އާބާދީ ބޯ ސިޓީއެއްގެ ފައިނަލް، އާބާދީ ކުޑަ ރަށަކަށް ބަދަލުކުރުމުގެ މަސްލަހަތު އޮތީ ކޮން ފަރާތެއްގައި ތޯ އެވެ؟ ފުޓުބޯޅަ ތަރައްގީ ކުރުމަށް މިފަދަ "އެގްޒިބިޝަން މެޗު" ކުޅުން ގިނަ ކުރުމަކީ ރަނގަޅު ކަމެކެވެ. ސްޓޭޑިއަމްތައް ގިނަވެ، މި ސަރުކާރުން ވެސް 25 ދަނޑު އެޅިއިރު، އަދިވެސް މާލެ ފިޔަވައި އެހެން ރަށްރަށުގައި މިފަދަ ގައުމީ ފައިނަލްތައް ކުޅެއެއް ނޫޅެ އެވެ. ނަވާރަސަތޭކަ ހަތްދިހަ ވަނަ އަހަރު އައްޑު އަތޮޅުގައި ކުޅުނެވެ.
އެ އަށް ފަހު މިވީ 45 އަހަރު މިފަދަ ފައިނަލެއް މާލެ އިން ބޭރުގައި ކުޅެފައި ވަނީ އެންމެ ފަހަރަކު އެވެ. އެއީ، ދާދި އިހަކަށް ދުވަހު، 2015 ވަނަ އަހަރު އެވެ. އެ ފަހަރު ވެސް މާލެ އިން ބޭރުގައި ކުޅެން ޖެހުނީ އެ އަހަރު މާލޭގެ ގަލޮޅު ދަނޑުގެ ވިނަގަނޑު ހަލާކު ކޮށްލުމަށް ފަހު އެހެން ގޮތެއް ނެތިގެންނެވެ. މާލެ ފިޔަވައި އެހެން ރަށްރަށަށް ސަމާލުކަން ދޭން ވެގެންނެއް ނޫނެވެ. މަޖުބޫރީ ހާލަތުގަ އެވެ. މާލޭގެ ދަނޑުގައި ވިނަ ނެތިގެން، މުޅި މުބާރާތް ކުޅުނީ އައްޑު އަތޮޅާއި ތިލަދުންމަތީ ދެކުނުބުރީގައި ދެ ގްރޫޕަކަށް ބަހާލައިގެންނެވެ. ފައިނަލް ބަލަން 4،000 ސަޕޯޓަރުން ސ. ހިތަދޫ ސްޓޭޑިއަމަށް ޖަމާވި އެވެ. ނިއު ރޭޑިއަންޓް-މާޒިޔާގެ ފައިނަލް 1-3 އިން ކާމިޔާބުކުރީ މާޒިޔާ އެވެ.
މި ހަފުތާގައި ނިމިގެންދިޔަ "ރޯޑް ޓު އަލިފުށި" އަކީ ވެސް މަޖުބޫރީ ހާލަތުގައި މާލެ އިން ބޭރުގައި ކުޅެން ޖެހުނު މެޗެކެވެ. މިހެން ދަންނަވަން ޖެހެނީ މިހާތަނަށް، ރާއްޖެތެރެ އަށް ހަމަހަމަ އުސޫލަކުން ފުޓުބޯޅަ ފޯރުކޮށްދިނުމަށް މަސައްކަތް ކޮށްފައި ނުވާތީ އެވެ. ދެހާސް ފަނަރަވަނަ އަހަރުގެ ފަހުން މިވީ ހަ އަހަރުގެ ތެރޭގައި މިފަދަ ފައިނަލެއް މާލެ އިން ބޭރު ރަށެއްގައި ކުޅެފައެއް ނުވެ އެވެ.
އަޅައިލުން ކުޑަވަރަކީ، އެންމެ ފަހުން 2019 ގައި ރަށްރަށުން އެވްރެޖްކޮށް 70 ކްލަބް ބައިވެރިވާ "މިނިވަން ޗެމްޕިއަންޝިޕް" ގެ ހިލަމެއް ވެސް ނުވެ، އިބާރާތުގެ އޮޅުންގަނޑެއްގެ ތެރޭގައި ކެންސަލް ކޮށްލުމެވެ. ނަމަވެސް އައު ފޯމެޓެއްގެ ދަށުން ރަށްރަށަށް ލީގް ފުޅާކުރާ ވާހަކަ ދައްކަ އެވެ. އެންމެ ފަހުން، މާލެ އިން ބެލުންތެރިއަކު ނުވެގެން އަނެއްކާވެސް ގޮތެއް ހޯދަން މަޖުބޫރުވީ އެވެ.
މި ސަރުކާރު އައީ ދަނޑު ފުރައިލުމުގެ ވައުދަކާ އެކުގަ އެވެެ. މެޗުގެ ކުރީ ދުވަހު، ވަޒީރު ވިދާޅުވީ؛ "މިއަދު މާލޭގެ ދަނޑަކަށް މީހަކު ނުވަދޭ. އެކަމަކު، ރަށްރަށުގައި އެކަން ކުރާއިރު، އެ ފޯރި ވެސް އެބަހުރި. ރައްޔިތުން މެޗު ބަލަން ވެސް އެބަ އާދޭ. އަޅުގަނޑަށް ޔަގީން މާދަމާ މި ރަށުގެ ރައްޔިތުން. ނުކުމެ މި ރަށުގެ ދަނޑު ފުރާލާނެ،" (ސްޕޯޓްސް މިނިސްޓަރު އަހުމަދު މަހުލޫފް، 22 ޖެނުއަރީ 2022)
"ރޯޑް ޓު އަލިފުށީ" ގައި ދިމާވީ މާލޭގެ ވިނަގނޑު ހަލާކުވުމުގެ މައްސަލައެއް ނޫނެވެ. މުޅިން އެހެން މައްސަލައެކެވެ! މި ފަހަރު ދިމާވި ގޮތަކީ މާލޭގައި ކުޅޭ މެޗުތަކަށް ބެލުންތެރިން ނުވަނުމެވެ. ނިމިގެން ދިޔަ ޕްރެޒިޑެންޓްސް ކަޕްގެ މާލޭގެ މެޗްތަކުގެ ބެލުންތެރިންގެ އެވްރެޖަކީ މެޗަކަށް 38 ބެލުންތެރިންނެވެ!
މި ފިކުރުގައި އެސޯސިއޭޝަން އޮވެފައި، ކުއްލިއަކަށް ފެނުނީ "ސިޔާސީ ދާއިރާއަކަށް"، ޕްރެޒިޑެންޓްސް ކަޕްގެ ފައިނަލް ހިބައިން ދީ، ރަސްމީކޮށް އިއުލާނުކުރި ތަނެވެ!
އެފްއޭއެމުން ބުނަނީ "އަލިފުއްޓަކީ އަބަދުވެސް އަތޮޅު ފުޓްބޯޅަ މުބާރާތާ އެހެން މުބާރާތްތަކަށް ބިޑް ކުރާ ބައެއް. އެ އަހަރަކު ބިޑް ކާމިޔާބު ނުކުރެވުނަސް ޖެހިގެން އަންނަ އަހަރު ވެސް ހަމަ ބިޑް ކުރާނެ. މި ކަމުން އެބަ ފެނޭ އެ ރަށުގެ ރައްޔިތުން މި ކަހަލަ ކަމަކަށް އެދި އެދޭ މިންވަރު. އެހެންވެ އަސްލު އަޅުގަނޑުމެން މި ފުރުސަތު ދޭން ނިންމީ. މިއީ އަލިފުށީގެ ޒުވާނުންނަށް ދޭ ހަދިޔާއެއް." (އެފްއޭއެމްގެ ސެކްރެޓަރީ ޖެނެރަލް ހުސައިން ޖަވާޒް، 22 ޖެނުއަރީ 2022)
މިލިއަނަކަށް ވުރެ ގިނަ ރުފިޔާގެ ފޮނި ހެދިކާއާއެކު، ފައިނަލް ކުޅުނީ ރ. އަލިފުށީގަ އެވެ. އަލިފުށިން 35 އަހަރު ކުރި މަސައްކަތަކުގެ އުއްމީދީ ނަތީޖާއަކީ، އަލިފުއްޓަށް އެއް ދުވަހުގެ ވޯލްޑް ކަޕެއް ލިބުމެވެ! އަދި މިއީ އަލިފުއްޓަށް ހައްގު މިންވަރު ކަމުގައި ގަބޫލު ކުރާކަށް ވެސް ކޮންމެހެންނެއް ނުޖެހެ އެވެ. ކިއުއްވައިލައްވާށެެވެ.
އެއްދުވަހުގެ ވޯލްޑް ކަޕެއް!
އަލިފުއްޓަށް މި ލިބުނީ އެއް ދުވަހުގެ ވޯލްޑް ކަޕެކެވެ. ރަށުގެ އައު ފުޓުބޯޅަ ދަނޑު ޖެނުއަރީ 23، 2022 ވީ އާދީއްތަ ދުވަހު، ނައިބު ރައީސް ފައިސަލް ނަސީމް ހުޅުވައި ދެއްވީ، ވެލެންސިއާ-މާޒިޔާގެ ޕްރެޒިޑެންޓްސް ކަޕްގެ ފައިނަލް މެޗުންނެވެ. އަލަށް އެޅި ދަނޑުގައި ބެލުންތެރިންނަށް އެންމެ ފުރިހަމަ އިންތިޒާމުތައް ނެތަސް އަތްވާއި ހިޔަލުގައި 500- 1،000 އާ ދެމެދުގެ އަދަދަކަށް މީހުން ހިފެހެއްޓި އެވެ. މިއީ އަލިފުއްޓަށް ވެސް އަދި މުޅި ރ. އަތޮޅަަށް ވެސް ލިބުނު ވަރަށް ބޮޑު ޝަރަފެކެވެ. އަދި އެހާމެ މޮޅު ފުރުސަތެކެވެ. މެޗުގެ ފޯރިގަދަވީ ފޭވަރިޓް މާޒިޔާ ބަލިކޮށް، 2-1 އިން އިތުރު ވަގުތުގައި ވެލެންސިއާ ހަ ވަނަ ފަހަރަށް ޗެމްޕިއަންކަން ހޯދުމުންނެވެ. ހަވާ އެރުވި އެެވެ!
މިފަދަ އެގްޒިބިޝަން މެޗުތަކަކީ "ފުޓުބޯޅަ އެކްސްޕޯ" އެއްގެ ގޮތުގައި ފުޅާކޮށް، ޕްރޮމޯޓް ކުރެވިދާނެ އިވެންޓް ތަކެކެވެ. ހަ ސަތޭކައެއްހާ މީހުން ރަށުން ބޭރުން އެރިއިރު، މިއީ ރަށުގެ 2،300 ރެޒިޑެންޝަލް އާބާދީގެ ހަތަރުބައިކުޅަ އެއްބައެވެ. ގްރޭޓަ މާލެ އަށް އެއްފަހަރާ 70,000 އެއްހާ މީހުން އެރުން ފަދަ ކަމެކެވެ. ރަށަކީ އޮޑިބަނުމުގެ ސިނާއީ ރަށަކަށް ވާތީވެ، "ހޯމްސްޓޭ" ކޮޓަރި ލިބެން ހުރި ނަމަވެސް މި ފަހަރު އޮތީ ކޮޓަރި ވެސް މަދުވެފަ އެވެ.
އަލިފުށި ފުލް!
އަލިފުއްޓަށް މި އައި ފުޓުބޯޅަ އީދުގެ ސަބަބުން ލިބުނު އެންމެ މޮޅަކީ އަލިފުށި ފުލްވުމެވެ. ހަސަތޭކައެއްހާ މީހުން ރަށަށް އެރި އެވެ. ފުޓުބޯޅަ މެޗެއްގެ ސަބަބުން ރަށް ފުރައިލި އެވެ. ކެފޭތައް ތޮއްޖެހުނެވެ. ދުއިސައްތައެއްހާ ރެސްޓޯރަންޓް ސީޓާއި 150 ކެފޭ ސީޓް ރަށުގައި ގުނައިލެވެ އެވެ. ކާރޫބާރޫ ބޮޑު 24 ގަޑިއިރެވެ! ހޯމް ސްޓޭތައް އޯވަބުކް ވީ އެވެ! ކައުންސިލުން އެކަނި ވެސް 130 ކޮޓަރި ބުކްކުރި އެވެ.
ޓްރާންސްޕޯޓް ނިޒާމު އޮތީ ބަނދަރަށް ޖަމާވެފަ އެވެ. މާލެ އިން ފުރީ ކޮވިޑް ޓެސްޓުން ވެސް ފާސްވެގެންނެވެ. ވިޔަފާރި މެކުހަށެވެ. އަލިފުށީގައި ހޯސްޓްކުރާ ފުޓުބޯޅަ ފައިނަލަކީ ރަށު ފެންވަރުގައި މެހްމާންދާރީ އަދާކުރުމުގެ ފަންނުވެރިކަން ވަޒަން ކޮށްލަދޭނެ އިވެންޓަކަށް ވި އެވެ. ވެލެންސިއާ އާއި މާޒިއާ އަށް މެހްމާންދާރީ އަދާކުރުރީ ސަގާފީ ސްޓައިލްގަ އެވެ. މެހްމާންދާރީ އަދާކުރުމުގެ ވިޔަފާރިން އަލިފުށްޓަށް މި ލިބުނީ މަދުވެގެން އެއްމިލިއަން ރުފިޔާގެ ޖީޑީޕީ ބޫސްޓެކެވެ!
އަލިފުށީގެ ފުޓުބޯޅަ ތާރީހަށް ނަޒަރެއް
އަލިފުށީގެ ކުދިންނަށް ފުޓުބޯޅަ ކުޅެން ދަސްކޮށްދިނީ، ހަތްދިހައިގެ އަހަރުތަކުގެ ރޭޑިއަންޓް ސްޕޯޓްސް ކްލަބްގެ ފޯވާޑް ހެންވޭރު ހިރުނދުގަސްދޮށުގޭ ހިރުނދު ތުއްތު މަނިކު ކަމުގައި ބުނެ އެވެ. ހިރުނދޭ "ކޯޗު ކޮށްދިން" ކުދިން ބޮޑުވެ، އަތޮޅު ތަށި މިލްކު ކުރެވުނީ އޭނާ ދެއްވި ހިތްވަރުން ކަމުގައި ރާއްޖެތެރޭގެ ފުރަތަމަ ހަތަރު މުބާރާތުގައި ކުޅުނު އަހުމަދު ޝަރީފް، އަލިފުށީ އޯޒޯން، ބުނުއްވި އެވެ. އަލިފުއްޓަކީ މީގެ 35 އަހަރު ކުރިން ރާއްޖެތެރޭގެ ފުރަތަމަ ފުޓުބޯޅަ މުބާރާތުން ފެށިގެން ބައިވެރިވާ ރަށެކެވެ. ފުރަތަމަ ބައިވެރިވީ ރ. ޖަމާއަތުގެ ގުޅުމުގެ އަލިފުށީގެ ގޮފީގެ ނަމުގަ އެވެ.
ހިރުނދޭގެ ފަހުން އަށްޑިހަ އާއި ނުވަދިހައިގެ އަހަރުތަކުގައި ފުޓުބޯޅަ ތަރައްގީ ކުރުމުގައި އެންމެ ބޮޑު ހިއްސާއެއް އަދާކުރީ އަލިފުށީ ބޯޓްޔާޑް ކަމަށް ވާނެ އެވެ. ހުނަރުވެރި މަސައްކަތްތެރިކަން ދަސްކޮށްދިނުމުގެ މަރުކަޒެއްގެ ގޮތުގައި އަލިފުށި ބޯޓްޔާޑް ފަށައިގަތް ދުވަސްވަރު، އެ ތަނުގެ ވަޑިންނާއި ޒުވާން އިންޓާނުން، ހަވީރު ބޯޅަ ކުޅެން ދޫކުރި އެވެ. ފަހުން، ކޮންޓްރެކްޓް އުސޫލުން މަސައްކަތް ބަދަލުވެގެން ދިއުމާ ގުޅިގެން، ހަވީރު ބޯޅަ ކުޅެންދާން ލިބުމުގެ ފުރުސަތު ގެއްލުނީ އެވެ.
މަޝްހޫރު "އަލްހާކަޕް" އަކީ 1982 އިން 2000 ވަނަ އަހަރާ ހަމައަށް، އަލިފުށީ ބޯޓްޔާޑާ ހަވާލުވެ ހުންނެވި އަހުމަދު ވަޖީހުގެ ދުވަސްވަރު ބޯޓްޔާޑުން އިސްނަގައި، ރަށުގެ 4-5 ޓީމަކާއެކު ފެށި ފުޓުބޯޅަ މުބާރާތެކެވެ. މިހާރުގެ ޖީލުތަކުގެ އަތްމައްޗަށް ހިންގުން ފުރޮޅާލަ ފުޓުބޯޅައިގެ ސަގާފަތް އަލިފުށީގައި މިހާރު ވަނީ ދިރިފަ އެވެ. އަލްހާކަޕްގެ ބާރުގައި ނުވަދިހައިގެ ކުރީކޮޅު އަލިފުށިން އަތޮޅު މުބާތާތުގެ ތަށި މިލްކުކުރި އެވެ. އަދި ނުވަދިހައިގެ އަހަރުތަކުން ފެށިގެން ގައުމީ ފުޓުބޯޅަ ތަރިން އެ ރަށަށް ތައާރަފްކޮށް، ފުޓުބޯޅަ ސަގާފަތް ބައްޓަން ކުރި އެވެ.
އެންމެ ފަހުގެ މުބާރާތުގެ އިނާމުގެ ފައިސާއަކީ 50،000 ރުފިޔާ އެވެ. އަދި މިއަދު އަލިފުށީ ކައުންސިލްގެ ރައީސަކަށް ހުންނެވި އާދަމް އިމްރާން (އިންނަ) އަކީ ޕްރެމިއަލީގް ކުޅެ، 32 އަހަރުގައި އެ މަގާމަށް ހޮވިފައި ހުރި ކުޅަދާނަ ޒުވާނެކެވެ. ދާދި ފަހުން ކުޅުން ހުއްޓާލި ކަމަށް އިއުލާންކުރި އަލިފުށީގެ ގައުމީ ޓީމުގެ ކުޅުންތެރިޔާ މުހަންމަދު ރަޝީދު (ހޮކޭ) އަކީ މުސްތަގްބަލްގެ އަލިފުށީ ކޯޗު ކަމުގައި ވެސް ވެދާނެ އެވެ.
މިއަދު އަލިފުއްޓަކީ ޖަޒީރާ ލީގްގެ މަފްހޫމްގެ ދަށުން ޕްރެމިއަ ލީގަށް ކޮލިފައި ވުމަށް ބޭނުންވާ ހުރިހާ ސިފަތަކެއް ފުރިހަމަ ވެފައިވާ މިސާލެއް ފަދަ ރަށެކެވެ.
ދަތުރުފަތުރު
މާލޭގެ ދެ ކްލަބް އަލިފުށީގައި ކުޅޭތީވެ، މެޗު ބަލަން ދާހިތްވާ އެތައް ބަޔަކު އަލިފުއްޓަށް ޖައްސައިލި އެވެ! އަތޮޅު ތެރެއިންނާއި އަތޮޅުން ބޭރުން އަދި މާލޭގައި ދިރިއުޅޭ އަތޮޅުގެ "ޑަޔަސްޕޯރާ" އިން މި މެެޗަށް ޝައުގުވެރިވި އެވެ. އައިސްކްރީމް ބޯލައި، މަޖާކޮށްލާ، ހަމަ ލޮލުން މެޗު ބަލައިލުމަށެވެ.
މާލެ އިން އަލިފުއްޓަށް 50 މީހުންގެ ކެޕޭސިޓީގެ ސްޕީޑް ބޯޓެއްގައި ތިން ގަޑިއިރުން ދެވެ އެވެ. އަގަކީ ދެކޮޅަށް 1،200 ރުފިޔާ އެވެ. މިދިޔަ ބުރާސްފަތި ދުވަހުން ފެށިގެން މެޗު އޮތް ދުވަހު ވެސް ކޮންމެ ދުވަހަކު ދަތުރުކުރީ ބޯޅަ އަށް ދިޔަ މީހުންނެވެ. މާޒިޔާ އިން ވަކި ދަތުރެއް އެޅިއެވެ. ބުރާސްފަތި ދުވަހު ހެނދުނު ހެނދުނާ ވެލެންސިއާ އަލިފުއްޓަށް ފުރިއިރު، މާޒިޔާ ފުރީ އެ ދުވަހު ހަވީރު އެވެ. ދެ ކްލަބް ވެސް 45 މިނިޓްގެ ދަތުރުކުރީ މަތިންނެވެ. އެއީ ހުޅުލެ އިން އިފުރު އެއާޕޯޓަށެވެ. އެއާޕޯޓުން ސްޕީޑް ލޯންޗުގައި އަލިފުއްޓަށް ތިރީހަކަށް މިނިޓުން ދެވެ އެވެ.
ކްލަބްތަކާއި އޮފިޝަލުން ހިމަނައިގެން 200 ކިލޯ މީޓަރު ދުރުގަ އިއޮތް އަލިފުއްޓަށް މާލެ އިން ވެސް މަދުވެގެން 300 މީހުން ޖަމާވި އެވެ. އަދި ގޮނޑިބަރީގައި ތިއްބެވި 210 ޝަރަފްވެރިންގެ ތެރެއިން ރަށުގެ އިއްޒަތްތެރިންނާއި ރަށުން ދަނޑަށް ވަން އަދަދާއި ރަށުން ބޭރުން އަލިފުއްޓަށް އެރި ފުޓުބޯޅަ ސަޕޯޓަރުން ތިބޭނެ އެވެ.
ތިންގަޑިއިރު ދުރުގައި އޮތް ހދ. ކުޅުދުއްފުށިން ފަހު ވަގުތުގެ ކޮވިޑްގެ ލޮކްޑައުންއަކާ ހެދި ނުދެވުނަސް ކ. ކާށިދޫންނާއި ހދ. މުރައިދޫންނާއި ނ. ކެނދިކުޅުދޫންނާއި ވިއްސަކަށް މިނިޓް ދުރުގައި އޮތް ށ. ފޯކައިދޫން ވެސް ސަޕޯޓަރުން އެރި ކަމަށް ބުނެ އެވެ. އަތޮޅު ތެރެއިން ހަމަ ކޮންމެ ރަށަކުން ވެސް ސަޕޯޓަރުން އަލިފުއްޓަށް އެރި ކަމަށް ބުނެ އެވެ.
އެގްޒިބިޝަން މެޗަށް ބިޑްކުރުން
އާބާދީ ބޯ ސިޓީއެއްގެ ފައިނަލް، އާބާދީ ކުޑަ ރަށަކަށް ބަދަލުކުރުމުން ފައިދާ ވަނީ ކޮން ފަރާތްތަކަކަށް ތޯއެވެ؟ ރަށަށް ރަނގަޅެވެ. ރަށަށް ރަނގަޅުވީމާ ސިޔާސީ ވެރިންނަށް ވެސް ރަނގަޅެވެ. ރަށް ފުރައިލި އެވެ. ރަށުން ބޭރުން ގިނަ ބަޔަކު ރަށަށް އެރުމަކީ އިޖުތިމާއީ އަދި އިގްތިސާދީ ގޮތުން ރަށަށް ލިބުނު ކުރިއެރުމެކެވެ. ކްލަބަށް ވެސް ރަނގަޅެވެ. ފޭންބޭސް އިތުރުކޮށް، ދަނޑުފޯރި ނަގައި ބެލުންތެރިންގެ ކުރިމަތީގައި ކުޅުންތެރިޔާ އަށް ހުނަރުވެރި ޕާފޯމަންސެއް ދައްކަން ލިބޭ ހިތްވަރެކެވެ.
އެކަމަކު މި އަށް ވުރެ ބޮޑު ސްޓޭޑިއަމެއްގައި، މި އަށް ވުރެ ގިނަ ބެލުންތެރިންގެ ކުރިމަތީގައި އަދި މި އަށް ވުރެ ގިނަ ކްލަބްތައް ބައިވެރިވުމުގެ ތާރީހެއް އޮތް، ތިލަދުންމަތީ ދެކުނުބުރި (ހދ.) ނުވަތަ ހައްދުންމަތީގައި (ލ.) މި ފައިނަލް ނުބޭއްވީ ކީއްވެތޯ އެވެ؟ "ރޯޑް ޓު އަލިފުށި" އަކީ ރާއްޖެތެރެ އަށް ފުޓުބޯޅަ ފޯކަސް އަނބުރައިލުމަށް އެވޯޑްކުރި ފައިނަލެއް ކަމުގައި ބުނާއިރު، އެ ކަމުގެ އެންމެ މޮޅު ގޮތް ހޯދަން އުޅޭ ތަނެއް ނުފެނެ އެވެ.
މިފަދަ އެގްޒިބިޝަން މެޗްތަކަކީ، އުސޫލެއްގެ ގޮތުން ފުޓުބޯޅައިގެ މަސްލަހަތަށް ބުރަވެ، ބިޑްކުރާ އިވެންޓްތަކަށް ވާން ޖެހެ އެވެ. ހުދު އެފްއޭއެމުން މުބާރާތްތަކާއި އެގްޒިބިޝަން މެޗްތައް ހޯސްޓް ކުރުމުގެ އުސޫލު 2009 އިން ފެށިގެން ތަންފީޒު ކުރަން ފަށާފައިވާއިރު، މިހާރު އައު ލީގް ފޯމެޓްގައި ގްރޫޕް މެޗުތައް ސެންޓަރަލައިޒްޑްކޮށް ބާއްވަން ވެސް ހުޅުވައިލީ ބިޑަށެވެ.
އެގްޒިބިޝަން މެޗު ކުޅުމަށް ކްލަބަށް އެޕިއަރަންސް ފީ ވެސް ލިބެ އެވެ. ވީމާ، ބިޑް ނުކުރީ ކީއްވެތޯ ސުވާލު އުފެދެ އެވެ. ސިޔާސީ ގޮތުން ނުފޫޒު ގަދަ ދާއިރާއަކަށް މިއަދުގެ ޑިމޮކްރެޓިކް، ސެންޓަ ރައިޓް، ކޯލިޝަން ސަރުކާރެއްގައި ދީލާލަން ޖެހުނު ނަމަވެސް އެހެން އަތޮޅުތަކާއި ރަށްތަކަށް ބިޑެއް މެދުވެރިކޮށް، ހަމަހަމަ ފުތުސަތު ނުދިނީ ކީއްވެތޯ އެވެ؟ ފުޓުބޯޅައިގެ މަސްލަހަތު ރައްކާކުރުމަށް، ބިޑަކަށް ހުޅުވައިލެވުނީސް ނޫންތޯ އެވެ؟ ނުފޫޒު ގަދަ ފަރާތްތަކުން ވެސް ކުރިމަތިލާނެ ނޫންތޯ އެވެ! އެންމެ ފަހުން ސެކްރެޓަރީ ޖެނެރަލް ވިދާޅުވީ، މި ފައިނަލަކީ ބިޑަކާ ނުލައި، ދެއްވި ހަދިޔާއެއް ކަމަށެވެ!
