"މީ ޓޫ" މޫވްމަންޓުން ހިތްވަރު ލިބިއްޖެ: މޮނިކާ ލްވިންސްކީ

މިދިޔަ އަހަރުގެ ފަހުކޮޅު ހޮލީވުޑްގައި ހުޅުފަޅައިގެން ދިޔައީ ޖިންސީ ފުރައްސާރަތަކާއި ގޯނާތަކުގެ ވާހަކަތަކާ އެކުގަ އެވެ. ހާއްސަކޮށް، ނުފޫޒު ގަދަ ޕްރޮޑިއުސަރު ހާވީ ވެއިންސްޓީން ބިތުފަންގި ނެގިގެން ދިޔަ އިރު، އެތައް ބަޔަކު ނުކުމެ ވަނީ އެ މީހުންނަށް ކުރަން ޖެހުނު ހިތްދަތި ތަޖުރިބާތައް ވެސް ކިޔައިދީފަ އެވެ. މީގެ ތެރޭގައި މަޝްހޫރު ގިނަ ފަންނާނުން ވެސް ހިމެނެ އެވެ.

މި މައްސަލަތަކާ އެކު ޝިކާރަކައަކަށްވި މީހުންނަށް ގާނޫނީ ގޮތުންނާއި މާލީ ގޮތުންނާއި އަދި ނަފުސާނީ ގޮތުން ވެސް އެހީތެރިކަން ފޯރުކޮށް ދިނުމަށް ފެށި "މީ ޓޫ" މޫވްމަންޓަކީ ޝިކާރައަކަށްވި ވަރަށް ގިނަ ބަޔަކަށް ލިބުނު ހިތްވަރެކެވެ.

އެއިން ހިތްވަރު ހޯދައިގެން މި ފަހަރު ވާހަކަ ދެއްކި މަޝްހޫރު މީހަކީ މޮނިކާ ލުވިންސްކީ އެވެ. ލްވިންސްކީ، 44، އަކީ އެމެރިކާގެ ކުރީގެ ރައީސް ބިލް ކްލިންޓަނާ އެކު، ލޯބީގެ ގުޅުމެއް ބޭއްވިކަން ފަޅާ އަރައިގެން އެތައް ބައެއްގެ ސަމާލުކަން ހުއްޓުނު، ވައިޓް ހައުސްގެ އިންޓާންއެކެވެ.

ކްލިންޓަނާއި ލްވިންސްކީގެ ގުޅުން 1995-1997 އާ ހަމައަށް ދެމިގެން ދިޔަ އިރު، ލްވިންސްއަކީ އޭރު އުމުރުން އެންމެ 22 އަހަރުގެ ޒުވާނެކެވެ. ކްލިންޓަނަށް ވުރެ 27 އަހަރު ހަގެވެ. ކްލިންޓަނަށް އޭރު 49 އަހަރެވެ.

އެ ގުޅުމުގެ ސިއްރުތައް ފަޅާއަރައި، އެތަކެއް މައްސަލަތަކެއް ފެންމަތިއިރު، ލްވިންސްކީ ވަނީ ސީޔާސީ ހަޑީގެ ތެރޭގައި ހަރާބުވެފަ އެވެ.

އެ ވާހަކަތައް މިހާރު އޭނާ ދައްކަނީ "މީ ޓޫ" މޫވްމަންޓުން ހިތްވަރު ލިބިގެންނެވެ. ކްލިންޓަނާ ބެހޭ ގޮތުން ލޯޔަރު ކެނެތު ސްޓާ ކުރިއަށް ގެންދިޔަ ބޮޑު ތަހުގީގަށް 20 އަހަރު ފުރުމާ ދިމާކޮށް ލްވިންސްކީ މަޝްހޫރު މަޖައްލާ ވެނިޓީ ފެއާގައި ލިޔުނު މަޒޫމުނެއްގައި ވަނީ ބައެއް ވާހަކަތައް ހިއްސާކޮށްފަ އެވެ.

އޭނާ ބުނީ މިހާތަނަށް ހުރީ "ހަޔާތުގައި ތަޖުރިބާ ކުރަން ޖެހުނު ކަންތައްތަކުން އެކަނިވެރިވެ، އެކަހެރިވެފައި" ކަމަށެވެ.

"ނަމަވެސް މީ ޓޫ މޫވްމަންޓަކީ އަހަރެން ކަހަލަ މީހުންނަށް ކުރިއަށް ފިޔަވަޅު އަޅަން ލިބުނު ހިތްވަރެއް. ހިތްދަތިކަމުން އަރައި ގަންނަން ލިބުނު ފުރުސަތެއް،" މިހާރު އުމުރުން 71 އަހަރުގެ ކްލިންޓަނާ އެކު ބޭއްވުނު ނަހަމަ ގުޅުމަށް އިޝާރާތް ލްވިންސްކީ ބުންޏެވެ. "އަހަރެން އެއްބަސްވަން އަހަންނާއި ކްލިންޓަނާ ދޭތެރޭ ނަހަމަ ގުޅުންތަކެއް ހިނގިކަން. އެކަމަކު އެއީ އަހަރެންގެ އެކަނި މައްސަލައަކުންވީ ކަމެއް ނޫން."

އަދިވެސް ހުސްހަށިބަޔަށް ހުރި ލްވިންސްކީ ބުނީ ނުފޫޒުގަދަ ފިރިހެނުންގެ ވަކިތަކުގެ ދަށުގައި އަންހެނުން ތިބެން ނުޖެހޭކަން މިހާރު ގަބޫލުކުރާ ކަމަށާއި އަމިއްލަ ދިފާއުގަ އާއި އެހެން މީހުންގެ ހައްގުގައި ވެސް އަޑު އުފުލުމުގެ ހިތްވަރު އަންހެނުން ހުންނަން ޖެހޭ ކަމަށެވެ.

"އަހަރެން ވަރަށް އުފާ ކުރަން އަންހެނުން މިހާރު ފާޅުގައި ނުކުމެ އެކި ކަހަލަ ފުރައްސާރަތަކާ ދެކޮޅަށް އަޑު އުފުލާތީ. އަދި އެގޮތުގައި ދެމި ތިބެން ވެސް ޖެހޭ. ހަމަ ހަގީތޫގައި ވެސް މީ ޓޫ މޫވްމަންޓަކީ އަހަންނަށް ވަރަށް ބޮޑު ހިތްވަރެއް،" އޭނާ ބުންޏެވެ. "މީ ޓޫ ކަހަލަ އިސްނެގުންތަކުން އަންހެނުންގެ އަޑު ކަޑުވައެއް ނުލެވޭނެ."