ދިވެހި ގައުމަށާއި ދައުލަތަށް ގިނަ ހިދުމަތްތަކެއް ކޮށްދެއްވާފައިވާ ކުރީގެ މިނިސްޓަރު އުމަރު ޒާހިރު އިއްޔެ އަވަހާރަ ވެފައިވާއިރު، އެ މަނިކުފާނުގެ ޖަނާޒާގެ ކަންކަން ވަކި ގޮތަކަށް ކުރިއަށް ގެންދިއުމަށް ވަސީޔަތް ކުރެއްވި ކަމަށް ބުނެ ދައްކާފައި ވަނީ ހަގީގަތެއް ނެތް ވާހަކަތަކެއް ކަމަށް އާއިލާ އިން މިރޭ ބުނެފި އެވެ.
އުމަރު ޒާހިރުގެ ހުންނެވި ހަމައެކަނި ދަރިކަނބަލުން ފާތިމަތު ސާމިހާ ނެރުއްވި ބަޔާނެއްގައި އެހެން ވިދާޅުވީ، ދައުލަތުގެ އިއްޒަތްތެރިން އަވަހާރަވުމުން އާންމުކޮށް ފަސްދާނުލާ ގަލޮޅު ސަހަރާގެ ބަދަލުގައި "އާންމުން ވަޅުލާ ތަނެއްގައި ވަޅުލަން" އުމަރު ޒާހިރު ވަސިއްޔަތް ކުރައްވާފައިވާ ކަމަށް، އެ މަނިކުފާނުގެ ގާތް އެކުވެރިޔާ އަބްދުލް ހަމީދު އަލީ (މުނިސިޕަލްޓީ ހަމީދު) އާ ހަވާލާދީ މީޑިއާ އިން އިއްޔެ ރިޕޯޓް ކުރުމުންނެވެ.
"ވިދާޅުވީ ހަމީދު ދުނިޔޭގައި ހުއްޓާ ތިމަންނަ މަރުވެއްޖިއްޔާ އާންމުން ވަޅުލާ ތަނެއްގައި ވަޅުލާށޭ. އެކަމަކު އެއީ އަޅުގަނޑަށް ކުރެވޭނެ ކަމެއް ކަމަށް ނުވާތީ އެ ވާހަކަ އުމަރު ޒާހިރުގެ އާއިލާ އަށް ވާނީ ދަންނަވައިފައި،" އިއްޔެގެ މެންދުރު އުމަރު ޒާހިރު އަވަހާރަވުމާއެކު މީޑިއާގައި ހަމީދު ވިދާޅުވި އެވެ.
އެކަމާ ގުޅިގެން އުމަރު ޒާހިރުގެ އާއިލާ އިން ނެރުނު ކުރު ބަޔާނެއްގައި ދަރިކަނބަލުން ސާމިހާ ވިދާޅުވީ، އޭނާގެ ބައްޕާފުޅަކީ އެތައް ހާސް ބައެއްގެ ލޯތްބާއި އިހުތިރާމު ލިބިފައިވާ ބޭފުޅަކަށް ވާއިރު، މިފަދަ ހިތާމަވެރި ދަނޑިވަޅެއްގައި ހަގީގަތެއް ނެތް ވާހަކަތައް އެއްވެސް ފަރާތަކުން ދެއްކެވުމަކީ އާއިލާ އިން ހިތާމަކުރާ ކަމެއް ކަމަށެވެ.
"ބައްޕަގެ ޖަނާޒާގެ ކަންތައް ވަކި ގޮތަކަށް ގެންދިއުމަށް އެދި ވަޑައިގެން ވަސީޔަތެއް ކުރައްވާފައި ނުވާއިރު، ވަކި ގޮތަކަށް ޖަނާޒާގެ ކަންތައް ކުރިއަށް ގެންދިއުމަށް އެދިވަޑައިގެން ކަަމަށް ބުނެ ވަކި ފަރާތަކުން ދައްކަމުންދާ ވާހަކަތަކަކީ، އެ ކަމުގައި އެއްވެސް ހަގީގަތެއް އެކުލެވޭ ވާހަކަތަކެއް ކަމަށް ބައްޕަގެ އާއިލާ އިން ނުދެކޭ ކަމުގައި ހިތާމައާއެކު ދަންނަވަމެވެ،" ބަޔާނުގައި ސާމިހާ ވިދާޅުވި އެވެ.
އޭނާ ވަނީ ނިޝާން އިއްޒުއްދީނުގެ އިއްޒަތުގެ ވެރިޔާގެ ލަގަބު ދިވެހި ދައުލަތުން އުމަރު ޒާހިރަށް އަރުވާފައިވާތީ، އެ މަނިކުފާނުގެ ޖަނާޒާގެ ކަންކަން ސަރުކާރުން ހާއްސަކޮށް ރައީސް އިބްރާހިމް މުހައްމަދު ސޯލިހުގެ ފަރާތްޕުޅުން ވަރަށް ހާއްސަ ކަމެއް ދެއްވައިގެން ކުރިއަށް ގެންދެވިކަން ފާހަގަ ކުރައްވައިފަ އެވެ.
ދައުލަތަށް 50 އަހަރަށް ވުރެ ގިނަ ދުވަހު ހިދުމަތް ކުރައްވާފައިވާ އުމަރު ޒާހިރުގެ ހަށިކޮޅު ރޭގެ އިޝާ ނަމާދަށް ފަހު ފަސްދާނުލީ ރަސްމީ އިއްޒަތުގައި ގަލޮޅު ސަރަހާގަ އެވެ.
ދައުލަތުގެ އިއްޒަތްތެރިން އަވަހާރަވުމުން އާންމުކޮށް ފަސްދާނުލަނީ ގަލޮޅު ސަހަރާގައި ކަަމަށް ވާއިރު، އުމަރު ޒާހިރުގެ ޖަނާޒާގައި ރައީސް އިބްރާހިމް މުހައްމަދު ސޯލިހާއި ނައިބު ރައީސް ފައިސަލް ނަސީމާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަދި ދައުލަތުގެ ގިނަ އިސްވެރިންނާއި ގިނަ ބަޔަކު ބައިވެރިވި އެވެ.
އުމަރު ޒާހިރު އަވަހާރަވީ ކޮވިޑްގެ އާލާސްކަންފުޅުގައި ދަރުމަވަންތަ ހޮސްޕިޓަލްގައި ފަރުވާ ހޯއްދަވަނިކޮށް އިއްޔެގެ މެންދުރެވެ.