ސަރުކާރުގެ ޔަގީންކަމެއް ނެތުމުން އެފްއޭއެމުން ކްލަބްތަކަށް ފައިސާ ދެނީ

ކުރީގެ ސަރުކާރުން ފެށި ސްޓޭޓް އޯންޑް އެންޓަޕްރައިޒަސް އެސިސްޓަންޓްސް (އެސްއޯއީ) ޕްރޮގްރާމުގެ ދަށުން ސަރުކާރު ކުންފުނިތަކުން މި އަހަރު ކްލަބްތަކަށް ފައިސާ ލިބޭނެ ކަމުގެ ޔަގީންކަމެއް ނެތުމުން އެފްއޭއެމުން ކްލަބްތަކަށް މާލީ އެހީތެރިކަން ފޯރުކޮށްދިނުމަށް ނިންމާފައިވާ ކަމަށް އެ އެސޯސިއޭޝަނުގެ ރައީސް ބައްސާމް އަދީލް ޖަލީލް ވިދާޅުވެއްޖެ އެވެ.

އެފްއޭއެމުން މިދިޔަ ޖެނުއަރީ މަހު ނެރުނު ބަޔާނެއްގައި ބުނެފައިވަނީ ރައީސް އިބްރާހިމް މުހައްމަދު ސޯލިހާ އެކު އެފްއޭއެމްގެ ރައީސް ބައްސާމް ބޭއްވެވި ބައްދަލުވުމަށް ފަހު މި އަހަރު ވެސް ރާއްޖޭގެ ކްލަބްތަކަށް އެސްއޯއީގެ ތެރެއިން ސަރުކާރުގެ ކުންފުނިތައް މެދުވެރިކޮށް ފައިސާ ލިބޭނެ ކަމަށާއި އެކަމަކު އަންނަ އަހަރު ފެށިގެން އެ ފައިސާ ދޭނީ އެފްއޭއެމުން ކަމަށެވެ.

އެކަމަކު އޭގެ ފަހުން ފެނިގެންދިޔައީ ސަރުކާރުގެ ކުޅިވަރާ ބެހޭ މިނިސްޓަރު އަހުމަދު މަހުލޫފާއި އެފްއޭއެމްގެ ލީޑަޝިޕާ ދެމެދު މައްސަލަތަކެއް ޖެހުނު މަންޒަރެވެ. އެފްއޭއެމްގެ ލީޑަޝިޕް ބަދަލުކުރުމަށް ކުޅިވަރާ ބެހޭ ވަޒީރު މަހުލޫފު މަސައްކަތްކުރައްވަމުން އަންނަ ކަމަށް އިދާރާ އިން ތުހުމަތުތަކެއް ކުރިި އެވެ.

މިނިސްޓަރު މަހުލޫފު "މިހާރަ"ށް ދެއްވި އިންޓަވިއުއެއްގައި ވިދާޅުވެފައިވަނީ މިދިޔަ ސަރުކާރުން ކުންފުނިތައް މެދުވެރިކޮށް ކްލަބްތަކަށް ފައިސާ ދިނީ އެއްވެސް އުސޫލެއްގެ ތެރެއިން ނޫން ކަމަށާއި އެކަން ބަދަލުކުރަން ޖެހޭނީ މުޅި ރާއްޖޭގެ ފުޓްބޯޅަ އަށް ފައިދާކުރާނެ ގޮތަކަށް ކަމަށެވެ.

އަދި މަހުލޫފު ވިދާޅުވީ މި ފަހަރު ކްލަބްތަކަށް ސަރުކާރުގެ ކުންފުނިތައް މެދުވެރިކޮށް ފައިސާ ދޭނީ ސަރުކާރުން އެފްއޭއެމް ރަނގަޅު ކުރަން ކުރާ މަސައްކަތަށް އެއްބާރުލުން ދޭ ކްލަބްތަކަށް ކަމަށެވެ. އޭގެ ފަހުން ވިކްޓަރީން އެފްއޭއެމްގެ ލީޑަޝިޕްގެ އިތުބާރު ނެތްކަމުގެ މައްސަލަ ހުށަހަޅައި އެކްސްޓްރާ އޯޑިނަރީ ކޮންގްރެސެއް ބޭއްވުމަށް ހުށަހަޅާފައިވަނިކޮށް ފީފާ އިން ވަނީ އެފްއޭއެމްގެ ކަންތައްތަކަށް ތިން ވަނަ ފަރާތެއްގެ ނުފޫޒު ފޯރާނަމަ ރާއްޖެ ސަސްޕެންޑްކުރަން ޖެހިދާނެ ކަމަށް ބުނެ އިންޒާރު ދީފަ އެވެ.

ބައްސާމް މިއަދު ވިދާޅުވީ ސަރުކާރާ އެކު ވެސް ކޮންމެވެސް ވަރަކަށް މަޝްވަރާކުރެވުނު ކަމަށާއި އެކަމަކު މިއަދާ ހަމައަށް އައިއިރު ވެސް އޭގެ ޖަވާބެއް ނުލިބޭ ކަމަށެވެ.

އެމްއެމްޕީއާރްސީގެ ހިޔާނާތުގެ ފައިސާ ލިބިފައިވާ ކަމުގެ ތުހުމަތާ ގުޅިގެން މަހުލޫފް ގޭގައި މަޑުކުރަން ރައީސް އެންގެވުމުން، އެ މިނިސްޓްރީ ވަގުތީ ގޮތުން ހިންގެވުމާ ހަވާލުވެވަޑައިގެންނެވި ޓޫރިޒަމް މިނިސްޓަރު އަލީ ވަހީދުއާ އެކު ބޭއްވި ބައްދަލުވުމުގައި ވެސް ކްލަބްތަކުން އެސްއޯއީގެ ފައިސާ ލިބޭނެ ގޮތަކާ ބެހޭގޮތުން ވާހަކަދެއްކި ކަމަށް ކްލަބްތަކުން ބުނެ އެވެ.

ސަރުކާރުގެ ފަރާތުން މަޝްވަރާކުރެވުނު ކަންތައްތަކަށް އެއްބާރުލުމެއް ނުލިބުމާ އެކު އެފްއޭއެމުން ކްލަބްތަކަށް އެހީތެރިވުމަށް އިސްނަގަން ޖެހުނީ ކަން ބައްސާމް ވަނީ ފާހަގަކުރައްވައިފަ އެވެ.

"އެފްއޭއެމްގެ ޒިންމާއެއް އެއީ ސީޒަނަށް ތައްޔާރުވަމުން އަންނަ ކްލަބްތަކަށް ފޯރުކޮށްދޭން ޖެހޭ އެހީތެރިކަން ފޯރުކޮށްދިނުމަކީ. އެފްއޭއެމުން ނިންމީ ވަކި މުއްދަތަކަށޭ އެފްއޭއެމަށް ވެސް ކަންތައްތައް ނުރާވާ ތިބެވޭނީ. އެހެންވީމަ އަޅުގަނޑުމެން ނިންމީ އެފްއޭއެމުން އެ އެހީތެރިކަން ކްލަބްތަކަށް ދޭން،" ބައްސާމް ވިދާޅުވި އެވެ.

އާ ސީޒަނަކަށް ފުޓްބޯޅަ ކްލަބްތަކުން ތައްޔާރުވަމުން އަންނައިރު، ގިނަ ހަރަދުތަކެއް ކުރަން ޖެހޭ ކަމަށާއި އެހެންކަމުން މި ވަގުތު ކްލަބްތަކަށް އެފްއޭއެމްގެ އެހީތެރިކަން ބޭނުންވެފައި އޮތުމުން އެކަން ކުރަން ބޭނުންވި އެވެ. އެ ގޮތުން މި މަހު 25 ވަނަ ދުވަހު އޮންނަ އެފްއޭއެމްގެ ކޮންގްރެސްގައި ބަޖެޓް ފާސްކުރާއިރު ކްލަބްތަކަށް ދޭނެ ފައިސާ ވެސް އޭގެ ތެރޭގައި ހިމެނިގެންދާނެ ކަމަށް ބައްސާމް ވިދާޅުވި އެވެ.

"ބަޖެޓް ފާސްވުމާ އެކު ކްލަބްތަކާ ހަމައަށް ފޯރުކުރެވިގެންދާނެ. އެފްއޭއެމް އަކީ ކްލަބްތަކުގެ ތަނެއް. އެއީކީ އަޅުގަނޑުގެ ތަރިކަ މުދަލެއް ނޫން. އަޅުގަނޑު ބޭނުންހާ ގޮތަކަށް ކަންތައް ކުރާކަށް. ވަކި މީހެއްގެ ތަނެއް ނޫން. މިއީ ހަމަ އެފްއޭގެ މެމްބަރު ކްލަބްތަކުގެ ތަނެއް. އެބޭފުޅުން އެ ކްލަބްތައް ބޭނުންވާ ކަމެއް އޮވެއްޖިއްޔާ އަޅުގަނޑުމެން އެ ގޮތަކަށް ކުރިއަށްގެންދާނަން،" ބައްސާމް ވިދާޅުވި އެވެ.

މީގެ ކުރިން އެފްއޭއެމުން ސަރުކާރަށް އެހާ ބޮޑު ބަރޯސާވުމެއް ނެތި ކްލަބްތަކަށް އެހީތެރިކަން ފޯރުކޮށްދޭ ވާހަކަ އަށް ކުޅިވަރާ ބެހޭ ވަޒީރު މަހުލޫފު ވަނީ ފާޑުވިދާޅުވެފަ އެވެ. އޭނާ ވިދާޅުވީ ކްލަބްތަކަށް ދޭން ޖެހޭ އިނާމް ފައިސާ އެފްއޭއެމަށް ނުދެވިގެން އުޅޭއިރު، ކްލަބްތަކަށް ބޮޑު އަދަދެއްގެ ފައިސާ ދެވޭނެ ގޮތެއް ނޯންނާނެ ކަމަށެވެ.

ބައްސާމް މިއަދު ވިދާޅުވީ އެފްއޭއެމަކީ ރާއްޖެ އާއި ރާއްޖޭން ބޭރުގެ އެކި ސްޕޮންސަރުންގެ އެހީގައި ހިންގާ އިދާރާއެއް ކަމަށާއި ކްލަބްތަކަށް އެހީތެރިކަން ފޯރުކޮށްދޭނީ "ރަނގަޅު ގޮތުގައި ހަލާލު ގޮތުގައި ހޯދާ ފައިސާ" އިން ކަމަށެވެ.

އެފްއޭއެމުން ކްލަބްތަކަށް މާލީ އެހީތެރިކަން ފޯރުކޮށްދޭއިރު އެހީތެރިކަން ހޯދަނީ ޔޫއޭއީ އިން ކަމަށް ވާހަކަ ދެކެވުނެވެ. ބައްސާމް ވިދާޅުވީ އެފްއޭއެމުން ވަނީ އެސޯސިއޭޝަންތަކާ (ގައުމު) އެކު މެމޮރަންޑަމް އޮފް އަންޑަސްޓޭންޑިން (އެމްއޯޔޫ) އެއްގައި ސޮއިކޮށްފައި ކަމަށާއި މުސްތަގުބަލުގައި ވެސް އެގޮތަށް ކުރިއަށްދާއިރު އެކި ފަރާތްތަކުގެ އެހީތެރިކަން ހޯދާނެ ކަމަށެވެ. އެގޮތުން މިހާރު ގަތަރާ އެކު އެމްއޯޔޫ އެއްގައި ސޮއިކޮށްފައިވާއިރު، ޔޫއޭއީ އާއި ސައުދީ އަރަބިއާއާ އެކު ވެސް ވަރަށް އަވަހަށް އެއްބަސްވުމަކަށް އާދެވޭނެ ކަމަށް އުއްމީދުކުރާ ކަމަށް ވިދާޅުވި އެވެ.

"އަޅުގަނޑުމެންނަށް އެހީތެރިކަން ފޯރުކޮށްދޭ ފަރާތްތަކާ އެކު އެއްބަސްވެގެން ކުރިއަށްދާނީ. އަޅުގަނޑުމެންގެ ބޭނުމަކީ ލިބެން އޮތް ހުރިހާ އެހީތެރިކަމެއް ހޯދަައިގެން ދިވެހިރާއްޖޭގެ ފުޓްބޯޅަ މިހާރު އޮތް ހާލަތުން އެހެން ހަރުފަތަކަށް ޖައްސާލުން،" ބައްސާމް ވިދާޅުވި އެވެ.

މިދިޔަ ސަރުކާރުގެ އިސްނެގުމާ އެކު 2017 ވަނަ އަހަރު ފެށި އެސްއޯއީ އެސިސްޓަންޓްސް ޕްރޮގްރާމުގެ ދަށުން ފުރަތަމަ ޑިވިޝަންގައި ވާދަކުރާ ޓީމުތަކުގެ ތެރެއިން ކޮންމެ ޓީމަކަށް ދެ މިލިއަން ރުފިޔާ ދެ އެވެ. އަދި ޕްރިމިއާ ލީގަށް ހޮވިއްޖެނަމަ އިތުރު އެއް މިލިއަން ރުފިޔާ ދެ އެވެ. މިދިޔަ އަހަރުގެ ނިޔަލަށް އެސްއޯއީގެ ކުރީގެ އެއްބަސްވުންތައް ވަނީ ހަމަވެފަ އެވެ.

އެސްއޯއީގެ ތެރެއިން ސަރުކާރު ހިއްސާވާ 12 ކުންފުނި މެދުވެރިކޮށް 26 މިލިއަން ރުފިޔާ އަހަރަކު ފުޓްބޯޅަ އަށް ހަރަދުކުރާ ގޮތަށް އެއްބަސްވުމުގައިވެ އެވެ. ތަފާސް ހިސާބުތަކުން ދައްކާގޮތުގައި މިދިޔަ ދެ އަހަރެއްހާ ދުވަހު ދައުލަތުގެ ހިއްސާ އޮންނަ ކުންފުނިތަކުން ފުޓްބޯޅަ އަށް ކުރި ހަރަދުތައް 60 މިލިއަން ރުފިޔާއާ ގާތްކުރާނެ އެވެ. އެކަމަކު އޭގެން ގިނަ ކްލަބްތަކަށް އެންމެ އެކަށީގެންވާ ފައިދާތަކެއް ނުކުރާ ކަމަށް ގިނަ ބަޔަކު ބުނާ ސަބަބަކީ މިދިޔަ ސީޒަން ނިމުނުއިރު، މާލީ ގޮތުން ގިނަ ކްލަބްތަކެއް އަޑިގަނޑެއްގެ ތެރޭގައި އުޅޭތީ އެވެ.

އެފްއޭއެމުން މި އަހަރު ކްލަބްތަކަށް ފައިސާ ދޭނެ ސީދާ އަދަދެއް ހާމަކޮށްފައިނުވާއިރު، އެކަން އެނގިގެންދާނީ މި މަހު 25 ވަނަ ދުވަހު އެ އިދާރާގެ އަހަރީ އާންމު ޖަލްސާއިން ފާސްކުރާ ބަޖެޓުންނެވެ.