްކުރާ މީހުންނާ އެކު، އެކަކު އަނެކަކަށް ހިތްވަރުދެމުން، އުނދަގޫ ކަމެއް ކުރުމުގެ އިޖުތިމާއީ ފައިދާ ބޮޑެވެ. އެހެންކަމުން ކަސްރަތުން ލިބޭ ފައިދާގެ އިތުރުން ވެސް ފައިދާތަކެއް ލިބޭކަން އޭނާ ފާހަގަކުރެއްވި އެވެ.

ޔޯކްސް ވިދާޅުވިގޮތުގައި މިއީ ސިއްހަތާ މެދު ނަފްސާނީ، ޖިސްމާނީ އަދި އިހުސާސްތަކުގެ ނަޒަރުން ބެލުމުގެ މުހިއްމުކަން އިތުރަށް އަންގައިދޭ ދިރާސާއެކެވެ.

ޖާނަލް އޮފް ދި އެމެރިކަން އޮސްޓިއޯޕަތިކް އެސޯސިއޭޝަންގައި ޝާއިއުކޮށްފައިވާ މި ދިރާސާގައި ބައިވެރިކޮށްފައި ވަނީ ސްޓްރެސް ލެވެލް މަތި އަދި އަމިއްލަ ދިރިއުޅުމާއި މަސައްކަތް ބެލެންސްކުރެވޭ ވަރު ދަށް، 69 މެޑިކަލް ދަރިވަރުންނެވެ. ބާރަ ހަފްތާގެ ކަސްރަތު ޕްރޮގްރާމެއް އަމިއްލަ އަށް އިޚްތިޔާރުކޮށްގެން ގްރޫޕެއްގައި ނުވަތަ އެކަނި ކަސްރަތުކުރުމުގެ ފުރުސަތު އެ މީހުންނަށް ދިނެވެ.

ގްރޫޕެއްގައި ކަސްރަތުކުރި ދަރިވަރުންނަށް ވަނީ ދިރިއުޅުމުގެ ފެންވަރު ވަޒަންކުރާ ތިން ދާއިރާ އިން ވެސް ކުރިއެރުން ލިބިފަ އެވެ. އެއީ ނަފްސާނީ ދުޅަހެޔޮކަން 12 ޕަސެންޓް އިތުރުވުމާއި ފިޒިކަލް ފިޓްނެސް 24 ޕަސެންޓް ރަނގަޅުވުން އަދި އިހުސާސްތައް ހަމައަކަށް އެޅުވޭ މިންވަރު 26 ޕަސެންޓް ރަނގަޅުވުމެވެ. އޭގެ އިތުރުން ސްޓްރެސް ހުރި ކަމަށް ގަބޫލުކުރެވޭ މިންވަރު 26 ޕަސެންޓް ދަށަށް ދިޔުން ވެސް ހިމެނެ އެވެ.

އެއާ ޚިލާފަށް، އެކަނި ކަސްރަތު ކުރި ދަރިވަރުންނަށް އެކަށީގެންވާ ކުރިއެރުމެއް ލިބުނީ އެންމެ ކަމަކުންނެވެ. އެއީ ނަފްސާނީ ދުޅަހެޔޮކަން 11 ޕަސެންޓް އިތުރުވުމެވެ.