ތިން ވަނަ ޑިވިޝަނުގެ ޗެމްޕިއަންކަން ސިފައިން ހޯދައިފި

ޕެނަލްޓީ ޖަހައިގެން 4-3 އިން ސީލައިފް ސްޕޯޓްސް ކްލަބް ބަލިކޮށް ދިވެހި ސިފައިންގެ ކްލަބުން ތިން ވަނަ ޑިވިޝަން ފުޓްބޯޅަ މުބާރާތުގެ ޗެމްޕިއަންކަން މިއަދު ހޯދައިފި އެވެ.

މި މެޗަށް ނުކުތްއިރު ވެސް މި ދެ ޓީމަށް ވަނީ އަންނަ އަހަރުގެ ދެ ވަނަ ޑިވިޝަނުން ޖާގަ ލިބިފަ އެވެ. މިއަދުގެ މެޗު ފުރިހަމަ ވަގުތު ހަމަވިއިރު، ދެ ޓީމު އޮތީ 1-1 އިން އެއްވަރުވެފަ އެވެ.

މި ދެ ޓީމު ވެސް މުބާރާތުގެ ފައިނަލުން ޖާގަހޯދިއިރު ވަނީ ރަނގަޅު ނަތީޖާތަކެއް ނެރެފަ އެވެ. ސީލައިފްގެ ކޯޗަކީ ވެލެންސިއާ އާއި ގައުމީ ޓީމުގެ ކުރީގެ ކުޅުންތެރިޔާ އިސްމާއިލް އާސިފް (ކުޑަހީނާ) އެވެ. އަދި ސިފައިންގެ ކޯޗަކީ ފުރަތަމަ ޑިވިޝަނުގައި ގިނަ ކްލަބްތަކަކަށް ކޯޗުކޮށްދިން އަހުމަދު ނާޝިދު (ނާދު) އެވެ.

ގަލޮޅު ދަނޑުގައި މިއަދު ހަވީރު ކުޅުނު މެޗު ފަށައިގެން ރަނގަޅަށް ކުޅުނީ ސިފައިންނެވެ. އެގޮތުން އެ ޓީމުގެ ކުރިއަށް ކުޅޭ ކުޅުންތެރިންނަށް ލިބޭ ފުރުސަތުތަކުގައި އެންމެ ރަނގަޅަށް ދިޔައީ ބޭނުމެއް ނުހިފި އެވެ. މެޗުގެ 11 ވަނަ މިނިޓްގައި ސީލައިފް އޭރިއާ ތެރެއިން ސިފައިންގެ ސާދުﷲ ފޮނުވާލި ބޯޅަ ސީލައިފްގެ ކީޕަރު ކުރިން ވެލެންސިއާ އާއި ވިކްޓަރީ އަށް ކުޅުނު ތޮލާލް ހަސަން ވަނީ މަތަކޮށްފަ އެވެ.

މެޗުގެ ފުރަތަމަ 20 މިނިޓަށް ފަހު ސީލައިފުން ކުޅުން ވަރުގަދަކުރި އެވެ. އެ ޓީމުގެ ބިދޭސީ ކުޅުންތެރިން ކަމަށްވާ ކެއިތީ ސިމްޕްސަން އާއި އަޑެޔަންޖޫ އޮމޮކާފޭ އަށް ލިބޭ ފުރުސަތުތަކުގައި ލަނޑު ޖަހަން މަސައްކަތްކުރި އެވެ. އެގޮތުން މެޗުގެ 27 ވަނަ މިނިޓްގައި އޭރިއާ ތެރެއިން ސިމްޕްސަން ފޮނުވާލި ބޯޅަ ދިޔައީ ދަނޑިކައިރިންނެވެ.

އޭގެ ފަހުން މި ހާފުގައި ސީލައިފަށް ލަނޑު ޖަހައިދޭން އެންމެ ހުސް ފުރުސަތެއް ލިބުނީ ކުރިން އީގަލްސް އަށް މޮޅު ކުޅުމެއް ދެއްކި މުސްތަފާ އަބްދުލް ކަރީމް (މުއްތު) އަށެވެ. ފުރަތަމަ ހާފުގެ ފަހު މިނިޓްގައި އޭރިއާ ތެެރެއިން މުއްތު އަށް ހުސްކޮށް ލިބުނު ބޯޅަ ފޮނުވުމުން ދިޔައީ ހުރަސް ދަނޑިމަތިން ބޭރަށެވެ.

ދެ ވަނަ ހާފު ފަށައިގެން ވެސް ދެ ޓީމުގެ ފަރާތުން ފެނުނީ ދާދި ހަމަހަމަ ކުޅުމެކެވެ. މެޗުގައި ފުރަތަމަ ލަނޑު ޖެހީ ސިފައިންނެވެ. މެޗު ނިމެން ދިހަ މިނިޓަށް ވެފައި ހުއްޓައި އޭރިއާ ތެރެއިން ލިބުނު ބޯޅަައަކުން ސިފައިންނަށް ލީޑުނަގައިދިނީ ނަދީފް އިބްރާހިމް އެވެ.

ސިފައިން ލީޑުނެގުމާ އެކު ސީލައިފުން ކުރިއަށް ޖެހި އެޓޭކު ވަރުގަދަކުރި އެވެ. ނަތީޖާއެއްގެ ގޮތުން މެޗުގެ 86 ވަނަ މިނިޓްގައި އަޑެޔަންޖޫގެ ގޯލުން ސީލައިފުން ނަތީޖާ ހަމަހަމަކުރި އެވެ.

ސިފައިން މޮޅުވީ ފޮނުވާލި ޕެނަލްޓީތަކުން ތިން ޕެނަލްޓީ ކާމިޔާބުކޮށްގެންނެވެ. އަދި ސީލައިފަށް ކާމިޔާބުކުރެވުނީ ދެ ޕެނަލްޓީ އެވެ. މެޗުގައި ސިފައިން މޮޅުވުމުގައި އެ ޓީމުގެ ކީޕަރު މުހައްމަދު ޝިފާންގެ ދައުރު ބޮޑެވެ. އޭނާ ވަނީ ސީލައިފުން ފޮނުވާލި ތިން ޕެނަލްޓީއެއް މަތަކޮށްފަ އެވެ.

ދެ ވަނަ ޑިވިޝަނުގެ އެންމެ މޮޅު ކުޅުންތެރިޔަކީ ސީލައިފުގެ އަޑެޔަންޖޫ އެވެ. އެންމެ މޮޅު ގޯލްކީޕަރަކީ ބުރުގެ އަބްދުﷲ އަރުޝަމް އެެވެ.