ބައިޖޫ: އިންޑިއާގެ އެންމެ ޒުވާން އާ މަހުޖަނު

އިންޑިއާގެ މަހުޖަނުންގެ ތެރެއިން ގިނަ ބަޔަކު އެންމެ ފަރިތަވާނެ ނަންތަކަކީ މުކޭޝް އަމްބާނީ އާއި އޭނާގެ ކޮއްކޮ އަނިލް އަމްބާނީ އެވެ. އިންޑިއާގެ މަހުޖަނުންގެ އަދަދު އަހަރުން އަހަރަށް އިތުރުމުން އަންނަ އިރު، މި ލިސްޓަށް ވަރަށް ޒުވާން ވިޔަފާވެރިޔަކު މިހާރު ވަނީ އިތުރުވެފަ އެވެ.

އެއީ ކެރެލާ އަށް ނިސްބަތްވާ ބައިޖޫ ރަވީންދުރަން، 37، އެވެ. އޭނާ އަކީ ކުދިންގެ ތައުލީމަށް ހާއްސަކޮށްގެން 2015 ގައި ވުޖޫދަށް ގެނައި އެޕްލިކޭޝަން "ބައިޖޫޒް" ގެ ބާނީ އެވެ. ގިނަ ބައެއްގެ މެދުގައި ވަރަށް ބޮޑު މަގުބޫލު ކަމެއް ހޯދާފައިވާ މި އެޕަކީ ބައިޖޫ 2011 ގައި އުފެއްދި ކުންފުނި ތިންކް އެންޑް ލާން ޕްރައިވެޓް ލިމިޓެޑްގެ މަސައްކަތެކެވެ.

އެކަމަކު އެންމެ ހަތް އަހަރުގެ ތެރޭގައި "ބައިޖޫޒް" ވެފައި ވަނީ ބައިޖޫގެ މުޅި ދިރިއުޅުން ބަދަލުކޮށްލި ސްޓާޓަޕަކަށެވެ. ބައިޖޫޒް އަކީ މިހާރު 35 މިލިއަނަށް ވުރެ ގިނަ މީހުން ބޭނުން ކުރާ އެޕެކެވެ.

"އަހަރެންގެ ބޭނުމަކަށްވީ ޓެކްނޮލޮޖީގެ ޒަރީޒާ އިން ތައުލީމަށް ކުދިން ދޭ ޝައުގުވެރިކަން އިތުރު ކުރުން،" ބައިޖޫ ބުންޏެވެ. "ކުދިން ވަރަށް ވެސް ޝައުގުވެރި ވާނެ ގޮތްގޮތަށް އެޕް ފަރުމާކޮށްފައި ހުންނާނީ،" މިދިޔަ މަހު އެކަނި ވެސް 150 މިލިއަން ޑޮލަރުގެ އާމްދަނީއެއް ހޯދި ބައިޖޫޒްއާ ބެހޭ ގޮތުން އޭނާ ބުންޏެވެ.

މަޝްހޫރު ފިލްމީ ތަރި ޝާހްރުކް ހާނަކީ ބައިޖޫގެ ލާނިން އެޕް ޓީވީން އިޝްތިހާރުކޮށްދޭ ބްރޭންޑް އެމްބެސެޑަރެވެ. އެހެންވީމާ އެއީ ވެސް ބައިޖޫގެ މަސައްކަތުގެ ކާމިޔާބީ ފާހަގަ ކުރެވޭނެ ކަމެކެވެ.

ކުރިން ޓީޗަރެއްގެ ވަޒީފާ އަދާކުރި ބައިޖޫގެ މަސައްކަތް މަގުބޫލުވެ، އޭނާގެ މިލްކިއްޔާތު މިދިޔަ މަހު ވަނީ 5.4 ބިލިއަން ޑޮލަރަށް އަރައިފަ އެވެ. މިއާއެކު އޭނާ ވެގެން ގޮސްފައި ވަނީ އިންޑިއާގެ އެންމެ ޒުވާން އެއް ބިލިއަނަރަށެވެ.

ބައިޖޫގެ ޓީމް ފުޅާވެ، ތަރައްގީވަމުން އަންނަ އިރު، އޭނާގެ މުވައްޒަފުންގެ އަދަދު މިހާރު 3،000 އަށް ވުރެ ގިނަ އެވެ. އިންޑިއާ ފަތަހަ ކުރުމަށް ފަހު "ބައިޖޫޒް" އެޕް މިހާރު އަމާޒު ހިފާފައި ވަނީ އެމެރިކާ އާއި އިނގިރޭސިވިލާތަށް ވިޔަފާރި ފުޅާ ކުރުމެވެ. ދާދި ފަހުން ބައިޖޫ ވަނީ ވޯލްޓް ޑިޒްނީއާ އެކު ވެސް ޕާޓްނާޝިޕެއް ހަދައިފަ އެވެ.

"އަހަންނަށް ވަރަށް ޔަގީން ޑިޒްނީއާ ގުޅިގެން ވސް ވަރަށް ކާމިޔާބު މަސައްކަތްތަކެއް ކުރެވޭނެކަން،" އޭނާ ބުންޏެވެ.

ބައިޖޫޒް ލާނިން އެޕް ޕްލޭ ސްޓޯރުންނާއި އެލަޕް ސްޓޯރުން ޑައުންލޯޑް ކުރެވޭނެ އެވެ.