މައުންޓް އެވަރެސްޓް ވެސް ކުނިގޮނޑަކަށް

ދުނިޔޭގެ އުސް ފަރުބަދައިގެ ގޮތުގައި މައުންޓް އެވަރެސްޓްގެ ވާހަކަ ދެއްކުމަކުން ނުނިމެ އެވެ. އަދި އެ ފަރުބަދައިގެ ކުންނާ ހަމައަށް ވާސިލުވާން މީސްމީހުން ކުރާ އާދަޔާހިލާފު މަސައްކަތުގެ ވާހަކަތައް ކިތަންމެ ޝައުގުވެރިޔަސް، މި ވެސް ހަމަ ނުދައްކައި ދޫކޮށްލާ ވަރުގެ ވާހަކައެއް ނޫނެވެ.

މުޅި ދުނިޔެ ވެސް ކުންޏާ ދެކޮޅަށް ހަނގުރާމަ ކުރަމުން އަންނަ އިރު، މައުންޓް އެވަރެސްޓް މިހާރުވެފައި ވަނީ ބޮޑު ކުނިގޮނޑަކަށެވެ. ނޭޕާލްގައި ހުރި މައުންޓް އެވަރެސްގެ މަތިން އަހަރަކު އެތައް ޓަނެއްގެ ކުނި މިހާރު ވަނީ ތިރިއަށް ބާލަން ޖެހުމުގެ ބުރަ މަސައްކަތް ވެސް ކުރަން ޖެހިފަ އެވެ.

އެ ފަރުބަދަށް އަރާ މީހުން ކުނީގެ ގޮތުގައި އެތަނަށް ދޫކޮށްލާ އެއްޗިއްސާއި އިންސާނުންގެ ނަޖިހުން ވެސް މައުންޓް އެވަރެސްޓް ވަނީ ގޮނޑުކޮށްލައިފަ އެވެ.

މި ވާހަކަތައް މި ފަހުން މީޑިއާތަކުން ސަމާލުކަމަށް ގެނެސް މައުންޓް އެވަރެސްޓް ގޮނޑުކޮށްލައިފައިވާ މަންޒަރުތައް ދައްކުވައިދޭ ފޮޓޯތަކާއި ވީޑިއޯތަކުގެ ސަބަބުން އެތައް ބަޔަކަށް ލިބުނީ ހައިރާން ކަމެކެވެ.

"މައުންޓް އެވަރެސްޓްގެ މައްޗަކީ މިހާރު ބޮޑު ކުނިގޮނޑެއް. އެއީ ބަލައިލަން ހުތުރު މަންޒަރެއް." 18 ފަހަރު އެ ފަރުބަދަށް އަރާފައިވާ ޕެމްބާ ދޯރްޖޭ އޭއެއެފްޕީ އަށް ބުންޏެވެ.

ޓޫރިސްޓް މަންޒިލެއްގެ ގޮތުގައި މަޝްހޫރުވެފައިވާ މައުންޓް އެވަރެސްޓް ގޮނޑުކުރާ މައްސަލަ ހައްލެއް ހޯދޭތޯ ނޭޕާލާއި ޓިބެޓުން އަންނަނީ މަސައްކަތްތަކެއް ވެސް ކުރަމުންނެވެ.

މީގެ ފަސް ވަރަކަށް އަހަރު ކުރިން ނޭޕާލުން ވަނީ މައުންޓް އެވަރެސްޓަށް އަރާ ޓީމްތަކުން މަދުވެގެން 8 ކިލޯގެ ކުނި ތިރިއަށް ގެނެސްދޭ ނަމަ 4،000 ޑޮލަރުގެ އިނާމެއް ދޭ އުސޫލެއް ވެސް ކަނޑައަޅައިފަ އެވެ. އަދި މި ފަރުބަދައިގެ ޓިބެޓާވީ ފަޅިއަށް އަރާ ޓީމްތަކުން މަދުވެގެން 8 ކިލޯގެ ކުނި ނުގެނެސްދޭ ނަމަ، ކޮންމެ ކިލޯއަކަށް 100 ޑޮލަރުގެ މަގުން ޖޫރިމަނާކުރާ އުސޫލެއް ވެސް ހަމަޖައްސާފައިވެ އެވެ.

މިދިޔަ އަހަރު އެކަނި ވެސް އެވަރެސްޓް ފަރުބަދައިގެ މަތިން 25 ޓަނުގެ ކުނި ޖަމާކޮށްފަ އެވެ. އޭގެ ތެރެއިން 15 ޓަނަކީ އިންސާނުގެ ނަޖިހެވެ. ތަފާސް ހިސާބުތައް ދައްކާ ގޮތުން މި އަހަރުގެ މިހާތަނަށް މަދުވެގެން 600 އެއްހާ މީހުން ފަރުބަދަ އަށް އަރާފައިވެ އެވެ.

ނޭޕާލްގެ ސާގަރްމަތާ ޕޮލިއުޝަން ކޮންޓްރޯލް ކޮމިޓީ (އެސްޕީސީސީ) އިން ބުނި ގޮތުގައި ފަރުބަދަ އަށް އަރާ މީހުންގެ ތެރެއިން ދެބައިކުޅަ އެއްބައި މީހުންނަކީ އެ މީހުން ގެންދާ ބައެއް ތަކެތި ކުނީގެ ގޮތުގައި ދޫކޮށްލައިފައި ފައިބާ މީހުންނެވެ. އެހެންވެ މިކަން ބޮޑު ގޮންޖެހުމަކަށްވެފައިވާ ކަމަށް ބުންޏެވެ.

ޕެމްބާ ބުނި ގޮތުގައި ފަރުބަދަ އަށް ކުނި ދޫކޮށްލަނީ ބައެއް މީހުންގެ ހޭލުންތެރިކަން ވެސް ކުޑަކަމުންނެވެ. އަނެއް މައްސަލައަކީ ކަމާ ބެހޭ ފަރާތްތަކުން އެކަށީގެންވާ ވަރަށް މޮނިޓަ ނުކުރުން ކަމަށް ބުންޏެވެ.