އަސްލު "ސުޕަ މާރިއޯ" މަރުވެއްޖެ

"ސުޕަ މާރިއޯ" ގިނަ ބަޔަކަށް އެނގޭނީ މަޝްހޫރު ވީޑިއޯ ގޭމެއްގެ ގޮތުގަ އެވެ. އެކަމަކު މި ނަން ހަގީގަތުގައި ވައިގައި ހިފާލީ މީހަކަށް އެ ނަން ނިސްބަތްވާތީ އެވެ. އެއީ މާރިއޯ ސެގާލީ އެވެ. އޭނާގެ ނަމުން ނިންޓެންޑޯގެ މި ގޭމަށް ނަން ދިނުމުގެ ކުރިން "ސުޕަ މާރިއޯ" ވީޑިއޯގެ ނަމަކީ "ޖަމްޕްމޭން" އެވެ.

ހިތާމަވެރި ހަބަރަކީ "ސުޕަ މާރިއޯ" ވީޑިއޯ ގޭމަށް ނަން ދިނުމުގައި އަސްލަކަށް ބެލި މާރިއޯ ސެގަލީ މަރުވި ވާހަކަ އެވެ. އިޓަލީ ދަރިކޮޅުގެ އެމެރިކާގެ ސެގާލީ މަރުވީ އުމުރުން 84 އަހަރުގައި ވޮޝިންޓަނުގައ މިދިޔަ މަހުގެ 27 ގަ އެވެ.

އޭނާ މަރުވި އިރު، އަންބަކާއި ހަތަރު ދަރިންނާއި ކާފަ ކިޔާ ނުވަ ދަރިން އެބަ ތިއްބެވެ.

ސެގާލީއަކީ އިމާރާތް ކުރުމުގެ ދާއިރާގައި ވަރަށް ކާމިޔާބުކޮށް މަސައްކަތްތަކެއް ކުރި މީހެކެވެ. "ސުޕަ މާރިއޯ" ގެ ބޮޑު މަޝްހޫރުކަމާ އެކު، ސެގާލީ ވަނީ އެ ގޭމް ވިއްކައިގެން ލިބޭ އާމްދަނީން އޭނާ އަށް ބައި އަޅަން ޖެހޭނެ ކަމަށް ބުނެ 1993 ގައި ޖޯކު ވެސް ޖަހައިފަ އެވެ.

ސުޕަ މާރިއޯއަކީ ވަރަށް "ލޯބިކޮށް" ހުންނަ ކެރެކްޓާއެކެވެ. ބޮޑު ނޭފަތަކާއި ބޮޑު މަތިމަހަކާއި ނޫ ދެ ލޮލާ އެކު މީގެ ފުރިހަމަކަން ގެނެސް ދެނީ އޭގެ ކުލަގަދަ ކޮސްޓިއުމެވެ. ރަސްމީ ކުލަތަކަކީ ރަތާއި ނުލެވެ އެވެ.

"ސުޕަ މާރިއޯ" އަކީ ވީޑިއޯ ގޭމްތަކުގެ ތެރެއިން އެންމެ މަގުބޫލު އެއް ގޭމެވެ. މީގެ އެންމެ ފަހުގެ ވާޝަނަކީ މިދިޔަ އަހަރު ނެރުނު "ސުޕަ މާރިއޯ އޮޑިސީ" އެވެ. އޭގެ 12 މިލިއަނަށް ވުރެ ކޮޕީ މިހާރު ވަނީ ވިކިފަ އެވެ.