އޭދަފުށި ބަލިކޮށް އީގަލްސް އަށް ރަނގަޅު ފެށުމެއް

އެފްއޭއެމް 21 އަހަރުން ދަށުގެ ޔޫތު ޗެމްޕިއަންޝިޕް ފުޓްބޯޅަ މުބާރާތުގައި ރޭ ކުޅުނު މެޗުން ކްލަބް އޭދަފުށި އަތުން 3-1 އިން މޮޅުވެ ކްލަބް އީގަލްސް އިން ފެށުން ރަނގަޅުކޮށްފި އެވެ.

ފަސް ޓީމު ވާދަކުރާ މި ގްރޫޕުގެ ފުރަތަމަ މެޗުގައި އިއްޔެ ހަވީރު މިދިޔަ އަހަރުގެ ޗެމްޕިއަން ގްރީން ސްޓްރީޓްސްގެ މައްޗަށް މާޒިޔާ އިން ވަނީ 1-0 އިން ކުރިހޯދައިފަ އެވެ. އީގަލްސް އާއި އޭދަފުށީގެ އިތުރުން ދެން މި ގްރޫޕުގައި އޮތީ ޔުނައިޓެޑް ވިކްޓަރީ އެވެ.

ރޭގެ މެޗުގައި ފުރަތަމަ ލަނޑު ޖެހީ އޭދަފުށިންނެވެ. މެޗުގެ 18 ވަނަ މިނިޓްގައި އޭދަފުށްޓައް ލީޑުނަގައިދިނީ އަހުމަދު އައިހަމް އެވެ. ކުރިން ޓީސީ ސްޕޯޓްސް ކްލަބަށް ކުޅުނު އައިހަމް ހާފުގެ މެދުތެރޭ އަރިމަތިން ހިލޭ ޖެހުމަކުން ފޮނުވާލި ބޯޅަ އެއްވެސް ކުޅުންތެރިއަކު ގައިގައި ނުޖެހި ވަނީ ގޯލަށެވެ. އެ ބޯޅަ ހުއްޓުވަން އީގަލްސްގެ ހަސަން އަލީފް މަސައްކަތް ކުރި ނަމަވެސް އޭނާ އަތުގައި ނުޖެހި ބޯޅަ ވަނީ ގޯލުގެ ކަނަށެވެ.

އޭދަފުށްޓައް ލީޑު ހިފަހައްޓާލެވުނީ އަށް މިނިޓް ވަންދެނެވެ. އީގަލްސް އަށް ނަތީޖާ އެއްވަރުކޮށްދިނީ މެޗުގެ 23 ވަނަ މިނިޓްގައި ހަސަން އަހުސަމް އެވެ. އޭރިއާ ބޭރުން އަހުސަމް ފޮނުވާލި ބޯޅަ ގޯލަށް ވަނީ ތިރިތިރިން ގޮހެވެ.

ދެ ވަނަ ހާފުގެ ކުޅުން ފަށައިގެން މިނެޓެއްގެ ތެރޭގައި އީގަލްސް އަށް ލީޑުނަގައިދޭން އެ ޓީމުގެ ކެޕްޓަން ހަސަން ރާއިފް (ހަންނަ) އަށް ވަނީ ރަނުގެ ފުރުސަތެއް ލިބިފަ އެވެ. އޭރިއާ ތެެރެއިން އޭނާ ޖެހި ބޯޅަ ދިޔައީ ހުރަސްދަނޑިމަތިންނެވެ.

އީގަލްސް އަށް ލީޑުނަގައިދިނީ މެޗުގެ 64 ވަނަ މިނިޓްގައި އިސްމާއިލް ވިފާގް އެވެ. އޭދަފުށީގެ ދެ ކުޅުންތެރިން ކައިރިން ނައްޓާލުމަށްފަހު އޭރިއާތެރެއިން ވިފާގު ޖެހި ބޯޅަ ގޯލަށް ވަނީ ދަނޑީގައި ޖެހިފަ އެވެ.

ނަތީޖާ ހަމަހަމަ ކުރަން އޭދަފުށީ ކުޅުންތެރިން ކުރިއަށް ޖެހިގެން ކުޅެމުން ދަނިކޮށް އީގަލްސްގެ ތިން ވަނަ ލަނޑު މެޗު ނިމެން ދެ މިނިޓަށް ވެފައިވަނިކޮށް ކާމިޔާބުކުރީ ހަންނަ އެވެ. ހާފުގެ މެދުތެރެއިން ލިބުނު ބޯޅައެއް ހިފައިގެން އޭރިއާތެރެއަށް ވަދެ ހަންނަ ވަނީ ގޯލުގެ ދުރު ކަނަށް ބޯޅަ އަމާޒުކޮށްލައިފަ އެވެ.

މުބާރާތުގައި މިއަދު ހަވީރު ކުޅޭ މެޗުގައި ށ. ފޯކައިދޫ ނުކުންނާނީ ދަ ގޭންގާ ދެކޮޅަށެވެ. އަދި މިރޭ ކުޅޭ މެޗުގައި ޓީސީ ބައްދަލުކުރާނީ ވިކްޓަރީ ސްޕޯޓްސް ކްލަބާ އެވެ.