ނިއު ބަލިކޮށް މާޒިޔާ ހަ ޕޮއިންޓުގެ ލީޑެއް ނަގައިފި

އުރީދޫ ދިވެހި ޕްރިމިއާ ލީގުގައި މިއަދު ހަވީރު އެންމެ ފަހުގެ ޗެމްޕިއަން ނިއު ރޭޑިއަންޓް އަތުން 2-0 އިން މޮޅުވެ ލީގުގެ އެއް ވަނައިގައި މާޒިޔާ ހަ ޕޮއިންޓުގެ ލީޑެއް ނަގައިފި އެވެ.

މި މޮޅާ އެކު މާޒިޔާ ލީގުގެ އެއް ވަނައިގައި އޮތީ 15 މެޗުން 34 ޕޮއިންޓު ހޯދައިގެންނެވެ. ދެ ވަނައިގައި އޮތް އީގަލްސް އަށް ލިބިފައިވަނީ 28 ޕޮއިންޓެވެ. ނިއު ހަ ވަނައިގައި އޮތީ 15 މެޗުން 16 ޕޮއިންޓް ހޯދައިގެންނެވެ.

މި މެޗަށް ނުކުތްއިރު ނިއު އޮތީ އެންމެ ފަހުން ކުޅުނު މެޗުން ވެލެންސިއާ ބަލިކޮށް ރަނގަޅު ފޯމެއްގަ އެވެ. ލީގުގެ ދެ ވަނައިގައި އޮތް އީގަލްސް ރޭ ކުޅުނު މެޗުން އެއްވަރުވުމުން މާޒިޔާ ނުކުތީ އެ ޓީމުގެ ލީޑުފުޅާކުރާށެވެ.

މެޗުގެ ފުރަތަމަ ހަމަލާ އުފެއްދީ މާޒިޔާ އިންނެވެ. މެޗު 13 ވަނަ މިނިޓްގައި ނިއުގެ އޭރިއާ ބޭރުން މުހައްމަދު އުމެއިރު ހިލޭ ޖެހުމަކުން ފޮނުވާލި ބޯޅަ ނިއުގެ ޖަޕާން ކީޕަރު ޖުން ކޯޗީ ވަނީ މަތަކޮށްފަ އެވެ.

ނިއު އިން އައީ މި ހާފްގައި ކައުންޓަ އެޓޭކްގައި މާޒިޔާ އަށް ނުރައްކާ ކުރަމުންނެވެ. އެގޮތުން މެޗުގެ 19 ވަނަ މިނިޓްގައި އެ ޓީމުގެ ހަމްޒާ މުހައްމަދު (ހަމްޕު) ގޯލު ކުރިމައްޗަށް ހުރަސްކޮށްލި ބޯޅަ ނިއުގެ ކޮސޯވޯ ފޯވާޑް އަޑިސް ސަހީލީ އަށް ލިބުމުގެ ކުރިން މާޒިޔާގެ ޑިފެންޑަރު ޖިވްކޯ ޑިނޭފް ވަނީ ބޭރުކޮށްލައިފަ އެވެ.

އޭގެ ތިން މިނިޓް ފަހުން ނިއު އޭރިއާ ބޭރުން ނިއުގެ އަލީ ޝާމިއު ފޮނުވާލި ބޯޅަ ދިޔައީ ހުރަސް ދަނޑިމަތިންނެވެ.

މި ހާފްގައި މާޒިޔާ އަށް ލީޑުނަގައިދޭން އަލީ އަޝްފާގު (ދަގަނޑޭ) އަށް ރަނގަޅު ދެ ފުރުސަތެއް ލިބުނެވެ. ނިއު އޭރިއާ ތެރެއަށް ބޯޅަ ހިފައިގެން ވަދެ ފޮނުވާލި ފުރަތަމަ ބޯޅަ އަރިމަތިން ބޭރަށް ދިޔައިރު، އޭގެ ހަ މިނިޓް ފަހުން ނިއު އޭރިއާ ތެރެއިން ލިބުނު ދެ ވަނަ ބޯޅަ ގޯލަށް ފޮނުވާލުމުގެ ކުރިން ނިއުގެ ޑިފެންޑަރުން ވަނީ ބްލޮކް ކޮށްފަ އެވެ.

ދެ ވަނަ ހާފް ފެށިގެން މެޗުގެ 53 ވަނަ މިނިޓްގައި ނިއުގެ ހަމްޕު އެ ޓީމަށް ލީޑު ނަގައިދިނުމާ ގާތަށް ޖެހިލި އެވެ. އޭރިއާ ބޭރުން ހަމްޕު ފޮނުވާލި ބޯޅަ މާޒިޔާގެ ކީޕަރު އިމްރާން މުހައްމަދު ވަނީ ކޯނަރަކަށް ބޭރުކޮށްލައިފަ އެވެ.

މާޒިޔާ އިން ލީޑުނެގީ މެޗުގެ 63 ވަަނަ މިނިޓްގައި ނިއުގެ ކެޕްޓަން މުހައްމަދު ރަޝީދު (ހޮކޭ) އަތުން ބައިކޮޅަށް ވަން ލަނޑުންނެވެ. އުމެއިރު އަރިމަތިން ނަގައިދިން ބޯޅަ ހޮކޭ ބޭރަށް ފޮނުވާލަން މަސައްކަތްކުރި ނަމަވެސް އެ ބޯޅަ ވަނީ ބައިކޮޅަށެވެ.

މާޒިޔާ އިން ލީޑުނެގުމުން ނިއު އިން ކުރިއަށް ޖެހި ރަނގަޅު ފުރުސަތުތަކެއް ތަނަވަސްކުރި އެވެ. އެގޮތުން ނިއުގެ ފޯވާޑް ސަހީލީ އަށް ހުސް ދެ ފުރުސަތެއް ލިބި ވަނީ ބޭކާރުވެފަ އެވެ. މެޗުގެ 71 ވަނަ މިނިޓްގައި މާޒިޔާ އޭރިއާ ތެރެއިން ސަހީލީ އަށް ލިބުނު ފުރަތަމަ ބޯޅަ އޭނާ ފޮނުވާލުމުން ކީޕަރު އިމްރާން ވަނީ މަތަކޮށްފަ އެވެ. އޭގެ ދެ މިނިޓް ފަހުން މާޒިޔާ އޭރިއާ ތެރެއިން ހުސްކޮށް ލިބުނު ބޯޅަ ސަހީލީ ފޮނުވާލި ނަމަވެސް މާޒިޔާ ޑިފެންޑަރުން ވަނީ ބްލޮކް ކޮށްފަ އެވެ.

މެޗު ނިމެން 15 މިނިޓަށް ވެފައިވަނިކޮށް ބަދަލު ކުޅުންތެރިއެއްގެ ގޮތުގައި ދެ ވަނަ ހާފްގައި ކުޅެން އެރި ނިއުގެ ފޯވާޑް މުހައްމަދު މުސްލިހު (މުއްޓި) ވެސް ވަނީ ރަނގަޅު ހަމަލާއެއް ފޮނުވާލައިފަ އެވެ. މާޒިޔާ ތިން ކުޅުންތެރިއަކު ކައިރިން ނައްޓާލުމަށް ފަހު މުއްޓި ފޮނުވާލި ބޯޅަ ދިޔައީ ދަނޑިކައިރިން ބޭރުންނެވެ.

ނިއު އަށް ލިބުނު ފުރުސަތުތަކުގެ ބޭނުން އެޓީމަށް ނުހިފުނުއިރު މާޒިޔާ އިން ވަނީ ބަދަލުތަކާ އެކު ކުޅުން ރަނގަޅުކޮށްފަ އެވެ. މާޒިޔާގެ ދެ ވަނަ ލަނޑު މެޗުގެ 85 ވަނަ މިނިޓްގައި ޖެހީ ބަދަލު ކުޅުންތެރިއެއްގެ ގޮތުގައި ކުޅެން އެރި އަހުމަދު ނާޝިދު (ނައްޓޭ) އެވެ. އިސްމާއިލް އީސާ ހުސްކޮށްލާފައި އޭރިއާ ތެރެއިން ދަގަނޑޭ އަށް ދިން ބޯޅަ އޭނާ ގޯލު ކުރިމައްޗަށް މަތިން ހުރަސް ކޮށްލުމުން ނައްޓޭ ވަނީ ހަމަޖެހިލާފައި ބޮލުން ބޯޅަ ގޯލުގެ ތެރެއަށް ފޮނުވާލައިފަ އެވެ.

މާޒިޔާ ވަނީ ލީގުގެ ތިން ބުރުގައި ވެސް ނިއުގެ މައްޗަށް ކުރިހޯދައިފަ އެވެ.

ލީގުގައި މިރޭ ކުޅޭނީ ވިކްޓަރީ އާއި ވެލެންސިއާ އެެވެ. މި މެޗަށް ފަހު ގައުމީ ޓީމު ކުޅޭ ތިން މެޗަށް ލީގު މެދުކަނޑާލުމަށް ފަހު ދެން ފަށާނީ އަންނަ މަހުގެ 14 ވަނަ ދުވަހު އެވެ.