ވޮޑަމުލާގެ ފައިސާ އެސްއޯއެފަށް ޖަމާކުރި ކަމަށް ބުނާ ޗެކް ނަންބަރު ދިމާނުވާތީ ދައުލަތާ ސުވާލުކޮށްފި

ކުރީގެ ރައީސް އަބްދުﷲ ޔާމީންގެ މައްޗަށް މަނީ ލޯންޑަރިންގެ ދައުވާކުރުމުގެ އަސްލަކަށްވި ގއ. ވޮޑަމުލާ ކުއްޔަށް ދީގެން ލިބުނު ފައިސާ، ޔާމީނަށް ފައިސާ ޖަމާކުރި އެސްއޯއެފް ކުންފުންޏަށް އެމްއެމްޕީއާރްސީން ޖަމާކުރިކަމާ މެދު ޝައްކު އުފައްދާތީ އެކަން ސާފުކުރުމަށް މިއަދު ދައުލަތާ ސުވާލުކޮށްފި އެވެ.

މަނީ ލޯންޑަރިންގެ ކުށް ސާބިތުވެ ފަސް އަހަރަށް ޖަލަށް ލާފައިވާ ޔާމީންގެ އިސްތިއުނާފު ޝަރީއަތުގައި މިއަދުގެ އަޑުއެހުން ފައްޓަވަމުން، މައްސަލަ ބައްލަވާ ބެންޗުގެ ރިޔާސަތުން ފަނޑިޔާރު މަހާޒް އަލީ ޒާހިރު ވިދާޅުވީ މިއީ މައްސަލަ ދިރާސާކުރަމުން ދިޔައިރު ފާހަގަވި ކަމަކާ ގުޅޭ ގޮތުން ބައެއް ކަންކަން ސާފުކުރުމަށް ބާއްވާ އަޑުއެހުމެއް ކަމަށެވެ.

މިއީ ޔާމީނަށް ޖަމާވި ފައިސާ އަކީ ވޮޑަމުލާ ކިޔާ ރަށެއް ކުއްޔަށް ދޫކުރުމުގައި ދައުލަތަށް ލިބެންޖެހޭ އެއް މިލިއަން ޑޮލަރު ކަމަށް ބުންޏަސް އެކަން ސާބިތު ނުވާ ކަމަށް ބުނެ ޔާމީންގެ ފަރާތުން އިސްތިއުނާފްގައި ކުރިން ވެސް ފާހަގަކޮށްފައިވާ ކަމެކެވެ. އެއީ ޑިޕޮސިޓް ސްލިޕުން ފެންނަން އޮންނަ އެއް މިލިއަން ޖަމާވި ޗެކް ނަންބަރާއި އެސްއޯއެފްގެ ބޭންކް ސްޓޭޓްމަންޓުގައި އޮތް ޗެކް ނަންބަރު ދިމާނުވާތީ އެވެ.

ޔާމީން ޖަލަށް ލުމަށް ހުކުމްކުރި މައްސަލައިގެ އިސްތިއުނާފް ހައި ކޯޓުން ނިމުނު ފަހުން އެމްއެމްޕީއާރްސީގެ ކުރީގެ އެމްޑީ އަބްދުﷲ ޒިޔަތުގެ މައްޗަށް މި މައްސަލަތަކުގައި ޚިޔާނާތުގެ ދައުވާކޮށް ހުކުމްކުރި ގަޒިއްޔާގެ ލިޔުންތަކުގައި، ވޮޑަމުލާގެ ފައިސާ ލިބުނު ޗެކްގެ ނަންބަރު އޮތްކަން ވަނީ ހާމަވެފަ އެވެ. އެކަން ވަނީ ޔާމީންގެ ފަރާތުން ސުޕްރީމް ކޯޓަށް ހުށަހަޅައި އެކަމާ ބެހޭ ގޮތުން ވާހަކަ ދައްކައިފަ އެވެ.

މައްސަލަ ދިރާސާކުރުމަށް ސުޕްރީމް ކޯޓުން، ޒިޔަތުގެ މައްސަލައިގެ ލިޔުންތައް ވަނީ ހޯދައިފަ އެވެ.

"އެ ލިޔެކިޔުންތައް ބަލައި ދިރާސާކުރި އިރު އެ ލިޔެކިޔުންތަކުގެ ތެރޭގައި، ކުރިން ވާހަކަ ދެކެވުނު ކަމަށް ބެލެވޭ ޗެކް ހިމެނިފައިވޭ،" ފަނޑިޔާރު މަހާޒް ވިދާޅުވި އެވެ.

އެ ޗެކްގެ ކޮޕީ ޔާމީނާއި ދައުލަތަށް ސުޕްރީމް ކޯޓުން ފޮނުވުމަށް ފަހު މިއަދު ބޭއްވި އަޑުއެހުމުގައި ފަނޑިޔާރު މަހާޒް އެންމެ ފުރަތަމަ ދައުލަތާ ސުވާލުކުރެއްވީ އެ ޗެކަކީ ޔާމީނަށް ދައުވާކުރި މައްސަލައާ ގުޅޭ ޗެކްތޯ އެވެ.

"އެކައުންޓް ސްޓޭޓްމަންޓްގައި ބަޔާންކޮށްފައިވާ ޗެކްގެ ނަންބަރާއި، މި ޗެކްގެ ނަންބަރު އަދި ޑިޕޮސިޓް ސްލިޕްގައިވާ ނަންބަރަކާ ދިމައެއް ނުވޭ. ގަބޫލުކުރެވެނީ އަދި ދައުލަތުން ބެލި ބެލުމުން އެނގެނީ، އެކައުންޓް ސްޓޭޓްމަންޓް ތައްޔާރުކުރި އިރު، ބޭންކުން މި ޗެކަކީ މޮރިޝަސް ކޮމާޝަލް ބޭންކުގެ ޗެކެއް. އެ ޗެކް އެންޓަކުރި އިރު ހަތަރާއި ފަހަކާ ދެ އަކުރު އޮޅިފައި އޮތް ކަމަށް މި ބެލެވެނީ،" ޖަވާބުގައި، ޕަބްލިކް ޕްރޮސިކިއުޓާ އަހްމަދު ނައުފަލް ވިދާޅުވި އެވެ.

"ދައުލަތަށް ގަބޫލުކުރެވެނީ ސިސްޓަމަށް އެންޓަކުރުމުގެ ތެރޭގައި ދެ އަކުރުގެ އޮޅުމެއް އޮތީ ކަމަށް."

އޭނާ ވިދާޅުވީ އެހެން ލިޔުންތަކަށް ބަލާއިރު މިއީ ހަމަ އެ ޗެކްކަން އަދި ޑިޕޮސިޓްކުރީ މި ފައިސާކަން އެނގޭ ކަމަށެވެ.

އެސްއޯއެފަށް ވޮޑަމުލާގެ ފައިސާ ލިބުނުކަން ކަށަވަރުކުރަން ޖެހެނީ ޔާމީންގެ މައްޗަށް ދައުވާކުރީ ވޮޑަމުލާގެ ފައިސާ އަމިއްލަފުޅު އެކައުންޓަށް ޖަމާކުރައްވައި އެ ފައިސާގެ އަސްލު އޮޅުވާލައި ލޯންޑަކުރި ކަމަށް ތުހުމަތުކޮށްފައި ކަމަށް ވާތީ އެވެ. އެކަމަކު ދައުލަތުން އަބަދުވެސް ބުނަމުން އަންނަނީ ޔާމީނަށް ޖަމާވީ ވޮޑަމުލާގެ ފައިސާކަން ސާބިތު ނުވިޔަސް މަނީ ލޯންޑަރިން ގާނޫނު ބުނާ ގޮތުން ޔާމީންގެ މައްޗަށް ކުށް ސާބިތުވާނެ ކަމަށެވެ. އެއީ ކުށް ކޮށްގެން ހޯދި ފައިސާކަން ސާބިތު ނުވިޔަސް އެ ފައިސާގެ މައްސަލަ ތަހުގީގުކުރަމުން ދާތީ އެކަން ޔާމީނަށް އަންގާފައި އޮތުމުން ފައިސާއާ މެދު ޝައްކުގެ ހާލަތު އޮންނާތީ ކަމަށް ދައުލަތުން ބުނެ އެވެ.

ޔާމީންގެ ފަރާތުން ޝަރީއަތުގައި ބުނެފައިވަނީ އެމްއެމްޕީއާރްސީން އެސްއޯއެފަށް އެއް މިލިއަން ޑޮލަރު ޖަމާކުރި ކަމަށް ބުނެފައި އޮތަސް އެ ފައިސާ ޖަމާކުރި ޗެކް ޝަރީއަތަށް ހުށަހަޅާފައި ނެތް ކަމަށެވެ. އެކަމަކު އެމްއެމްޕީއާރްސީގެ އެހެން މައްސަލައެއްގައި އެ ކުންފުނީގެ ކުރީގެ އެމްޑީ އަބްދުﷲ ޒިޔަތުގެ މައްސަލާގައި މި ޗެކް ހުށަަހަޅާފައިވާކަން ވަނީ ހާމަވެފަ އެވެ.

ދައުވާކުރި އިރު ވެސް މިކަން މިގޮތަށް ހިނގާފައިވާކަން އެނގޭތޯ ސުވާލުކުރުމުން ނައުފަލް ވިދާޅުވީ ކުރިން އެކަން ނޭނގޭ ކަމަށާއި ފަހުން އެކަން އެނގިގެން ތަހުގީގުކުރާ ފަރާތުން އެކަން ސާފުކޮށްފައިވާ ކަމަށެވެ. އެއީ ސިސްޓަމަށް ޗެކް އެންޓަކުރުމުގެ އޮޅުމެއް ކަމަށް، ތަހުގީގުކުރި ފަރާތުން ވެސް ބުނެފައިވާ ކަމަށް ވިދާޅުވި އެވެ.

ޔާމީންގެ މައްސަލާގައި މި ޗެކް ހުށަނޭޅި އޮތަސް ޒިޔަތުގެ މައްސަލާގައި މި ޗެކް ހުށަހަޅާފައި އޮތްކަން ފާހަގަކޮށްފައި ވާތީ އެކަމާ ބެހޭ ގޮތުން ފަނޑިޔާރު މަހާޒް ދައުލަތާ ސުވާލުކުރެއްވި އެވެ. ދައުލަތުން ބުނީ މި މައްސަލައިގެ ތެރެއިން އެ ޗެކް ލިބިފައި ނެތް ކަމަށެވެ. އެކަމަކު ޔާމީންގެ މައްޗަށް ދައުވާކުރުމުގެ ކުރިން ޒިޔަތުގެ މައްސަލާގައި މި ޗެކް ލިބި ދައުވާކޮށްފައި އެބަ އޮތް ނޫންތޯ ފަނޑިޔާރު ސުވާލުކުރެއްވި އެވެ.

"ތިޔަ ވިދާޅުވީ ރަނގަޅަށް. ހަމަ އެ ޗެކް ލިބިގެން ދައުވާކުރެވިފައިވޭ. އޭރު ޕްރޮސިކިއުޓާ ޖެނެރަލްގެ މަސައްކަތް ކުރަމުން ދިޔަ ގޮތުން މި މައްސަލަތައް، އަބްދުﷲ ޒިޔަތުގެ މައްސަލަތައް ގެންގުޅުއްވީ ވަކީލުންނެއް ނޫން މި މައްސަލަ ގެންގުޅުނީ،" ވަކީލް ނައުފަލް ޖަވާބު ދެއްވި އެވެ. "އަދި އެއްވެސް ގޮތަކަށް ކޮމިއުނިކޭޓް ކުރެވިފައެއް ނެތް މި މައްސަލާގައި ހުރި ލިޔެކިޔުންތަކަކީ ކޮބައިކަމެއް ... އެ މައްސަލާގައި ހުރި ލިޔުންތައް ވެސް ސިއްރު ލިޔުންތަކެއްގެ ގޮތުގައި ގެންގުޅެވިފައި ވަނީ. އެހެންވެ އެއް މައްސަލާގައި ހުރި އެއްޗެއް އަނެއް މައްސަލާގައި ގެންގުޅުނު ވަކީލުންނަށް އެނގިފައެއް ނުވޭ."

މިކަމާ ބެހޭ ގޮތުން ވާހަކަ ދައްކަން ޔާމީންގެ ވަކީލުންނަށް ފުރުސަތު ދެއްވުމުން ވަކީލް އަބްދުﷲ ޝިޔާޒް ވިދާޅުވީ ޔާމީންގެ މައްސަލަ ވެސް އަދި ޒިޔަތުގެ މައްސަލަ ވެސް ތަހުގީގުކުރީ ފުލުހުންގެ ތެރެއިން ހަމަ އެއް ބައެއް ކަމަށާއި ފުލުހުންނަށް ލިބިފައި ހުރި މައުލޫމާތެއް ނަމަ ހުންނަން ޖެހޭނީ ޕީޖީއާ ހިއްސާކޮށްފައި ކަމަށެވެ. ދައުލަތަށް ނުވަތަ ޕީޖީ އަށް ލިޔުމެއް ލިބިފައިވާ ނަމަ އެކަން އޮންނަންވާނީ ވަކީލުންނާ ހިއްސާކޮށްފައި ކަމަށެވެ.

މިއީ އަރާފައި އޮތް އޮޅުމެއް ނަމަ އެކަން ދަށު ކޯޓުގައި ވެސް ފާހަގަކުރަންޖެހޭނެ ކަމަށް ޝިޔާޒް ވިދާޅުވި އެވެ.

އިތުރު ވާހަކަތައް ދައްކަން ފުރުސަތު ނުދީ މިއަދުގެ އަޑުއެހުން 15 ވަރަކަށް މިނެޓް ތެރޭ ވަނީ ނިންމަވާލައްވައިފަ އެވެ. ފަނޑިޔާރު މަހާޒް ވިދާޅުވީ ކުރިން ވެސް ނިންމާފައިވާ ގޮތަށް، އަންނަ މަހު ސުޕްރީމް ކޯޓު ރިސެސްއަށް ދިއުމުގެ ކުރިން މައްސަލާގައި ހުކުމް ކުރައްވާނެ ކަމަށެވެ.