ހަނގުރާމައިން އަންނަ 15 އަހަރުން ދަށުގެ ކުދިން އެކަހެރިކޮށް ދައުލަތަށް ނެގޭ އުސޫލު ކަނޑައަޅައިފި

ރާއްޖޭން ބޭރުގައި ހަނގުރާމަކުރާ ތަންތަނަށް ގޮސް އަންނަ 15 އަހަރުން ދަށުގެ ކުޑަކުދިން ވެސް ރީހެބިލިޓޭޝަނަށް ބަންދުކުރެވޭ ގޮތަށް ގަވައިދު ހަދައިި ރޭ އާއްމުކޮށްފި އެވެ.

ޓެރަރިޒަމް މަނާކުރުމުގެ ގާނޫނުގެ ދަށުން ހޯމް މިނިސްޓްރީން ވަނީ އިންޓެލިޖެންސް ޑީ-ބްރީފިން އާއި ރިސްކް އެސެސްމަންޓާއި ޓެރަރިޒަމް މަނާކުރުމުގެ ގާނޫނުގެ ދަށުން ހިންގާ ރީހެބިލިޓޭޝަން ޕްރޮގްރާމްތަކާއި ރީ-އިންޓަގްރޭޝަން ޕްރޮގްރާމް އަދި އަނބުރާ އަންނަ ހަނގުރާމަވެރިންގެ މައްޗަށް ހިންގޭ ހާއްސަ އިޖުރާއަތާބެހޭ ގަވައިދު އާއްމުކޮށްފަ އެވެ.

އޭގެ ތެރެއިން، އަނބުރާ އަންނަ ހަނގުރާމަވެރިންގެ މައްޗަށް ހިންގާ ހާއްސަ އިޖުރާއަތުތަކާ ބެހޭ ގަވައިދުގައި ވަނީ ހަނގުރާމަވެރި ސަރަހައްދަކުން އަނބުރާ ރާއްޖެއަށް އަންނަ މީހުން އަނބުރާ މުޖުތަމައުއަށް ރުޖޫއަވުމުގެ ކުރިން އަޅަންޖެހޭ ރައްކާތެރިކަމުގެ ފިޔަވަޅު އެޅުމަށްޓަކައި އިދާރީ ބަންދުގެ މަރުކަޒެއްގައި ބަންދުކުރަން ހޯމް މިނިސްޓަރަށް ކަނޑައެޅިދާނެ ކަމަށެވެ.

އެ މީހުންގެ އިތުރުން އެ ސަރަޙައްދުތަކުން އަންނަ 15 އަހަރުން ދަށުގެ ކުޑަކުދިން ވެސް އިދާރީ ބަންދުގެ މަރުކަޒުގައި ބަންދުކުރަންވާނެ އެވެ.

އިދާރީ ބަންދުގެ މަރުކަޒުގައި ބަންދުކޮށްފައިވަނީ ކޯޓު އަމުރެއްގެ ދަށުން ކަމަށްވާ ނަމަ އެ މުއްދަތު ހަމަވަންދެން ބަންދުކޮށްފައި ބަހައްޓަންޖެހެ އެވެ. އެފަދަ އަމުރެއް ނެތް ނަމަ، 24 ގަޑިއިރުގެ ތެރޭގައި ކޯޓަށް ހާޒިރުކޮށް އެ މީހެއްގެ ބަންދާމެދު ގޮތެއް ނިންމަންޖެހޭނެ އެވެ.

ގަވައިދުގައި ބުނާގޮތުން ކުއްޖާގެ މަސްލަހަތަށް ރިއާޔަތްކޮށް 15 އަހަރުން ދަށުގެ ކުޑަކުދިން އެ ކުދިންގެ ބެލެނިވެރިއަކާ އެކު އެފަދަ މަރުކަޒެއްގައި ބޭތިއްބުމަށް ކަނޑައެޅިދާނެ އެވެ. ނަމަވެސް ކުއްޖާގެ މައިންބަފައިންގެ ގާތުގައި ހުރުމުން އެ ކުއްޖާ ހަރުކަށި ފިކުރަށް ހުށަހެޅުމުގެ ފުރުސަތު އޮތް ނަމަ މައިންބަފައިންނާ ވަކިކޮށް ދައުލަތުގެ ބެލުމުގެ ދަށަށް ގެންދިއުމުގެ އިހުތިޔާރު ލިބިގެންވެ އެވެ.

އެ ކުއްޖާގެ މަސްލަހަތަށް އެންމެ ފައިދާހުރި ގޮތަކީ އެ ކުއްޖާގެ މައިންބަފައިންނާ ވަކިކުރުން ކަމުގައި ވާ ނަމަ، އެ ކުއްޖަކު ދައުލަތުގެ ބެލުމުގެ ދަށަށް ވަގުތީގޮތުން ގެންގޮސް، ކުއްޖާގެ އާއިލާގެ އެހެން މެންބަރަކާ ނުވަތަ މެންބަރުންނާ ކުޑަކުދިންގެ ޙައްޤުތައް ރައްކާތެރިކުރުމުގެ ގާނޫނާއި އެ ގާނޫނުގެ ދަށުން އެކުލަވާލާފައިވާ ގަވައިދުތަކުގައި ކަނޑައަޅައިފައިވާ ގޮތެއްގެ މަތީން ހަވާލުކުރެވިދާނެ ކަމަށް ވެސް ގަވައިދުގައިވެ އެވެ.

މަރުކަޒުގައި ބަންދުކުރުމަށް ފަހު ސިއްހީ ފަރުވާ ދީ، އެ މީހުންނާ ގުޅޭ އިންޓެލިޖެންސް ޑީ-ބްރީފިންއެއް ފުލުހުން ހަދަންޖެހެ އެވެ. އެ ބްރީފިން ހެދުމަށް ފަހު، އެ މީހެއް ޓެރަރިޒަމްގެ އަމަލުތަކަށް ހުށަހެޅިފައިވާ މިންވަރު ދެނެގަނެ، އެ މީހެއްގެ ކިބައިން މުޖުތަމައުއަށް ކުރިމަތިވެދާނެ ނުރައްކަލަކީ ކޮބައިކަން ދެނެގަތުމަށްޓަކައި އެ މީހެއްގެ ރިސްކް އެސެސްމަންޓް ހަދަންވާނެ އެވެ

އެ މަރުކަޒުގައި ތިބޭ މީހުންނަށް އާއިލާއާ ބައްދަލުކުރެވޭނީ ކޮންމެ ހަތް ދުވަހަކުން، އެއް ދުވަހު އެއް ގަޑިއިރަށެވެ. އަދި ކޮންމެ ހަތް ދުވަހަކުން އެއްފަހަރު 10 މިނެޓުގެ ފޯނު ކޯލް ކުރުމުގެ ފުރުސަތު ދޭންޖެހެ އެވެ.

ބައްދަލުވުމުގެ ފުރުސަތު ހަނިކުރަންޖެހޭ ސަބަބުތަކެއް ހުރި ކަމަށް ނިންމައިފިނަމަ، ގިނަވެގެން 15 ދުވަހުގެ މުއްދަތަށް އާއިލީ ބައްދަލުވުމުގެ ފުރުސަތު ނުދިނުމުގެ ބާރު، އެ މަރުކަޒަކާ ހަވާލުވެ ހުންނަ އިސްވެރިޔާއަށް ލިބިގެންވެ އެވެ.

ރިހެެބިލިޓޭޝަން ޕްރޮގްރާމްތައް ތިން އަހަރުން ރިވިއުކުރަންޖެހޭޭ

ހަނގުރާމައިން އަންނަ މީހުންނަށް ހިންގާ ރިހެބިލިޓޭޝަނާއި ރީ-އިންޓަގްރޭޝަން ޕްރޮގްރާމްތައް އެކުލަވައިލާނީ ރީހެބިލިޓޭޝަން އެންޑް ރީ-އިންޓަ ގްރޭޝަން ކޮމިޓީންނެވެ.

އެގޮތަށް އެކުލަވާލާއިރު، ރިހެބިލިޓޭޝަންގައި ބައިވެރިވާ ކޮންމެ މީހަކަށް ހާއްސަ ފަރުވާގެ ޕްލޭނާއި އެ ޕްލޭންގައި ފުރިހަމަ ކުރަންޖެހޭ ކްލާސްތަކާއި ސެމިނާރުތައް ހިމަނަންޖެހޭ ކަމަށް އެ ގަވައިދުގައިވެ އެވެ.

މި ގަވައިދުގެ ދަށުން ހިންގާ ރީހެބިލިޓޭޝަނާއި ރީ-އިންޓަގްރޭޝަން ޕްރޮގްރާމްތައް، މަދުވެގެން ކޮންމެ ތިން އަހަރުން އެއް ފަހަރު، ހޯމް މިނިސްޓަރު ކަނޑައަޅާ ފަރާތަކުން މުރާޖައާ ކުރަންޖެހެ އެވެ.