ފިއުލް ސަޕްލައި މޯލްޑިވްސް އިން އޮޕަރޭޓްކުރަމުން އަންނަ ބާޖެއް ކ. ރަންނާޅި ރިސޯޓު ކައިރީ އޮތް ފަރަކަށް އަރައިފި އެވެ.
އެމްއެންޑީއެފުން ބުނީ، 24 މީޓަރުގެ ދިގު އެ ބާޖު ރަންނާޅި ރިސޯޓު ކައިރީގައި އޮތް ފަރަށް އެރީ ރޭގެ ވަގުތެއްގައި ކަަމަށެވެ. ބާޖު ފަރަށް އެރީ ކީއްވެ ކަމެއް އަދި ނޭނގެ އެވެ.
އުޅަނދު ފުން ކުރުމުގެ މަސައްކަތް މިހާރު ކުރަމުން އަންނަ ކަމަށާއި އެ މަސައްކަތުގައި ކޯސްޓްގާޑް ސެކަންޑް ސްކޮޑްރަންގެ އުޅަނދުފަހަރު ހަރަކާތްތެރިވަމުން އަންނަ ކަމަށް ވެސް އެމްއެންޑީއެފުން ބުންޏެވެ.
ބާޖު ފަރަށް އެރިއިރު އޭގައި ހުރީ ކިހާ ތެލެއް ކަމެއް އަދި ނޭނގެ އެވެ. އެކަމަކު އެ އުޅަނދުން ތެޔޮ ލީކުވެފައި ނުވާ ކަމަށް އެމްއެންޑީއެފުން ބުނެ އެވެ.