ޝާފީ، އިމްރާން އަދި އެންހެލް ވިކްޓަރީ އަށް

އާ ސީޒަނަށް ތައްޔާރުވުމުގައި އެންމެ ވަނދުކޮށް ފެނުނު ވިކްޓަރީ ސްޕޯޓްސް ކްލަބުން ތަޖުރިބާކާރު ކުޅުންތެރިންތަކެއްގެ ސޮއި ހޯދައި ހޯދައި ސްކޮޑް ވަރުގަދަކޮށްފި އެވެ.

އެ ޓީމުން ގެނައި ކުޅުންތެރިންގެ ތެރޭގައި ކުރީގެ ކެޕްޓަން އަދި ގައުމީ ޓީމުގެ ޑިފެންޑަރު ޝާފިއު އަހުމަދު (ޝާފީ) އާއި ގޯލްކީޕަރު މުހައްމަދު އިމްރާނާއި ސްޕެނިޝް ފޯވާޑް އެންހެލް މުނޯޒް އަދި ފޯވާޑް އަލީ ނާފިއު (ކަޅޭ) ހިމެނެ އެވެ.

މީގެ އިތުރުން އެ ޓީމުން ގެނައި ކުޅުންތެރިންގެ ތެރޭގައި ވެލެންސިއާ އިން ފެނުނު ހުސެއިން ނިހާން (ނިހާޓް) އާއި އިބްރާހިމް ހަމްދާން އާއި މުހައްމަދު ފުހެއިދު (ޓޯޑް) އާއި ނިއު ރޭޑިއަންޓަށް ކުޅުނު މުހައްމަދު ޝާދިން އާއި އާދަމް އިޝާމް ހިމެނެ އެވެ.

ވިކްޓަރީގައި ކާމިޔާބު ދުވަސްތަކެއް ހޭދަކުރި ޝާފީ މިދިޔަ ސީޒަނުގައި ވެލެންސިއާ އިންނާއި ކްލަބް ގްރީންސްޓްރީޓްސް އިން ފެނުނުއިރު އޭނާ ވެގެންދާނީ އާ ސީޒަނުގައި ވިކްޓަރީގެ އެންމެ މުހިއްމު ކުޅުންތެރިޔާ އަށެވެ.

ގައުމީ ޓީމަށް މިދިޔަ އަހަރު ކުޅުން ހުއްޓާލި ކީޕަރު އިމްރާން މިދިޔަ ސީޒަނުގެ ފުރަތަމަ ބައިގައި ފެނުނީ ވިކްޓަރީންނެވެ. އެކަމަކު އެ ޓީމުގައި ސީރިއާ ގައުމީ ޓީމުގެ ގޯލްކީޕަރު މުހައްމަދު އަލް ޔޫސުފް ހުރުމުން މާގިނަ ފުރުސަތެއް ނުލިބުނެވެ. އަދި އުރީދޫ ދިވެހި ޕްރިމިއާ ލީގުން ފުރުސަތު ނުލިބުމުން އޭނާ ވަނީ ށ. މިލަންދޫ އަށް ބަދަލުވެ ރަނގަޅު ކުޅުމެއް ދައްކައިފަ އެވެ.

ވެލެންސިއާ އަށް ކުރިން ކުޅުނު އެންހެލް މިދިޔަ ސީޒަނުގައި ކުޅުނީ ދިވެހި ޕްރިމިއާ ލީގުގައި އއ. މާޅޮސް ޓީމަށެވެ. ނާފިއު މިދިޔަ އަހަރުތަކުގައި ޓީސީ ސްޕޯޓްސް ކްލަބަށް ކުޅުނުއިރު، އޭނާ އަކީ ކުރިން ގައުމީ ޓީމަށް ވެސް ކުޅެފައިވާ ހުނަރުވެރި ފޯވާޑެކެވެ.

ވިކްޓަރީގެ ކޯޗަކަށް ހަމަޖައްސާފައިވަނީ ކުރިން ވެސް އެ ޓީމަށް ކޯޗުކޮށްދީފައިވާ ހަންގޭރީގެ ލާސްލޯ ކިސް އެވެ. ވެލެންސިއާ އަށް ތިން ފަހަރެއްގެ މަތިން ކޯޗުކޮށްދީފައިވާ ކިސް އަކީ ރާއްޖެ މިހާތަނަށް އައި އެންމެ ކާމިޔާބު އެއް ބިދޭސީ ކޯޗެވެ.

ވިކްޓަރީގެ ޗެއާމަން އިބްރާހިމް ނަޒީމް ވިދާޅުވީ ފުރަތަމަ ޓާގެޓަކީ މާލޭ ލީގުގެ ގަދަ ހަޔެއްގެ ތެރޭ ހިމެނި ޕްރިމިއާ ލީގުން ފުރުސަތު ހޯދުން ކަމަށެވެ.