ގެވެށިއަނިޔާ އިން ހިމާޔަތް ބޭނުންވާކަން އަންގަން އިޝާރާތެއް

ކޮންމެ މީހަކު ވެސް ދަސްކުރަންޖެހޭ އާ އިޝާރާތެއް ޕްރޮމޯޓްކުރުމުގެ ފޯރި ސޯޝަލް މީޑިއާގައި ގަދަވާން ފަށައިފި އެވެ.

މި އިޝާރާތަކީ ގެވެށި އަނިޔާގެ ނުރައްކަލެއް އޮތް ކަމަށް އިހުސާސްކުރެވޭ ނަމަ އެހެން މީހެއްގެ ފަރާތުން އެހީއަކަށް އެދެވިދާނެ ގޮތެކެވެ. ހަދަން ޖެހޭ ގޮތަކީ މީހަކަށް އަތްތިލަ ފެންނަ ގޮތް ހަދާލާފައި ބޮޑުވައި އިނގިލި އެތެރަށް ލަންބާނީ އެވެ. ދެން ބާކީ ހުރި ހަތަރު އިނގިލި ވެސް ލަންބާލާނީ އެވެ. އޭރުން އަތްތިލަ އިންނާނީ ގޮށްމުށްކެވިފައި އިންނަ ކަހަލަ ގޮތަކަށެވެ.

މި އިޝާރާތަށް މި ވަގުތު ބޭނުން ކުރާ ނަމަކީ "ވައިލެންސް އެޓް ހޯމް ސިގްނަލް ފޯ ހެލްޕް" އެވެ. އަމާޒަކީ ބައިނަލްއަގްވާމީ އިޝާރާތަކަށް މީތި ހެދުމެވެ. އަދި މި އިޝާރާތަކީ ދެ ޖިންސްގެ މީހުންނަށާއި ކުޑަކުދިންނަށް ވެސް ބޭނުންކުރެވޭނެ އިޝާރާތެކެވެ. މި އިޝާރާތް އުފެދިގެން އައީ މިދިޔަ އަހަރު ކޮވިޑް-19 ގެ ބޮޑު ބަލިމަޑުކަމުގެ ތެރޭގައި ގިނަ ބަޔަކު ލޮކްޑައުންގެ ތެރޭގައި އުޅެން ޖެހި ގޭތެރޭގައި ބަންދުވެގެން ތިބެން ޖެހުމުން އިތުރުވާން ފެށި ގެވެށި އަނިޔާތަކާ ދެކޮޅަށެވެ.

މިދިޔަ އަހަރަކީ ވަރަށް ގިނަ ބަޔަކު މުއާލަމާތްތަކަށް އެކިއެކި ޕްލެޓްފޯމްތައް ބޭނުންކުރަން ފެށި އަހަރަކަށްވާތީ ކެމެރާ ހިމެނޭ ޕްލެޓްފޯމެއް ބޭނުންކުރާ ނަމަ ކައިރީގައި އުޅޭ އެހެން މީހުންނަށް ރޭކައިނުލާ ގޮތަށް ކެމެރާ އަށް އަތްތިލަ އިން އިޝާރާތް ދައްކައިގެން އެހީ ހޯދިދާނެ އެވެ.

މި އިޝާރާތް ތައާރަފުކުރީ ވިމެންސް ފަންޑިން ނެޓްވޯކާއި ކެނޭޑިއަން ވިމެންސް ފައުންޑޭޝަން ގުޅިގެންނެވެ. މަގުސަދަކަށްވީ ބަހުރުވައާ ނުލައި އިޝާރާތުން އެހެން މީހެއްގެ ފަރާތުން އެހީއަކަށް އެދުމެވެ. ތިމާ ނުރައްކަލެއްގެ ތެރޭގައިވާކަން އަންގައި ދިނުމެވެ.

މިއީ އަދި ވަރަށް އާ އިޝާރާތަކަށްވާތީ ގިނަ ބަޔަކަށް މީތި ދަސްކޮށްދީ ހޭލުންތެރިކަން އުދެއްދުމުގެ މަގުސަދުގައި މިހާރު އަންނަނީ #ސިގްނަލްފޯހެލްޕްގެ ނަމުގައި ސޯޝަލް މީޑިއާ ޕްލެޓްފޯމްތަކުގައި ކެމްޕޭނެއް ހިންގަމުންނެވެ. އެގޮތުން އެކިއެކި މީހުން އަންނަނީ އިޝާރާތް ދައްކައިވޭ ވީޑިއޯތައް ވެސް އާންމުކުރަމުންނެވެ.

ކެނޭޑިއަން ވިމެންސް ފައުންޑޭޝަނުން ވެސް އެކަމަށް ހާއްސަކޮށް ވީޑިއޯއެއް ޔޫޓިއުބްގައި އާންމުކޮށްފައިވެ އެވެ. ބޭނުމަކީ ވީހާ ވެސް ގިނަ ބަޔަކަށް "ވައިލެންސް އެޓް ހޯމް ސިގްނަލް ފޯ ހެލްޕް" ދަސްކޮށްދިނުމެވެ.