ޔޫތު ޗެމްޕިއަންޝިޕުގެ ފަހު ތިން މެޗު ފަސްކޮށްފި

އެފްއޭއެމް 21 އަހަރުން ދަށުގެ ޔޫތު ޗެމްޕިއަންޝިޕް ފުޓްބޯޅަ މުބާރާތުގެ ސެމީ ފައިނަލް ދެ މެޗާއި ފައިނަލް މެޗު ފަސްކޮށްފި އެވެ.

އެފްއޭއެމުން މިއަދު ނެރުނު ބަޔާނެއްގައި ބުނެފައިވަނީ ހުކުރު ދުވަހު ކުޅޭގޮތަށް ތާވަލުކޮށްފައިވާ ސެމީ ފައިނަލް ދެ މެޗު ހޮނިހިރު ދުވަހަށް ފަސްކޮށްފައިވާ ކަމަށެވެ. މި ބަދަލާ އެކު ހޮނިހިރު ދުވަހު ހަވީރު ކުޅޭ މެޗުގައި ޓީސީ ސްޕޯޓްސް ކްލަބް ބައްދަލުކުރާނީ މިދިޔަ އަހަރުގެ ޗެމްޕިއަން ގްރީންއާ ދެކޮޅަށެވެ. އަދި ހޮނިހިރު ދުވަހުގެރޭ ކުޅޭ މެޗުގައި މުބާރާތުގެ އެންމެ ކާމިޔާބު ޓީމު އީގަލްސް ބައްދަލުކުރާނީ ދަ ގްރާންޑޭއާ އެވެ. ކުރިން ހޯމަ ދުވަހުގެރޭ ކުޅޭ ގޮތަށް އޮތް ފައިނަލް މެޗު ދެން ކުޅޭނީ އަންގާރަ ދުވަހުގެރޭ އެވެ.

އެފްއޭއެމްގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) ވިދާޅުވީ ޔޫތު މުބާރާތުގެ ސެމީ ފައިނަލް މެޗުތައް ފަސްކުރީ ރައީސް އިބްރާހިމް މުހައްމަދު ސޯލިހާއި ސަރުކާރުގެ އިސް ފަރާތްތަކެއް ބައިވެރިވެވަޑައިންނަވާ ހާއްސަ ކްރިކެޓް މެޗުތަކެއް މާދަމާ ރޭވިފައި އޮތުމުން ކަމަށެވެ.

"މެޗުތައް ފަސްކުރީ ރައީސް ބައިވެރިވެވަޑައިގަންނަވާ ހާއްސަ އިވެންޓެއް (ކްރިކެޓް މެޗު) އޮތީމަ. މީގެ ހުރިހާ ފަރާތްކަށް ވެސް އެންމެ ރަނގަޅު ގޮތަކީ ކޮބައިތޯ ބެލުން ވަރަށް މުހިއްމު އެހެންވެ މީޑިއާގެ ފަސޭހަތަކާއި ހުރިހާ ކަމަކަށް ވިސްނުމަށް ފަހު އަޅުގަނޑުމެން ނިންމި ނިންމުމެއް މިއީ،" ޖަވާ ވިދާޅުވި އެވެ.

އިންޑިއާ-މޯލްޑިވްސް ފްރެންޑްޝިޕް ކްރިކެޓް ސީރީސްގެ ނަމުގައި، ކުޅިވަރާ ބެހޭ މިނިސްޓްރީ އާއި ކްރިކެޓް ބޯޑް އަދި އިންޑިއާ އެމްބަސީ ގުޅިގެން ކޮންމެ އަހަރަކު ބާއްވަން ނިންމާފައިވާ ސީރީސްގެ ފުރަތަމަ މެޗުތައް އޮންނާނީ މާދަމާ ހެނދުނާއި މެންދުރު ކުޅިވަރު އެކުވެނީ އެއް ނަމްބަރު ދަނޑުގަ އެވެ. މާދަމާ ހެނދުނު ކުޅޭ މެޗުގައި ސްކޫލް ދައުރުގައި މޮޅަށް ކްރިކެޓް ކުޅުއްވި ރައީސް ސޯލިހު ކެޕްޓަންކަންކުރައްވާ ޓީމަށް ސަރުކާރުގެ އިސްވެރިންނާއި ކުރީގެ މަޝްހޫރު ކުޅުންތެރިން ވެސް ކުޅޭނެ އެވެ.

ދިހަ ޓީމު ވާދަކުރި މި ފަހަރުގެ ޔޫތު ޗެމްޕިއަންޝިޕްގެ ޝެޑިއުލް ރޭވިފައި އޮތް ގޮތާ މެދު ބައެއް ޓީމުތަކުގެ ކޯޗުންނާއި އޮފިޝަލުން ވަނީ ހިތްހަމަ ނުޖެހުން ފާޅުކޮށްފަ އެވެ. އަދި މެޗުތައް ތާވަލުކޮށްފައި ހުރި ގޮތުން ދެ ދުވަހުން މެޗެއް ކުޅެން ޖެހޭއިރު، ކުޅުންތެރިންނަށް އޭގެ ސަބަބުން އެންމެ ރަނގަޅު ކުޅުން ނުދެއްކޭ ކަމަށާއި އެހެންވެ މި މުބާރާތް ބޭއްވުމުގެ މަގުސަދު ހާސިލްނުކުރެވޭ ކަމަށް ޓީމުތަކުން ބުނެ އެވެ.

އެކާވީސް އަހަރުން ދަށުގެ ކުޅުންތެރިންނަށް ހާއްސަކޮށްގެން މި މުބާރާތް ކުރިއަށްގެންގޮސްގެން ގިނަ ކަންތައްތަކެއް ހާސިލްވެފައިވާތީ މިދިޔަ އަހަރު މި މުބާރާތް 19 އަހަރުން ދަށަށް ބަދަލުކުރީ އާ ކުޅުންތެރިންތަކަކަށް ފުރުސަތު ދިނުމުގެ ގޮތުންނެވެ. އެކަމަކު އަލުން 21 އަހަރުން ދަށަށް މި މުބާރާތް ބަދަލުކުރީ އާ ވިސްނުމެއްގައި ކުރިއަށް ދިއުމަށެވެ. އެއީ އެއް އަހަރު 21 އަހަރުން ދަށަށް، އަނެއް އަހަރު 19 އަހަރުން ދަށަށް ބާއްވާށެވެ. އޭރުން މި އަހަރު ވާދަކުރި ކުޅުންތެރިން އިތުރު ހަރުފަތަކަށް އަރައި އަންނަ އަހަރު ކުޅެން އާ ކުޅުންތެރިންތަކަކަށް ފުރުސަތު ލިބިގެންދާނެތީ އެވެ.