އަރަބިން އިޒްރޭލު ނުހުއްޓުވާނެ، އޮތީ އެމެރިކާގެ ދަށުވެފައި

ފަލަސްތީނުގެ ރައްޔިތުންގެ ނަސްލު ނައްތާލުމުގެ ހަނގުރާމަ އަކީ ހަމާސް އިން މި މަހުގެ ހަތް ވަނަ ދުވަހު އެރި އިރާ އެކު، އިޒްރޭލު ސިއްސުވާލި ހަމަލާތަކުގެ ބަދަލު ހިފަން ފެށި ކަމެއް ނޫނެވެ. އެއީ ފަލަސްތީނު އިސްތިއުމާރުކޮށްގެން ތިބި އިނގިރޭސިންގެ ނުބައި ރޭވުމުގެ ދަށުން، ޔޫރަޕްގެ ކަންކޮޅުތަކުން ޔަހޫދީން ފަލަސްތީނަށް ޖަމާކޮށް އެތަނުގައި ޔަހޫދީންގެ ދައުލަތެއް އުފައްދަން 1948 ވަނަ އަހަރު ޒަޔަނިސްޓު ބާރުތަކުން ފަށައި މިއަދާ ހަމަޔަށް ވެސް ކުރިއަށްދާ، ދުނިޔޭގައި އެފަދައެއް ނެތް ބޮޑު ޖަރީމާއެކެވެ.

ފަލަސްތީނުގެ ނަސްލު ނައްތާލަން ޒަޔަނިސްޓުން 1948 ވަނަ އަހަރު ފެށި އަނިޔާވެރި ހަމަލާތަކާ އެކު އަރަބި ގައުމުތައް އެކަތިގަނޑަކަށްވެ އެއީ ސީދާ އަރަބިންގެ މަސްލަހަތު އޮތް އެ ގައުމުތަކުގެ އަމިއްލަ ކަމެއްގެ ގޮތުގައި ދެކިގެން ފަލަސްތީނުގެ ހިމާޔަތުގައި ނުކުތެވެ.

އެކަމަކު ފަލަސްތީނަށްޓަކައި އަރަބި ގައުމުތަކުގައި މިހާރު ކުރެވޭހާ ވެސް ކަމަކީ ބަޔާން ނެރުމާއި މުޒާހަރާކުރުމެވެ.

އަރަބި ގައުމުތަކުގެ އެންމެ ގާތް އަދި މުހިންމު ބައިވެރިޔަކަށް މިހާރު އޮތީ ކޮންމެ ހާލަތެއްގައި ވެސް އިޒްރޭލު ހިމާޔަތްކުރުމަށް ވައުދުވާ އެމެރިކާ އެވެ. ކޮންމެ ކަމެއްގައި ވެސް ޑިމޮކްރަސީއަށް ވަކާލާތުކުރާ އެމެރިކާއަށް އަރަބި އެކުވެރި ގައުމުތަކުގައި އެއީ މުހިންމު ކަމަކަށް ނުވެ އެވެ. އަރަބި ގައުމުތަކުގެ ވެރިން އާރާއި ބާރު ދެމެހެއްޓުން، ފަލަސްތީނުގެ މައްސަލައަށް ވުރެ އިސްކޮށް އެ ވެރިންގެ ބާރުވެރިކަން ދެމެހެއްޓުމުގެ އެންމެ ބޮޑު އެހީތެރިޔަކީ އިޒްރޭލު ހިމާޔަތްކުރާ އެމެރިކާ އެވެ.

ފަލަސްތީނަކީ އަރަބި ދުނިޔޭގައި މިހާރު އިސްތިއުމާރުވެފައި އޮތް ހަމަ އެކަނި ގައުމެވެ. ނަމަވެސް އެކަން ނިމުމަކަށް ގެނައުމުގެ ބަދަލުގައި އަރަބި ގައުމުތަކުން މިހާރު ސިޔާސީ ގޮތުން އެންމެ ބޮޑު އިސްކަމެއް ދީގެން އުޅޭ އެއް ކަމެއްގެ ގޮތުގައި ފެންނަނީ އިޒްރޭލުން ފަލަސްތީނުގެ ބިންތައް އެންމެ ފުރަތަމަ ފޭރިގަތް އިރު އިޒްރޭލާ ގުޅުން ކަނޑާލާފައި އޮތް އޮތުން ނިމުމަކަށް ގެނެސް ސުލްހަ ވުމަށެވެ. މިކަމުގެ ފަހަތުގައި ވެސް އޮތީ އެމެރިކާގެ ރުހުން ހޯދައި، އަރަބި ވެރިންނަށް ގިނަ ދުވަހު ވެރިކަމުގައި ތިބެވޭނެ ފުރުސަތު ހޯދުމެވެ.

މި މަންޒަރާ އެކު އެހެން ކަމެއް ވެސް ވަނީ ބަދަލުވެފަ އެވެ. ފަލަސްތީނުގެ ހައްގުގައި އަރަބި ގައުމުތަކުގެ އާންމުން ކުރިން އަޑު އުފުލި ގޮތަށް މިހާރު އެކަމެއް ވެސް ނުކުރެވެ އެވެ. އިޒްރޭލާއި އެމެރިކާއާ ދެކޮޅު ވިސްނުން ގައުމުގައި އޮތްކަން ސިއްރުކުރުމަށް، ހިޔާލު ފާޅުކުރުމުގެ މިނިވަންކަން ވެސް އެބަ ހިފަހައްޓަ އެވެ. އެމެރިކާގެ މަދަދާ އެކު ވެރިކަން ދަމަހައްޓާ ވެރިން ރައްޔިތުންގެ އަސާސީ މިފަދަ ހައްގުތައް ހަނިކުރިޔަސް، އެއީ އިޒްރޭލާއި އެމެރިކާގެ މަސްލަހަތާ ގުޅޭ ކަމެއް ނަމަ ޑިމޮކްރަސީގެ ޗެމްޕިއަން ކަމަށް ބުނާ އެމެރިކާއަށް އެއީ އެއްވެސް މައްސަލައެއް ނޫނެވެ.

އަނެއްކޮޅުން، ފަލަސްތީނަށްޓަކައި އަރަބި ގައުމުތަކުގެ ވެރިން އެކަށީގެންވާ ގޮތުގައި މަސައްކަތް ނުކުރާތީ އެކަމާ ދެކޮޅަށް އުފުލާ އަޑުތައް ވެސް މަޑުކުރުވައިފި އެވެ. ރައްޔިތުންގެ ފަރާތުން ކުރިމަތިވާ މި ޕްރެޝަރު ކުޑަކޮށްލަން ކޮންފަރެންސްތައް ބާއްވައި ބަޔާންތައް ނެރުން ފަދަ ދަޅަ ދެއްކުމެއް ނޫނީ ނެތެވެ.

މެދުއިރުމަތީގެ ކަންކަން ނިންމުމުގެ ބާރު އެމެރިކާއަށް

މެދުއިރުމަތީގެ ސުލްހަ ގުޅިފައި އޮތީ ފަލަސްތީނަށެވެ. އެކަމަކު އަރަބި ގައުމުތަކުގެ ސިޔާސަތު ބައްޓަންކޮށްފައި މިހާރު އޮތީ މި ސުލްހައިގެ މަސައްކަތް އެމެރިކާ އިސްވެ އޮވެ ކުރިއަށް ގެންދާ ގޮތަށެވެ. އެހެންވެ ނަތީޖާ އަކީ އިޒްރޭލަށް ފިއްތުމެއް އަންނަ އެއްވެސް ނިންމުމެއް ސުލްހައިގެ މަސައްކަތުގެ ތެރެއިން ނުކުރުމެވެ. މިކަމުގެ އިތުރުން އިޒްރޭލާ އެކު އަރަބި ގައުމުތަކުގެ ގުޅުން "ނޯމަލައިޒް" ކުރުމުގެ މަސައްކަތް ވެސް އެމެރިކާ އިން ވަނީ ވަރުގަދަކޮށްފަ އެވެ.

އަރަބި ވެރިންގެ ހުރިހާ އުންމީދެއް އެމެރިކާ އަށް ބަރޯސާކޮށްގެން މި ކުރާ މަސައްކަތުން ހުރިހާ މޮޅެއް ހަގީގަތުގައި އޮތީ އިޒްރޭލަށެވެ. އެއީ ފަލަސްތީނަށްޓަކައި އިސް ސަފުގައި މަސައްކަތްކުރަން ތިބި ގައުމުތަކުން އިސްކަންދޭ ލިސްޓުގެ ފަހަތަށް ފަލަސްތީނު ވެއްޓޭތީ އެވެ. އިޒްރޭލުގެ ލާއިންސާނީ އަމަލުތަކާ ދެކޮޅަށް ބަހެއް ބުނެލުން ވެސް، އެމެރިކާ ނުރުހޭ ކަމަކަށް ވެދާނެތީ އުޅެންޖެހުމުން އިޒްރޭލަށް ވަނީ އަނިޔާވެރިކަން އިސްކުރުމަށް އިތުރަށް ހިތްވަރު ލިބިފަ އެވެ.

ފަލަސްތީނު ރައްޔިތުންނަށް ތަސައްލީއެއް ލިބޭނެ ނިންމުމެއް ނުވަތަ ސިޔާސަތެއް ކުރިއަށް ނެރުމުގެ ޖާގަ އަރަބި ގައުމުތަކަށް ކުރިއަށްވުރެ ވެސް ބޮޑަށް މިހާރު އޮތީ ހަނިވެފަ އެވެ.

އިޒްރޭލުން ހިސާރުކޮށް، ކެނޑިނޭޅި ހަމަލާދެމުން ގެންދާ ގާޒާގެ ވެރިކަން ފަތަހަ ޖަމާއަތުން ކޮންޓްރޯލްކުރާ ޕަލަސްތީނިއަން އޮތޯރިޓީ (ޕީއޭ) ގެ ދަށުގައި އޮތުމަށް ފަހު 2007 ވަނަ އަހަރުން ފެށިގެން އޮންނަނީ ހަމާސްގެ ދަށުގަ އެވެ.

ފަތަހަ ޖަމާއަތަކީ، ފަލަސްތީނުގެ ކަންކަމުގައި ބަސް ބުނުމުގެ ހައްގު އޮތް ފަރާތް ކަމަށް ބައިނަލްއަގުވާމީ ގޮތުން ބަލައިގެންފައި ވިޔަސް ފަލަސްތީނު ރައްޔިތުންގެ ކުރިމަތީގައި މިހާރު އެއީ ބަލައިގަންނަ ބަޔަކަށް ނުވެ އެވެ. އެކަމަކު އަރަބި ގައުމުތަކުން މުއާމަލާތުކުރަން ރުހެނީ ފަތަހަ ޖަމާއަތާ އެކުގަ އެވެ. މި ބައިބައިވުމުގެ ފައިދާ ވެސް އޮތީ އިޒްރޭލަށެވެ. އެއީ މި ހާލަތުގައި ފަލަސްތީނު އޮއްވައި ސުލްހަޔަށްޓަކައި މަސައްކަތް ނުކުރެވޭނެ ކަމަށް އަރަބި ގައުމުތަކުން ގަބޫލުކުރުމެވެ.

އަރަބި އެހެން ގައުމުތަކުގައިހެން، ފަލަސްތީނުގައި ވެސް، އިޒްރޭލު ރުހޭ ސިޔާސީ ޕާޓީ ކަމަށްވާ ފަތަހައަށް އެމެރިކާ އާއި އެހެން ގައުމުތަކުން ބާރުވެރިކަން ހޯދައިދީގެން ވެރިކަމުގެ މަސްތުގައި ޖައްސުވައި ފަލަސްތީނުގެ އަސްލު މައްސަލަ އެއްފަރާތްކުރަނީ އެވެ.

ފަލަސްތީނު މިހާރު އެ އޮތީ ފަހުގެ ތާރީހެއްގައި ކުރިމަތިނުވާހާ ބޮޑު ބިރުވެރިކަމަކާއި ނާމާންކަމެއްގެ ތެރޭގަ އެވެ. އެ ވަގުތު އައި އިރު އަރަބި ގައުމުތަކުގެ ސިޔާސަތު އެނބުރިފައިވަނީ އެމެރިކާ އާއި އިޒްރޭލު ބޭނުންވާ ގޮތަށެވެ. އިޒްރޭލުގެ އުދުވާން ހުއްޓުވަން އިނގިލިކުރި ހިއްލާލަން ވެސް ނުކުރޭ ވަރަށް އަރަބި ގައުމުތައް ވަނީ އިޒްރޭލުގެ އައްޑަނަ ކަމަށްވާ އެމެރިކާގެ ދަށުވެފަ އެވެ.