ހުޅުމާލޭގައި އިމާރާތް ކުރަމުން އަންނަ "ވިނަރެސް" ފްލެޓްތަކުގެ އަގު މިހާރު ހުރި ވަރަށް ކުޑަ ކުރެވެން ނެތް ކަމަށް އެޗްޑީސީން މިއަދު ބުނެފި އެވެ.
އެ ކުންފުނިން މިހެން ބުނީ، ސީ ލައިފްގެ ފްލެޓްތައް ނުލިބުނު މީހުންނަށް ބަދަލެއްގެ ގޮތުން ވިނަރެސް ފްލެޓްތަކުގެ އެޕާޓްމަންޓްތައް ދޫކުރުމުގެ ފުރުސަތު ސަރުކާރުން ހުޅުވާލާފައިވީ ނަމަވެސް އެ ފްލެޓްތަކުގެ އަގު ބޮޑުވުމުގެ ޝަކުވާ ކުރަމުންދާތީ "މިހާރު" އިން ސުވާލު ކުރުމުންނެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ހުޅުމާލޭގެ ދެވަނަ ފިޔަވަހީގައި އިމާރާތްކުރަން ފެށި ވިނަރެސް ފްލެޓްތައް ގަތުމަށް އާންމުންނަށް ހުޅުވާލުމުގެ ކުރިން އެޗްޑީސީން ނިންމީ، ހިޔާ ފްލެޓް ލިބުނު މީހުންގެ ތެރެއިން ވިނަރެސް ފްލެޓަށް ބަދަލުވާން ބޭނުންވާ މީހުންނާއި ސީ ލައިފުން ފްލެޓް ގަތް މީހުންނަށް އެ ތަނުން ބޭނުން އެޕާޓްމަންޓެއް ގަތުމުގެ ފުރުސަތު ދޭށެވެ.
އެކަމަކު ސީލައިފުން ފްލެޓް ގަތް މީހުންނަށް އެ ފުރުސަތު ހުޅުވާލުމާ އެކު އެ މީހުންގެ ކަންބޮޑުވުމަކަށް ވީ ވިނަރެސް ފްލެޓްގެ އަގު ސީ ލައިފަށް ވުރެ ބޮޑުވުމެވެ.
ފްލެޓް ގަތް މީހުން އަންނަ ހަފްތާގެ ހުކުރު ދުވަހު، ސެންޓްރަލް ޕާކު ހިމެނޭ ސަރަހައްދަށް އެއްވެ ކަންބޮޑުވުން ފާޅުކުރަން ތައްޔާރުވަމުން އަންނައިރު އެކަމާ ގުޅިގެން "މިހާރު" އިން ސުވާލުކުރުމުން އެޗްޑީސީގެ މެނޭޖިން ޑިރެކްޓަރު ސުހައިލް އަހުމަދު ވިދާޅުވީ ސީ ލައިފުން ފްލެޓް ގަތް މީހުންނަށް ވެސް ވިނަރެސް ފްލެޓް ދޫކުރާނީ އެ މަޝްރޫއު ހިންގި އަގުގައި ކަމަށާއި އެ ތަންތަނުގެ އަގު ހެޔޮ ކުރެވެން ނެތް ކަމަށެވެ.
"އެ ފުރުސަތު އެ މީހުން [ސީ ލައިފްގެ ފްލެޓް ލިބުނު މީހުން] ނުނަގާ ނަމަ، ދެން އަންނަ ޕްރޮޖެކްޓަކުން ވެސް އެ މީހުންނަށް ފުރުސަތު ލިބޭނެ. މި ޕްރޮޖެކްޓް [ވިނަރެސް ހައުސިން] ނެތް މިހާރު މި ވިއްކާ ވަރަށް ވުރެ އަގު ހެޔޮ ކުރެވޭކަށް. މިއީ އަޅުގަނޑުމެން ލޯނެއް ނަގައިގެން ހިންގި ޕްރޮޖެކްޓެއް،" ސުހައިލް ވިދާޅުވި އެވެ.
"މިއީ އެންމެ އަގު ހެޔޮކޮށް ވިއްކޭނެވަރު."
ސުހައިލް ވިދާޅުވިގޮތުގައި، ސީ ލައިފުން ފްލެޓް ގަތް މީހުން ދެ ކޮޓަރީގެ ފްލެޓްތައް އޭރު ގަތް ނަމަވެސް ވިނަރެސް މަޝްރޫއުގައި ދެ ކޮޓަރީގެ ފްލެޓް ވެސް ނެތެވެ.
"މި އަށް އެފޯޑް ކުރެވޭ މީހުންނަށް [މިހާރު ވެސް] ހުށަހެޅޭނެ މި މަޝްރޫ އަށް. އެފޯޑް ނުކުރެވޭ މީހުން ދެން އަންނަ ޕްރޮޖެކްޓަކަށް މަޑުކުރަން ޖެހޭނީ،" އޭނާ ވިދާޅުވި އެވެ.
ސުހައިލް ވިދާޅުވީ، ވިނަރެސް ފްލެޓްގެ މައުލޫމާތު ދިނުމަށް ސީ ލައިފުން ފްލެޓް ގަތް މީހުންނާ ބައްދަލުކުރިއިރު އަގާ ގުޅޭ ޝަކުވާތަކެއް އެ މީހުންގެ ހުރިކަން އެނގިވަޑައިގެންނެވި ކަމަށެވެ.
'އެކަމަކު މިކޮޅުން [އެޗްޑީސީ] އިން ކިޔައިދީފައި އޮންނާނީ [ވިނަރެސް ފްލެޓްތަކުގެ އަގު ބޮޑުވާ ސަބަބު] އެ ވާ ގޮތް. ބޭންކަކުން ނުދޭނެ 25 އަހަރަކަށް. ބޭންކަށް ނުވަދެ ސީދާ އެޗްޑީސީ އަށް ލާރި ދައްކާ ގޮތް ވެސް [ވިނަރެސް ފްލެޓްގެ މަޝްރޫއުގައި] އެބަ އިނދޭ،" އޭނާ ވިދާޅުވި އެވެ.
ހުޅުމާލޭގައި 3،000 ހައުސިން ޔުނިޓް އިމާރާތްކުރަން މާޗު 13، 2014 ގައި ސީ ލައިފް ގްލޯބަލްއާ ހަވާލުކުރުމުން، އެ ތަންތަން ވިއްކުމުގެ ނަމުގައި 280 މީހެއްގެ އަތުން ބުކިން ފީ ނެގި މައްސަލަ ފެންމަތިވުމުން އެކަން ތަހުގީގުކުރުމަށް ކަމާބެހޭ ފަރާތްތަކަށް ހުށަހެޅި އެވެ. އަދި ގެއްލުމުގެ ބަދަލު ހޯދަން ކޯޓަށް ވެސް ހުށަހެޅި އެވެ.
ސެޓްލްމަންޓް އެގްރީމެންޓް ހެދީ ސީ ލައިފްގެ ސަބަބުން ގެއްލުންވި މީހުންގެ ތެރެއިން 203 މީހަކު ދައުލަތާ ދެކޮޅަށް ދައުވާ ކުރުމުންނެވެ. ދައުވާކުރި މީހުންނަށް 45 މިލިއަން ރުފިޔާގެ ބަދަލެއް ކަނޑައަޅައި އަދި ބޯހިޔާވަހިކަމުގެ މަޝްރޫއަކުން ފްލެޓް ގަތުމަށް އެ މީހުންނަށް ފުރުސަތު ދޭ ގޮތަށް އެގްރިމެންޓް ހަދައި އެޗްޑީސީން ވަނީ ކޯޓުން ބޭރުގައި މައްސަލަ ނިންމައިފަ އެވެ.
އަންނަ އަހަރުގެ ޖުލައި ހިސާބުގައި ނިންމަން އަމާޒު ހިފާފައިވާ "ވިނަރެސް" ފްލެޓުތަކުގެ ބޮޑު ބައެއް މިހާރު ވަނީ ނިމިފަ އެވެ. ޗައިނާ މެޝިނަރީ އިންޖީނިއަރިން ކޮމްޕެނީއާ ހަވާލުކޮށްގެން ވިނަރެސް މަޝްރޫއު ކުރިއަށް ގެންދާއިރު އެއީ 13 ބުރީގެ 10 ޓަވަރުގައި ތިން ކޮޓަރީގެ 1،344 އެޕާޓްމަންޓް ހިމެނޭ މަޝްރޫއުއެކެވެ. މިއީ 902-883 އަކަފޫޓުގެ އެޕާޓްމަންޓްތަކެކެވެ.
މި ފްލެޓްތައް ވިއްކާނީ ތިން މޮޑެލްއެއްގެ ދަށުންނެވެ. ލީސް ޓު އޯން މޮޑެލްގެ ދަށުން، އެޕާޓްމަންޓް އަގުގެ 15 ޕަސެންޓް ޑައުންޕޭމަންޓްގެ ގޮތުގައި ދެއްކުމަށް ފަހު، 20 އަހަރަށް ބަހާލައިގެން ފައިސާ ދެއްކޭނެ އެވެ. އަދި ޑައުންޕޭމަންޓަށް 20 ޕަސެންޓް ދައްކައިފި ނަމަ 25 އަހަރަށް ބަހާލައިގެން ފައިސާ ދެއްކޭނެ އެވެ.
އޯން އިކުއިޓީ ފައިނޭންސިން މޮޑެލްގެ ދަށުން، ޕްރޮޖެކްޓްގެ އަގު އެއްފަހަރާ ވެސް ދެއްކޭނެ އެވެ. އަދި ބަހާލައިގެން ޕޭމަންޓް ޝެޑިއުލްގެ ދަށުން ވެސް ފައިސާ ދެއްކޭނެ އެވެ. އެންޑް ޔޫސާ ފައިނޭންސިން މޮޑެލްގެ ދަށުން ބޭންކެއް ނުވަތަ އެހެން ފައިނޭންޝަލް އިންސްޓިޓިއުޓެއް މެދުވެރިކޮށް ލޯނެއްގެ ދަށުން އެޕާޓްމަންޓް ގަނެވޭނެ އެވެ. އޯން އިކުއިޓީ ނުވަތަ އެންޑް ޔޫޒާ މޮޑެލް ބޭނުންކުރާ ނަމަ 10 ޕަސެންޓްގެ ޑިސްކައުންޓެއް ލިބެ އެވެ.
މި އެޕާޓްމަންޓްތަކުގެ އަގުތައް އުޅެނީ 2.5 މިލިއަން ރުފިޔާ އާއި 2.7 މިލިއަން ރުފިޔާއާ ދެމެދުގަ އެވެ. އެކަމަކު އިންސްޓޯލްމަންޓް އުސޫލުން 20 އަހަރުން ނުވަތަ 25 އަހަރުން ފައިސާ ދައްކާ ނަމަ އެޕާޓްމަންޓްގެ އަގު ގާތްގަނޑަކަށް ދެގުނަ ވެ އެވެ.
