ލައިފްސްޓައިލް / ކައިވެނި

ދެ ފޫޓްގެ މީހަކު އިންނާނެ މީހަކު ހޯދަން ފުލުހުންގެ އެހީ އަށް އެދެިއްޖެ

އަޒީމް ޕޮލިސް ސްޓޭޝަނުގައި.

އަހުމަދު އަދްޝަން، މިހާރު

14 މާޗް 2021 - 07:56

2 comments

އިންޑިއާގައި އުޅޭ އިސްކޮޅުން ވަރަށް ކުރު މީހަކު އިންނާނެ މީހަކު ހޯދައިދޭން ފުލުހުންގެ އެހީ އަށް އެދިއްޖެ އެވެ.

މީޑިއާތަކުން ރިޕޯޓްކޮށްފައިވާ ގޮތުގައި އަޒީމް މަންސޫރީ ނަމަކަށް ކިޔާ، އިސްކޮޅުގައި ދެ ފޫޓް ތިން އިންޗި ހުރި 26 އަހަރުގެ މީހާ އުއްތަރު ޕްރަދޭޝްގެ ޝާމްލީ ޑިސްޓްރިކްޓް ފުލުހުންނަށް، އިންނާނެ މީހަކު ހޯދައިދޭން އެދި ހުށަހެޅީ މިދިޔަ އަންގާރަ ދުވަހު އެވެ. މިކަމަކާ ގުޅިގެން ފުލުހުންގެ ސްޓޭޝަން ހައުސް އޮފިސަރު ނިރާޖް ޗައުދަރީ ވިދާޅުވީ ފުލުހުންނަކީ އިންނާނެ މީހުން ހޯދައި ދިނުމުގެ ޒިންމާ އޮންނަ ބައެއް ނޫން ކަމަށެވެ.

"އެކަމަކު އެހެނެއް ނޫން ދެމަފިރިހެއްގެ ދޭތެރޭގައި މައްސަލައެއް ޖެހިގެން އުޅޭ ކަމަށް ވަންޏާ އެކަމުގެ އެހީއަކަށް އެދިއްޖެ ނަމަ ފުލުހުން އަބަދު ވެސް އެކަމެއް ހައްލުކުރަން އެހީ ފޯރުކޮށްދޭނެ،" އޭނާ ވިދާޅުވި އެވެ.

އަޒީމްއާ ހަވާލާދީ މީޑިއާތަކުން ބުނީ އިންނާނެ މީހަކު ހޯދައިދޭން ފުލުހުންގެ އެހީ އަށް އެދުނީ މިހާތަނަށް ކުރި މަސައްކަތް ކާމިޔާބުވެފައި ނުވާތީ އެވެ. އޭނާގެ އާއިލާ އިން ބުނީ އަޒީމް ކުރުކަމުން ބައިވެރިޔަކު ހޯދަން ވަރަށް އުނދަގޫ ކަމަކަށްވެފައިވާ ކަމަށެވެ.

"އެކަމަކު އަހަރެމެން އެންމެން ވެސް ބޭނުން އޭނާ ކައިވެނިކުރަން،" އަޒީމްގެ ބޭބެ މުހައްމަދު ނައީމް ބުންޏެވެ. "އިސްކޮޅުން ކުރުވުމުގެ އިތުރަށް އަޒީމަކީ އަތުގައި ވެސް މައްސަލަތަކެއް ހުންނަ މީހެއް. އެހެންވީމަ އޭނަ އަށް ވަރަށް އަޅާލާ ކަހަލަ އަންބެއް ބޭނުން ވަނީ."

އަޒީމް ބުނީ އާއިލާގެ ފަރާތުން އެހީ ނުލިބޭ ކަމަށާއި ބޭނުން ވަނީ ރޯދައިގެ ކުރިން ކިޔަވައިގެން ހުރި މީހަކާ ކައިވެނިކުރަން ކަމަށެވެ. އަދި މިކަމާ ގުޅިގެން އުއްތަރު ޕްރަދޭޝްގެ ޗީފް މިނިސްޓަރު އަދިޔަނާތާ ވެސް ބައްދަލުކޮށް އަމިއްލަ އިހުސާސްތައް އިހުސާސްކުރި ކަމަށް ބުންޏެވެ. ނަމަވެސް އޭނާގެ ފަރާތުން ވެސް އެހީ ލިބޭ ގޮތެއް ނުވި ކަމަށް ބުންޏެވެ.

"އަހަރެން މިހުރީ އިންނަން އެއްބަސްވާ ކޮންމެ އަންހެނަކާ ވެސް ކައިވެނިކުރަން ތައްޔާރަށް. ދީނަކަށް ނަސްލަކަށް ހަމުގެ ކުލައަކަށް ވެސް ބެލުމެއް ނެތް،" ހަ ކުދިން ތިބި އާއިލާގައި ތިން ވަނަ އަށް ހުރި އަޒީމް ބުންޏެވެ. "އެކަމަކު ކިޔަވައިގެން ހުރި މީހަކު ބޭނުން ވަނީ."

އޭނާ ބުނީ ބޭނުން ވަނީ ވީހާ ވެސް އަވަހަކަށް ކައިވެނިކުރަން ކަމަށާއި ރޯދައިގެ ކުރިން އެކަންވެއްޖެ ނަމަ ހަމީނޫމަށް ދާނެ ވަގުތު ވެސް ލިބޭނެ ކަމަށެވެ.

"ގޯއާ، ޝިމްލާ އަދި މަނާލީއާ އަށް އަންހެނުން ގޮވައިގެން އަހަރެން ދާން ބޭނުން." މުސްލިމް އާއިލާއަކަށް ނިސްބަތްވާ އަޒީމް ބުންޏެވެ.