ހިލޭސާބަހަށް މާލޭގެ މިސްކިތްތައް ފޮޅައި ސާފުކޮށް އަދި މަރާމާތުކޮށްދޭން ބޭނުންވާ މީހުންނަށް އެ ފުރުސަތު ހުޅުވާލައި، އެކަން ކުރަންޖެހޭ އުސޫލު މާލޭ ސިޓީ ކައުންސިލުން މިއަދު އާންމުކޮށްފި އެވެ.
މާލޭ ސިޓީ ކައުންސިލުން ކުރި އިއުލާނެއްގައި ބުނީ މިސްކިތްތަކަށް ތަކެތި ހަދިޔާކުރަން ބޭނުންވާ މީހުންނަށް އެ ފުރުސަތު ވެސް ހުޅުވާލާފައިވާ ކަމަށެވެ. އަދި ފައިސާގެ އެހީތެރިކަން ދޭން ބޭނުންވާ މީހުންނަށް، ފިނޭންސް މިނިސްޓްރީގެ "ބަނޑޭރި ޕޯޓަލް" މެދުވެރިކޮށް ފައިސާ ހަދިޔާ ކުރެވޭނެ އިންތިޒާމު ވެސް ވަނީ ހަމަޖައްސައި ދީފަ އެވެ.
މިސްކިތްތަކަށް އެހީވާން ބޭނުންވާ މީހުން ޖެހޭނީ، އެކަން ކުރަން އެދި ސިޓީ ކައުންސިލަށް ފޯމެއް ހުށަހަޅާށެވެ.
އެ އިއުލާނާ އެކު އާންމުކުރި އުސޫލުގައި ވަނީ މިސްކިތްތަކުގެ ވަކިވަކި ކަންކަން ހިލޭސާބަހަށް ކުރަން ވެސް ހުށަހެޅިދާނެ ކަމަށެވެ. ކޮންމެ ދުވަހަކު ކުރަންޖެހޭ މަސައްކަތްތަކާއި މަދުވެގެން ހަފުތާ އަކު އެއް ފަހަރު ކުރަންޖެހޭ މަސައްކަތްތަކާއި މަހަކު އެއްފަހަރު ކުރަން ޖެހޭ މަސައްކަތްތަކާއި ކޮންމެ ހަ މަހަކުން ކުރަން ޖެހޭ މަސައްކަތްތަކާއި ކުރަންޖެހޭ ކުދިކުދި މަސައްކަތްތަކުގެ ތަފުސީލުތައް ވެސް މި އުސޫލުގައި ބަޔާންކޮށްފައިވެ އެވެ.
މިސްކިތް ފޮޅައި ސާފުކުރާނެ ވަގުތުތައް ވެސް ވަނީ ކަނޑައަޅައިފަ އެވެ. އުސޫލުގައިވާ ގޮތުން، އެ މަސައްކަތްކުރާ މީހުން ތިބެން ޖެހޭނީ ކާކުކަން އެނގޭ ގޮތަށް ޔުނީފޯމުގަ އެވެ.
ސިޓީ ކައުންސިލުން އެންމެފަހުން ބޭއްވި ނޫސްވެރިންގެ ބައްދަލުވުމުގައި މާލޭގެ މޭޔަރު ޑރ. މުހައްމަދު މުއިއްޒު ވިދާޅުވެފައި ވަނީ މާލޭގެ މިސްކިތްތައް މަރާމާތުކުރަން ސަރުކާރުން ބަޖެޓު ދިނީ ނަމެއްގައި ކަމަށާއި އެކަމަށް ދީފައި ވަނީ އެންމެ އެއް މިލިއަން ރުފިޔާ ކަމަށެވެ. އެއް މިލިއަން ރުފިޔާއިން މާލޭގައި ހުރި 42 މިސްކިތް ބެލެހެއްޓޭނެ އެއްވެސް ގޮތެއް ނޯންނާނެ ކަމަށް ވިދާޅުވި އެވެ.
"މިއީ ހަމަ ނަމެއްގައި ދީފައިވާ ބަޖެޓެއް. އެކަމަކު އަޅުގަނޑުމެންނަށް އެންމެ މުހިންމީ މިސްކިތްތައް. އެހެންވެ، މިސްކިތްތައް ބެލެހެއްޓުމަށް ކުރެވެން ހުރި ހުރިހާ ކަމެއް އަޅުގަނޑުމެން ކުރާނަން،" މޭޔަރު ވިދާޅުވި އެވެ.
މިސްކިތްތައް މަރާމާތުކުރަން އިސްލާމިކް މިނިސްޓްރީގެ އެހީތެރިކަމަށް ވެސް އެދުނު ކަމަށާއި އަދި ވަގުފު ފަންޑުން ފައިސާ ހަމަޖައްސައިދޭން ސަރުކާރުގައި އެދުމުން އެކަމަށް ވެސް އެއްބާރުލުން ދީފައި ނުވާ ކަމަށެވެ. އަންނަ ރޯދަ މަސް ފެށުމުގެ ކުރިން މިސްކިތްތައް މަރާމާތުކުރަން މަދުވެގެން، 13 މިލިއަން ރުފިޔާ ބޭނުންވާ ކަމަށާއި އެހެންވެ، މޭޔަރު ވަނީ އާންމުންނާއި ވިޔަފާރީވެރިންގެ އެހީތެރިކަމަށް އެދިވަޑައިގެންފަ އެވެ.