ދަ ގްރާންޑޭ: ފުޓްބޯޅައިން ކުރިއަށް ދިއުމުގެ އަމާޒުގައި

ދަ ގްރާންޑޭ އަމީގޯސް ނިއުޖެނެރޭޝަން ސްޕޯޓްސް ކްލަބަކީ މީގެ ފަސް ވަރަކަށް އަހަރު ކުރިން ޒުވާނުންތަކެއް އިސްކޮށް ތިބެ ދުރު ރާސްތާ ވިސްނުމެއްގެ ތެރެއިން ވުޖޫދުކުރި ކްލަބެކެވެ. އެ ވިސްނުމާ އެއްގޮތަށް ނަތީޖާ ނެރެން އެކުލަވާލި ޕްލޭންގެ ތެރެއިން މިދިޔަ އަހަރު ދެ ވަނަ ޑިވިޝަން ޗެމްޕިއަންކަން ހޯދައި މިހާރު އެ ޓީމު އޮތީ ރާއްޖޭގެ އެއް ވަނަ ކުޅިވަރު ކަމަށްވާ ފުޓްބޯޅައިގެ އެންމެ މަތީ ޑިވިޝަނުގަ އެވެ.

ޖީ.އޭ.އެން.ޖީ އިން ދަ ގްރާންޑޭ އަށް!

ދަ ގްރާންޑޭ އަމީގޯސް ނިއު ޖެނެރޭޝަން ސްޕޯޓްސް ކްލަބަށް ކުރުކޮށް ދަ ގޭންގް އޭ ވެސް ކިޔަ އެވެ. އެކަމަކު ހަގީގަތުގައި އެއީ އެ ކްލަބުން ކުރުކޮށް ނިސްބަތްކުރާ ގޮތެއް ނޫނެވެ. އަސްލު ގޮތަކީ ޖީ.އޭ.އެން.ޖީ މިހެނެވެ. އެކަމަކު ދަ ގޭންގް ގެ ނަން ވައިގައި ހިފުމުން ގޭންގެއްގެ ގޮތުގައި ލޭބަލް ވެދާނެތީ ނަން ބަދަލުކުރަން މަޖުބޫރުވީ އެވެ. މިހާރު އެ ކްލަބްގެ ނަމަކީ ދަ ގްރާންޑޭ ސްޕޯޓްސް ކްލަބް އެވެ.

"އަސްލު އެންމެ ފުރަތަމަ ވެސް އިންނާނީ ޖީ.އޭ.އެން.ޖީ. އެކަމަކު މެދުގައި މި އިންނަ ޑޮޓްތައް ގިނަ ބަޔަކަށް ފާހަގަނުވޭ. ކުރުކޮށް ޓީމުގެ ނަން ކިޔާއިރު ގޭންގްގެ ނަމުގައި ލޭބަލް ވަނީ. އެޔެއް ނޫން މި ކްލަބްގެ ރޫހަކީ. މިއީ އާއިލާއެއް. ގާތް އެކުވެރިންތަކެއްގެ ކްލަބެއް. އެހެންވެ ދާދި ފަހުން ގްރާންޑޭ ސްޕޯޓްސް ކްލަބަށް ބަދަލުރީ،" ކްލަބްގެ ޗެއާމަން ނަސީހު މުހައްމަދު (ނަސީ) "މިހާރަ"ށް ވިދާޅުވި އެވެ.

ދަ ގްރާންޑޭގެ ފުރަތަމަ ބޮޑު ފެނިލުން އައީ ފުޓްބޯޅައިގެ ތެރެއިން ނޫނެވެ. އެ ކްލަބް އެންމެ ފުރަތަމަ ފެނިގެންދިޔައީ ބާސްކެޓްބޯޅަ އިންނެވެ. ރާއްޖޭގައި ތިބި މަޝްހޫރު ގިނަ ކުޅުންތެރިންތަކެއް ޓީމުގައި ހިމަނައިގެން ނުކުމެ، 2016 ވަނަ އަހަރުގެ އެމްބީއޭ ކަޕް ކާމިޔާބު ކުރުމުން ބާސްކެޓްގައި އާ ޓީމެއްގެ ވިދުން ގަދަވާނެ ކަމަށް ބެލެވުނެވެ. ހަގީގަތުގައި އެއީ އެ ކްލަބުން ކުޅިވަރުގައި ކުރި ފުރަތަމަ ޓެސްޓެވެ. އެ ޓީމުގެ ވިސްނުން އޭރު ވެސް އޮތީ ފުޓްބޯޅައާ ދިމާލުގަ އެވެ.

"ބާސްކެޓަށް ދިޔައިރު ވެސް ހަގީގަތުގައި ފުޓްބޯޅަ އަށް އިސްކަމެއް އޮތީ. ފުޓްބޯޅައިގައި ތިން ވަނަ ޑިވިޝަނުގައި 2015 ވަނަ އަހަރު ކުޅެފައި 2016 ގައި ބާސްކެޓްގެ ތެރޭގައި އުޅެލީ. އެއީ އަޅުގަނޑު ވެސް ބާސްކެޓާ އޭރު ގާތްވީމަ. އެކަމަކު ފަހުން ދެ ވަނަ ޑިވިޝަނަށް ޓީމު ގެނެސް އެކުގައި މަސައްކަތް ފެށީ ފުރަތަމަ ޑިވިޝަނަށް ޓީމު ނަގަން. އެންމެ ފުރަތަމަ ކްލަބް ބޭނުންވީ ތިން އަހަރުން ފުރަތަމަ ޑިވިޝަނަށް އަންނަން. އެކަމަކު ހަތަރު އަހަރުން މިވީ. އިންޝާﷲ ވަރަށް ރަނގަޅަށް އޮތީ. ބޭނުންވަނީ ފުޓްބޯޅައިގެ ބްރޭންޑެއްގެ ގޮތުގައި މި ކްލަބް އޮންނަން،" ނަސީހު ވިދާޅުވި އެވެ.

ކްލަބް އަމިއްލަ ފައިމަތީގައި އޮތުން: އެންމެ ބޮޑު އަމާޒު

ދަ ގްރާންޑޭގައި ގިނައީ މ. މަޑުއްވަރީ އަށް ނިސްބަތްވާ ޒުވާނުންނެވެ. ކްލަބްގެ ކަންތައްތައް ހިންގުމަށް ފައިސާ އެއް ކުރަނީ ވެސް އެކުގަ އެވެ. އެ ކްލަބުން ފާހަގަކުރާ ގޮތުގައި އެންމެ ބޮޑު ދަތިތަކެއް ކުރިމަތިލާން ޖެހެނީ ސްޕޮންސަރުން ނުލިބުމެވެ. ރާއްޖޭގެ ދެ ސަރަހައްދެއްގައި އެކެޑަމީ ހިންގުން ވެސް މި ކްލަބުން ތަޖުރިބާ ކޮށްފި އެވެ. ކަންބޮޑުވުންތަކާ ކުރިމަތިލާން ޖެހެނީ އެކަށީގެންވާ ވަރަށް ސްޕޮންސަރުން ނުލިބުމެވެ.

"ވަރަށް ރަނގަޅު ޕްލޭންތަކެއް އަޅުގަނޑުމެންގެ އެބަހުރި. ބޭނުންވާ ވަރަށް ސްޕޮންސަރުން ނުލިބިގެން އަޅުގަނޑުމެން މީގެ ކުރިން ހުންނާނެ ހަމަ ފްރީކޮށް ރެސްޕެކްޓް މިހެން ޖަހައިގެން ޖޯޒީ ބޭނުންކޮށްފައި. ދަ ގްރާންޑޭ އިން ވަރަށް ބޮޑަށް ޕްރޮމޯޓްކުރާނެ ރެސްޕެކްޓް މި ސްލޯގަން. އެއީ މި ކްލަބުން ވަރަށް އިސްކަންދޭނެ މޮޓޯއެއް،" ނަސީހު ވިދާޅުވި އެވެ.

ރާއްޖޭގެ ފުރަތަމަ ޑިވިޝަނުގައި އަމިއްލަ ފައި މައްޗަށް ތެދުވެ، ބަރާބަރަށް މުސާރަދެވެނީ މާޒިޔާގައި އެކަންޏެވެ. އެހެން ކްލަބްތަކުގައި އެކި ފަހަރު މުސާރައިގެ ދަތިތަކެއް އުޅެ އެެވެ. ފުރަތަމަ ޑިވިޝަނަށް ދް ގްރާންޑޭ މި އަހަރު ފުރަތަމަ ފަހަރަށް ކުރިމަތިލާއިރު އެ ޓީމުގެ ހާއްސަ އަމާޒެއް އެބައޮތެވެ

"ދަރަންޏެއްގައި ކްލަބް ހިންގަން ބޭނުމެއް ނޫން. މި ކްލަބުން ބޭނުން ނަމޫނާ ކްލަބަކަށްވާން. ނުދެވޭނެ މުސާރަ އަކަށް ކުޅުންތެރިން ނުގެންނާނަން. ބޭނުންވަނީ ކުޅުންތެރިންނަށް ދޭން ޖެހޭ އުޖޫރަ ދީގެން ކުޅުންތެރިން ލައްވައި މަސައްކަތްކުރުވަން. އެއީ އެންމެ އިންސާފުވެރި ގޮތަކީ ވެސް،" ނަސީހު ވިދާޅުވި އެވެ.

މިދިޔަ ފަސް ވަރަަކަށް އަހަރަށް ބަލާއިރު، ފުރަތަމަ ޑިވިޝަނަށް އަލަށް ޕްރޮމޯޓްވި ކްލަބްތައް އަންނަނީ ފުރަތަމަ ޑިވިޝަނުގައި ފައިތިލަ ސާބިތުކުރަމުންނެވެ. ޓީސީ ސްޕޯޓްސް ކްލަބާއި ގްރީން ސްޓްރީޓްސް އަދި ޔުނައިޓެޑް ވިކްޓަރީ ވަނީ އެކަން ސާބިތުކޮށްދީފަ އެވެ. މި ޓީމުތައް ކުރިއަށް ދިޔައީ އަހަރުން އަހަރަށް ކުރިއަށް ވިސްނައިގެންނެވެ. އެ ކްލަބްތައް ފަދައިން ދަ ގްރާންޑޭގެ ވެސް ފުރަތަމަ އަހަރުގައި ބޮޑެތި ހަރަދުތަކެއް ކުރުމުގެ ވިސްނުމެއް ނެތެވެ.

ދަ ގްރާންޑޭ ފުރަތަމަ ޑިވިޝަނުގައި ފުރަތަމަ ނުކުތް މުބާރާތަކީ މިހާރު ކުރިއަށްދާ ޔޫތު ޗެމްޕިއަންޝިޕް ފުޓްބޯޅަ މުބާރާތެވެ. ތަޖުރިބާކާރު ކޯޗު އަހުމަދު ނާޝިދު (ނާދު)ގެ ބެލުމުގެ ދަށުން އެ ޓީމު ވަނީ ޔޫތު ޗެމްޕިއަންޝިޕްގެ ސެމީ ފައިނަލުގައި ކުޅެފަ އެވެ. ޔޫތު މުބާރާތުގައި ކުޅުނު ގިނަ ކުޅުންތެރިން ދަ ގްރާންޑޭގެ ސީނިއާ ޓީމުން ވެސް ފެންނާނެ އެވެ.

ނާދު ވަނީ ދަގްރާންޑޭ އަކީ ފުރަތަމަ ޑިވިޝަނަށް އާ ޓީމެއް ނަމަވެސް އެ ޓީމު ހިންގަން ތިބި ޒުވާން މެނޭޖްމަންޓަށް ތައުރީފުކޮށްފަ އެވެ. އަދި ކްލަބެއްގެ ގޮތުގައި ކުރިއަށްދާން ބަލާއިރު ދަ ގްރާންޑޭ އަކީ ރަނގަޅު މިސްރާބެއްގައި އޮތް ޓީމެއް ކަމަށް ނާދު ފާހަގަކުރި އެވެ.

އެފްއޭއެމުން ކުޅުންތެރިންގެ މުސާރައިގެ އޮނިގަނޑެއް އެކުލަވާލާފައި އޮތް އަހަރެއްގައި ފުރަތަމަ ޑިވިޝަނަށް އައުމަކީ ނަސީބެއްގެ ގޮތުގައި އެ ކްލަބުން ދެކޭ ގޮތުގައި ލިބުނު ނަސީބެކެވެ. މި ފަހަރުގެ ސީޒަން ޖޫން މަހު ފަށަން ނިންމާފައިވާއިރު، ދަ ގްރާންޑޭ އިން ވެސް އަންނަނީ ޓީމެއް އެކުލަވާލުމުގެ މަސައްކަތް ކުރަމުންނެެވެ.

"ވަރަށް ރަނގަޅަށް ތައްޔާރުވެގެން ވަރަށް ސަޕްރައިޒިން ޓީމެއް ފެންނާނެ މި އަހަރު ދަ ގްރާންޑޭ އިން،" ނަސީހު ވިދާޅުވި އެވެ.