އިންތިހާބާ ދިމާކޮށް ކުއްލިއަކަށް ރިސޯޓު ހަދާ ވާހަކަ ސަރުކާރުން ދައްކަނީ ކޮމަންޑޫ ދާއިރާގެ ރައްޔިތުން ގުނބޯ ހައްދަން ކަމަށް މޯލްޑިވްސް ނޭޝަނަލް ޕާޓީ (އެމްއެންޕީ) ގެ ރައީސް އަދި ދަނގެތި ދާއިރާގެ މެންބަރު މުހައްމަދު ނާޒިމް ރޭ ވިދާޅުވެއްޖެ އެވެ.
އެމްއެންޕީގެ ކެނޑިޑޭޓް އަބްދުލް ހަންނާނު ކޮމަންޑޫ ދާއިރާ އަށް ވާ ވައުދުތައް އިފްތިތާހު ކުރުމަށް އެ ޕާޓީގެ މާލެ ޖަގަހައިގައި ވާހަކަ ދައްކަވަމުން ނާޒިމް ވިދާޅުވީ، މި ދުވަސްވަރު ވަރަށް ބާރަށް ތަރައްގީގެ ވާހަކަ ދައްކަން ފަށާފައިވާ ކަމަށެވެ. ނަމަވެސް އެއީ ވަރަށް ޒަމާނުއްސުރެ އެކި ދުވަސްތަކާ ދިމާކޮށް މީހުން ދައްކަމުން އައި ވާހަކަތަކެއް ކަމަށާއި ކޮމަންޑޫގެ ރައްޔިތުން އެކަންކަން ގަބޫލު ނުކުރާނެ ކަމަށް ނާޒިމް ވިދާޅުވި އެވެ.
"އަޅުގަނޑު ސަރުކާރަށް ދަންނަވަން އޮތީ ސަރުކާރުން މިހާރު ރައްޔިތުން ގުނބޯ ހައްދަން ނޫޅުއްވާށޭ. ސަރުކާރުން ދައްކަވާ ނަނާ ހުވަފެންތައް ގަބޫލު ކުރާނެ ބަޔަކު މި ދާއިރާއަކު ނެތް. އެހެންވެ އެކަން ހަނދާން ނައްތާލާ،" އޭނާ ވިދާޅުވި އެވެ.
ސަރުކާރުގެ މެންބަރަކު ތިން އަހަރު މަޖިލިސް މެންބަރެއްގެ ގޮތުގައި ހުންނަވައިގެން ދާއިރާ އަށް ކަމެއް ނުކޮށް ދެވޭ ކަމަށާއި ނަމަވެސް ސަރުކާރަށް ނިސްބަތް ނުވާ ޕާޓީއެއްގެ މެންބަރަކު ހުރެއްޖެ ނަމަ ސަރުކާރު ފަހަތުން ދުވެ އެ ވައުދުތައް ފުއްދާނެ ކަމަށް ނާޒިމް ވިދާޅުވި އެވެ.
މެންބަރެއްގެ ދައުރަކީ ރައްޔިތުންގެ އަޑު ތަންތަނުގައި އިއްވާ، ސަރުކާރަށް މަޖުބޫރު ކުރުވައިގެން ކަންކަން ކުރުވުން ކަމަށް ނާޒިމް ވިދާޅުވި އެވެ.
މިހާރު ފަށާ މަޝްރޫއުތައް ހުއްޓާލަން ސަރުކާރަށް ނުކުރޭނެ ކަމަށާއި އެކަންކަން 2023 ގެ އިންތިހާބު އޮތުމާ އެކު އެކަންކަން ކުރިއަށް ގެންދަން ސަރުކާރަށް މަޖުބޫރު ވާނެ ކަމަށް ވެސް އޭނާ ވިދާޅުވި އެވެ.
"މިރޭ އަޅުގަނޑުގެ މީޑިއާ ޓީމުން ބުނީ ކުއްލިއަކަށް އިވިއްޖޭ އެއާޕޯޓުގެ ވާހަކަ. މިރޭ މި ވާހަކަ ދައްކާލީމަ މާދަން ހެނދުނު އަނެއްކާ އާ ވައުދުތަކެއް އަންނާނެ. އެކަމާ އެއްގޮތަކަށް ވެސް ހާސް ވާނެ ކަމެއް ނެތް. އަޅުގަނޑުމެން މި ވާހަކަަތައް ދެއްކި ވަރަކަށް ތިބޭފުޅުންނަށް އޮތީ ކުރިއެރުން،" ނާޒިމް ވިދާޅުވި އެވެ.
އެމްއެންޕީން ކޮމަންޑޫ ދާއިރާ އަށް ވައުދުތައް އެކުލަވާލީ ކޮންމެ ގެއަކަށް ގޮސް ގިނަ ވަގުތުތަކެއް އާއިލާތަކާއެކު ހޭދަ ކުރުމަށް ފަހުގައި ކަމަށާއި އެ ދާއިރާގެ ރައްޔިތުންގެ އިހުސާސްތައް ވަރަށް ކައިރިން ދެކި އަޑު އަހައިގެން ކަމަށް ނާޒިމް ވިދާޅުވި އެވެ.
"ވަރަށް ގިނަ ދުވަސްތަކެއްވެ އިހުމާލުވެފައި އޮތް ދާއިރާއެއް ގޮތުގައި އިހުސާސްކުރެވިގެން ދިޔަ. އެކަން ރަނގަޅު ކުރުމަށްޓަކައި އަޅުގަނޑުމެން މި ޕާޓީން މަސައްކަތް ފެށީ. މި މަސައްކަތް ހުއްޓާލާނީ މި ކެނޑިޑޭޓް ފެށޭ މަހުގެ ފަސް ވަނަ ދުވަހު އެ ގޮނޑީގައި ބައިންދާފައި،" ނާޒިމް ވިދާޅުވި އެވެ.
ކޮމަންޑޫ ދާއިރާ އަށް ހަންނާނުގެ ބައެއް ވައުދުތައް:
- މުސާރަ އިން ދެ މިލިއަން ރުފިޔާގެ ފަންޑެއް ހަދައި އިންޓްރަސްޓް ފްރީ ލޯނު ދޫކުރަން ފެށުން
- އެއާޕޯޓު އެޅުމަށް މަސައްކަތް ކުރުން
- ރަށްފަތި ރިސޯޓެއްގެ ގޮތުގައި ތަރައްގީ ކުރުން
- ލޭންޑް ޔޫޒް ޕްލޭން އަވަސް ކުރުމަށް ގާނޫނަށް ބަދަލު ގެންނަން ހުށަހެޅުން
- ސަރުކާރާ ގުޅިގެން ދާއިރާގައި ހުއްޓިފައި ހުރި މަސައްކަތް ކުރުން
- ކޮންމެ ރަށަކުން ރަމްޟާން މަހު މީހަކު އުމްރާއަށް ފޮނުވުން
- ކޮމަންޑޫ ދާއިރާގެ ކުރީގެ މެންބަރުގެ ހަނދާނުގައި ފުޓްސަލް މުބާރާތެއް ބޭއްވުން
- އިންސާފުވެރި ޝަރުއީ ނިޒާމެއް ގާއިމް ކުރުމަށް ވަކާލާތު ކުރުން