ހުޅުމާލޭ ދެވަނަ ފިޔަވަހީގައި އިމާރާތްކޮށްފައިވާ ހިޔާ ފްލެޓްތަކަށް ދިމާވާ މައްސަލަތައް ހައްލުކުރުމަށް ކޮންޓެކް ޕްރައިވެޓް ލިމިޓެޑާ ހަވާލުކޮށްފައިވާ ކަމަށް އެޗްޑީސީން ބުނެފި އެވެ.
ހިޔާ ފްލެޓްތަކަށް ދިމާވާ މައްސަލަތައް ހައްލުކުރަން ބަޔަކާ ހަވާލުކުރިއިރު ހިޔާގެ އެކި ޓަވަރުތަކުގައި ހަރުކޮށްފައި ހުންނަ ލިފްޓްތަކުގައި މީހުން ތާށިވުމާއި ލިފްޓް ބޭނުންނުކުރެވޭ މައްސަލަތައް ބޮޑެވެ.
ލިފްޓްތަކަށް ދިމާވާ މައްސަލަތައް ބަލައި ހައްލުކުރުމަށާއި މެއިންޓެނެންސް މަސައްކަތް ކުރުމަށް އެ މަޝްރޫއުގެ ކޮންޓްރެކްޓަރުގެ ފަރާތުން ކޮންޓެކް ޕްރައިވެޓާ ހަވާލުކޮށްފައިވާއިރު އެ ކުންފުނީގެ ހިދުމަތްތައް 24 ގަޑިއިރު ދޭނެ ކަމަށް އެޗްޑީސީން ބުންޏެވެ.
އެޗްޑީސީން ބުނި ގޮތުގައި އެ ކުންފުނީގެ ހޮޓްލައިން 9672696 މެދުވެރިކޮށް ހިދުމަތާ ގުޅޭ މުއާމަލާތްތައް ކުރެވޭނެ އެވެ.
ލިފްޓްތައް ބޭނުންކުރުމުގައި ކަނޑައަޅާފައިވާ ގަވާއިދުތަކާއި އުސޫލަށް އަމަލުކުރުމަށް އެޗްޑީސީން އިލްތިމާސްކުރެ އެވެ. އަދި އެޗްޑީސީން ވަނީ ފޭސް ދޭއްގައި އުޅޭ މީހުންނަށް ދިމާވާ ދަތިތަކަށް ހައްލު ހޯދައިދީ ރައްޔިތުންނަށް ފަސޭހަކޮށްދޭން މަސައްކަތްކުރާ ކަމަށް ވެސް ބުނެފަ އެވެ.