މިއަދު އަވަހާރަވި، ދައުލަތަށް 50 އަހަރަށް ވުރެ ގިނަ ދުވަހު ހިދުމަތްކުރައްވާފައިވާ އުމަރު ޒާހިރުގެ ހަށިކޮޅު ރަސްމީ އިއްޒަތުގައި މިރޭ ފަސްދާނުލައިފި އެވެ.
ކޮވިޑް ބަލީގައި އުމުރުފުޅުން 85 އަހަރުގެ އުމަރު ޒާހިރު މިއަދު މެންދުރެއްހާއިރު އަވަހާރަވީ ހާލުކޮޅު ގޯސްވެ އިއްޔެ މެންދުރުން ފެށިގެން ދަރުމަވަންތަ ހޮސްޕިޓަލުގެ އައިސީޔޫގައި ފަރުވާ ދެއްވަމުން ގެންދަވަނިކޮށެވެ.
ނިޝާން އިއްޒުއްދީންގެ އިއްޒަތުގެ ވެރިކަމުގެ ލަގަބު ލިބިވަޑައިގެންފައިވާ ޒާހިރު ފަސްދާނުލީ ވަނީ ދައުލަތުގެ އިއްޒަތްތެރިން އަވަހާރަވުމުން އާންމުކޮށް ފަސްދާނުލާ ގަލޮޅު ސަހަރާގަ އެވެ.
އާންމުން ވަޅުލާ ސަހަރާއެއްގައި ވަޅުލަން އުމަރު ޒާހިރު ވަނީ ވަސިއްޔަތް ކުރައްވާފައިވާ ކަމަށް އެ މަނިކުފާނުގެ ގާތް އެކުވެރިޔާ އަބްދުލްހަމީދު އަލީ މިއަދު ވަނީ ވިދާޅުވެފަ އެވެ. ނަމަވެސް ގަލޮޅު ސަހަރާގައި ފަސްދާނުލީ އުމަރު ޒާހިރުގެ ދަރިކަނބަލުން ރައީސް އޮފީހުގައި އެގޮތަށް އެދިވަޑައިގަތުމުންނެވެ.
އެ ޖަނާޒާގައި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހާއި ނައިބް ރައީސް ފައިސަލް ނަސީމްގެ އިތުރުން މަޖިލީހުގެ ރައީސް މުހައްމަދު ނަޝީދާއި ދައުލަތުގެ އިސްވެރިން ބައިވެރިވެވަޑައިގެންނެވި އެވެ.
ހުޅުމާލޭ ސަހަރާ މިސްކިތުގައި ޒާހިރުގެ ކަށު ނަމާދު އެންމެ ފުރަތަމަ ބޭއްވުމަށް ނިންމި ނަމަވެސް ފަހުން ނިންމީ އިސްލާމީ މަރުކަޒުގައި ކުރިއަށް ގެންދާށެވެ. އާންމުކޮށް ކޮވިޑްގައި ނިއާވާ މީހުންގެ ކަށުކަމާކެމީގެ ކަންކަން ކުރިއަށް ގެންދަނީ ހުޅުމާލެ ސަހަރާގަ އެވެ. އެހެންވެ މައްޔިތާގެ މޫނު ދެއްކުން އޮތީ މަޣްރިބް ނަމާދާ ހަމަޔަށް، ވެސް ހުޅުމާލޭ ސަރަހަރާގަ އެވެ.
އެތައް ބައެއްގެ ލޯބި ލިބިވަޑައިގެންފައިވާ ޒާހިރުގެ ކަށުނަމާދުގައި ވެސް ގިނަ ބަޔަކު ބައިވެރިވެފައިވެ އެވެ.
އުމަރު ޒާހިރު ވަނީ 1983 އިން 2008ގެ ނޮވެމްބަރުގެ ނިޔަލަށް އެކި މިނިސްޓްރީތަކުގެ މިިނިސްޓަރުކަން ކުރައްވައިފަ އެވެ. މާލޭގެ މަގުތަކުގައި ގާއެތުރުމުގެ މަޝްރޫއު ފެށުމާއި ހުޅުމާލެ ހިއްކުމުގެ މަޝްރޫއާއި ތިލަފުށި ހިއްކައި އެތަނުގައި ކުނި އަންދަން ފެށުމާއި މާލޭގެ އާޓިފިޝަލް ބީޗް ހެދުން ކަހަލަ ވަރަށް ބޮޑެތި މަޝްރޫއުތައް ހިނގާފައި ވަނީ އުމަރު ޒާހިރުގެ ބެއްލެވުމުގެ ދަށުންނެވެ. އަދި ރާއްޖޭގައި ފުރަތަމަ ސިޔާސީ ޕާޓީތައް އުފެއްދުމުގެ ހުއްދަ ދެއްވާފައި ވަނީ ވެސް ޒާހިރުގެ ހޯމް މިނިސްޓަރު ކަމުގަ އެވެ.
އުމަރު ޒާހިރު އަވަހާރަވުމުގެ ހިތާމައިގައި ދިވެހި ގައުމީ ދިދަ، ތިން ދުވަހަށް ބައިދަނޑި އަށް ތިރިކުރުމަށް ވެސް ރައީސް ވަނީ ނިންމަވައިފަ އެވެ.