ޓައިވާނުގެ ޗިޕް ކުންފުނިން 100 ބިލިއަން ޑޮލަރުގެ އިންވެސްޓްމަންޓެއް

ޓެކްނޮލޮޖީއާ ގުޅުން ހުރި އެކި ދާއިރާތަކުގެ އުފެއްދުންތަކަށް ބޭނުންވާ ޗިޕް ލިބުމުގެ ތާށިކަން މިދިޔަ އަހަރު ކޮވިޑް-19 ގެ ބޮޑު ބަލިމަޑުކަމާ އެކު ކުރިމަތިވެ، ދިމާވެފައިވާ މައްސަލަތަކަށް ހައްލު ހޯދައި ދޭން ދުނިޔޭގެ ޓައިވާން ސެމީކޮންޑަކްޓާ މެނުފެކްޗަރިން ކޮމްޕެނީ (ޓީއެމްސީން) އިން ކުރިއަށް އޮތް ތިން އަހަރުގެ ތެރޭގައި 100 ބިލިއަން ޑޮލަރު އިންވެސްޓްކުރަން ނިންމައިފި އެވެ.

މިކަން އިއުލާންކޮށް، ކޮންޓްރެކްޓް އުސޫލުން ޗިޕް އުފައްދާ އެންމެ ބޮޑު ކުންފުނިން ބުނީ މި އަހަރު އެކަނި ވެސް ޗިޕް އުފައްދަން 28 ބިލިއަން ޑޮލަރު ހޭދަކުރާނެ ކަމަށާއި މި އަހަރަކީ ވަކިން ހާއްސަކޮށް ކާރު އުފެއްދުމުގެ އިންޑަސްޓްރީ އަށް ބޭނުންވާ ޗިޕް އުފައްދަން ވަކިން ބޮޑަށް އިސްކަން ދޭނެ އަހަރެއް ކަމަށެވެ.

ޗިޕްގެ ތާށިކަމާކުރެ ކާރު އުފެއްދުން މަދުކޮށް، އޯޑަރު ނެގުން ވެސް މިދިޔަ އަހަރު މަދުކުރި ކުންފުނިތަކުގެ ތެރޭގައި ޖެނެރަލް މޮޓޯޒް (ޖީއެމް) އާއި ހޮންޑާ އާއި ޓޮޔޮޓާ އާއި ވޯކްސްވޭގަން ފަދަ ކުންފުނިތައް ހިމެނެ އެވެ.

ޗިޕް އުފެއްދުން އިތުރު ކުރަން 100 ބިލިއަން ޑޮލަރު އިންވެސްޓްކުރަން ޓީއެސްއެމްސީ އިން ނިންމި އިރު އެ ކުންފުންޏަކީ އެމެރިކާގެ މަޝްހޫރު ފޯނު ކުންފުނި އެޕަލް އަށް ވެސް ޗިޕް ސަޕްލައިކޮށްދޭ ކުންފުންޏެވެ.

ކޮވިޑް އާ އެކު ޗިޕްގެ އުފެއްދުމުގެ މަސައްކަތަށް މިދިޔަ އަހަރު އެރި ލޮޅުންތަކާ އެކު އިލެކްޓްރޯނިކް ސާމާނުގެ އެތައް އުފެއްދުމަކަށް އޭގެ ދަތިކަން ކުރިމަތިވެފައިވެ އެވެ.

ޓީއެސްއެމްސީ އިން ބުނި ގޮތުގައި އެ ކުންފުނީގެ އަމާޒަކީ މި ފަހަރު މި ދިމާވި ވަރަށް ޗިޕްގެ ދަތިކަން ދެން ކައިރި މުސްތަގުލަބެއްގައި ދިމާނުވާނެ ގޮތަކަށް މަސައްކަތްތައް ބައްޓަންކޮށް، އިންވެސްޓްމަންޓްތައް އިތުރުކުރުމެވެ. އެގޮތުން ކުރިއަށް ތިން އަހަރަށް ކަނޑައެޅި 100 ބިލިއަން ޑޮލަރުގެ އިންވެސްޓްމަންޓްގެ އިތުރަށް ސެމީކޮންޑަކްޓާ ޓެކްނޮލޮޖީގެ ދާއިރާގެ އުފެއްދުންތެރިކަން އިތުރުކޮށް ތަރައްގީކުރުމަށް ބޭނުންވާ ރިސާޗަށް ވެސް ބޮޑު ހޭދައެއްކުރާނެ އެވެ.

ދުނިޔޭގެ އެންމެ ބޮޑު ޗިޕް ކުންފުނިން ބޮޑު އިންވެސްޓަންޓެއް އިއުލާންކުރި އިރު އެމެރިކާ އާއި ޔޫރަޕަށް މައިގަނޑު ގޮތެއްގައި ދިމާވެފައިވާ ޗިޕްގެ ތާށިކަން ހައްލުކުރަން އެމެރިކާގެ ކުންފުނި އިންޓެލް އިން އެ ކުންފުނީގެ ޗިޕް އުފެއްދުން އައުޓްސޯސްކުރަން ނިންމައިފަ އެވެ. އެ މަޝްރޫއަށް 20 ބިލިއަން ޑޮލަރު އިންވެސްޓްކުރާނެ އެވެ. މިކަން އިއުލާންކުރީ މިދިޔަ މަހުގެ 24 ގަ އެވެ.

ވިޔަފާރި ދިރާސާކުރާ ފަރާތްތަކުން ބުނެފައިވާ ގޮތުގައި ޓީއެސްއެމްސީ އާއި އިންޓެލްގެ މި އިންވެސްޓްމަންޓްތަކަކީ އަނެއްކާ ވެސް ދެ ކުންފުނީގެ މެދުގައި އިތުރު ވާދަވެރިކަމެއް އުފެދޭނެ ކަމެކެވެ. ޓީއެސްއެމްސީން މިދިޔަ އަހަރުގެ މެއި މަހު ބުނެފައިވާ ގޮތުގައި އެ ކުންފުނީގެ އަމިއްލަ ފެކްޓްރީއެއް އެމެރިކާގެ އަރިޒޯނާގައި ތަރައްގީކުރާނެ އެވެ.

އަރިޒޯނާ އަކީ އިންޓެލްގެ އިންވެސްޓްމަންޓްގެ ވެސް މައި ހަބެވެ.