ކުއްތާއަކާ އެކު ކުޅުއްވަނިކޮށް ބައިޑެން ވެއްޓި ތަނބިކަށީގައި ރެނދުލައިފި

އެމެރިކާގެ ރައީސްކަމުގެ މަގާމަށް އިންތިހާބުވެފައިވާ ޖޯ ބައިޑެން ކުއްތާއަކާ އެކު ކުޅުއްވަނިކޮށް ވެއްޓިވަޑައިގެން ފަޔަށް ލިބުނު އަނިޔާއަކަށް ފަރުވާ ހޯއްދަވަން ފައްޓަވައިފި އެވެ.

މީޑިއާތަކުން ބުނި ގޮތުގައި ބައިޑެން، 78، ގެ ކަނާތު ފައިގެ ތަނބިކަށީގައި ރެނދުލީ އޮޅުކޮށްގެން ގެންގުޅުއްވާ ކުއްތާތަކުގެ ތެރެއިން މޭޖާ ނަމަކަށް ކިޔާ ކުއްތާއާ އެކު ކުޅުއްވަނިކޮށް ވެއްޓިގެން ކަމަށެވެ.

މި އަނިޔާ އަށް މިހާރު ފަރުވާ ހޯއްދަވަމުން އަންނަ އިރު ބައިޑެންގެ އަމިއްލަ ޑޮކްޓަރު ކެވިން އޮ ކޮނޯ ވަނީ ތަނބިކަށީގައި ރެނދެއް ހުރި ކަމަށް އެކްރޭތަކުން ނުދައްކާތީ ސީޓީ ސްކޭންތަކެއް ހަދައިގެން އިތުރަށް ބައްލަވައިފަ އެވެ. އެ ޓެސްޓްތަކުން ދައްކަނީ ވާތު ފައިތިލައިގެ މެދާ ދިމާލުން ދެ ކައްޓެއްގައި ކުޑަކޮށް ރެނދުލާފައިވާ ކަމަށެވެ.

"އެހެންވީމާ އެއްކޮށް ރަނގަޅު ވަންދެން ހިންގަވަން ބައިޑެން އަށް ހާއްސަ ބޫޓެއް ބޭނުންކުރައްވަން ޖެހޭނެ،" ޑޮކްޓަރު ވިދާޅުވި އެވެ.

އޭނާ ވިދާޅުވީ ފަޔަށް އަނިޔާވެގެން ފަރުވާ ހޯދަން ޖެހިވަޑައިގަތަސް ބައިޑެންގެ ސީރިއަސް ސިއްހީ މައްސަލައެއް ނެތް ކަމަށެވެ. އަދި އޭނާ ހުންނެވީ ވެރިކަމުގެ ޒިންމާތަކާ ހަވާލުވެވަޑައިގެންނެވޭ ހާލަތުގައި ކަމަށް ވިދާޅުވި އެވެ.

މިދިޔަ މަހު 3 ގައި ބޭއްވި ރިއާސީ އިންތިހާބު ކާމިޔާބުކުރެއްވުމާ އެކު ބައިޑެން ވާނީ އެމެރިކާގެ 46 ވަނަ ރައީސަށެވެ. ކުރިން އެމެރިކާގެ ނައިބު ރައީސްކަން ވެސް ކުރެއްވި ބައިޑެން ރަސްމީކޮށް މަގާމާ ހަވާލުވެވަޑައިގަންނަވާނީ އަންނަ މަހުގެ 20 ގަ އެވެ. ވައިޓް ހައުސް އަށް ބައިޑެން ވަޑައިގަންނަވާތީ ގެންގުޅުއްވާ ދެ ކުއްތާ ކަމަށްވާ މޭޖާ އާއި ޗޭމްޕާ ވެސް އެކުގަ އެވެ.

ކުއްތާއަކާ އެކު ކުޅުއްވަނިކޮށް ބައިޑެން އަށް އަނިޔާވިކަން އެނގުމުން މިހާރުގެ ރައީސް ޑޮނަލްޑް ޓްރަމްޕް ވަނީ އަވަސް ޝިފާއަކަށް އެދިވަޑައިގެން ޓްވީޓްކުރައްވައިފަ އެވެ. އަދި ޓްރަމްޕަކީ ބައިޑެން ކުއްތާ ގެންގުޅުއްވާތީ އެކަމަށް ޖޯކު ޖައްސަވާފައިވާ ބޭފުޅެކެވެ. ވައިޓް ހައުސްގައި ދެން ވެރިކަން ކުރާނީ ކުއްތާތަކެއް ކަމަށް އޭނާ ވިދާޅުވެފައިވެ އެވެ.